1 Israelme Shittim ga bamdi, nah mipeidung Moabme puidung de ngngwa kemha ta tei ndeu di, 2 kedanemene Moabme puidung minadung de penui rabedung ratak ketei gage qu gai. Cine minadung matyei nah Moabme rabedung dwa keumie.✝ 3 Israelme mipeidung Peor ga Baal de reca kecu ga ngngwa ncüt di, nah RAMPAUBE Israelme de perata süt di.✝ 4 RAMPAUBE Moses dage rang eh, "Minadung gu muiteume pelane de teitset dilu nah penuide RAMPAUBE dwa gage kanghezu lwe tingkebaa gage tei recie gailu, ciciu lude Israelme de RAMPAUBE perata süt kebam de nreutet dilu kerane." 5 Cine Moses Israelme gu muiteumedung dage rang, "Nnui hangge ge kecu nnui minadung Peor ga Baal de reca bam kedime de teitset dilu."

6 Pecai Israelme pei hangge gwang nah pe kilungme peupei kakga de Midiame puige de ngngwa gwang. Aide Moses nah Israel leuhme mina pelane miakngau gade, penui redau kecu paiki tet nlüt kecu gade hap eh bam kecudau. 7 Eleazar napei nah cingkupei Aaron capei Phinehas, cide ngau keludau, pa heleuhbe kakga de cuh lu nah pe ba ga hengei pwalu. 8 Pa paiki ga Israelme pei caisui lüt nah hengei le penai hangnana de reuhdi, Israelme pei nah mipuibe hangna de. Ciciu eh Tinggwang Israelme da rapia langgai kedi de mtakdi. 9 Pumpei cang ngkaiemdai ge rapia cide gade tsaidi.

10 RAMPAUBE Moses de mpau, rang eh, 11 "Eleazar napei nah cingkupei Aaron capei Phinehas, ne Israelme de a ratasüt eh kebam de keumzia dida kedanemene pa penui kakga de a lungning de pelung kaisüt eh teicang beu. Cine Ih Israelme de a rata eh ngkapdi meda. 12 Cine ranggai, ‘RAMPAUBE rang eh, "Pielo, Ih Phinehas de samkakkelu lungciep de pwapeu dizie. 13 Kedanemene pa nah pe leuhme pe caileu kerame ziemne, aipau samkak de kelungta cingku tei zie kedanemene pa pe Tinggwang, a ziemne pelung kaisüt. Pa ne Israel minadung ziemne kezuyibe teugwang beu."’"

14 Cu Israelme pei Midiame pui de ngngwa tsai kedibe zi Zimri Salu napei, Simeonme kakga de pautsadung kelak gu muiteu ge. 15 Teitset kedi Midiame pui zi cai Kozbi Zur napui, Midiame leuh nah kelak gade peuteume ge.

16 Cine RAMPAUBE Moses de mpau, rang eh, 17 "Midiame de ngauraume nzwa cetlu nah penuide regi gai, 18 kedanemene penui ncu ngauraume ge nzwa kenret le cwala. Penui ncu Peor gade kesia tei kegaine nah penui tipui Kozbi ziemne, Midian ga muiteube napui, cipau benai Peor ga rapia ne teitset kedime."