1 RAMPAUBE Moses penai Aaron de mpau. Pa rang eh, 2 "Levime kakga de Kohath leuhme mipei pumpei gailo, penui pautsadung nah kilungmedung gade. 3 Mipeidung pelane mmi camrei gade riakngei kecang peilu. Mipei aidungde kengkwa paiki ga heta tei kerane hemaa ga ncüt bi maisia. 4 Kohath leuhme kengkwa paiki ga aziemne kaipwa kebam mcitube niadung de pie rengei lu maisia. 5 Ramzeuki teuswa tet kera telei keludau, Aaron nah pe napeidung paiki ga gwanglu maisia, kehezupai mcitube ni de kemci ni gade teu ntsam kebam de keugi di nah zierang samkakbung de cide ne kezuilu. 6 Penui samkakbung de teigeu keyi ge le kezui di maisia. Penui pai kepuge pereu gage kamgailu maisia. Penui cide pwa kerane matiedung heci nlütlu maisia. 7 Penui tangku reca pwa kebam taktyeibam reu gage pai kepuge kamgai zie. Cika ge penui lidung, petiadung, hekwakdung, nah ruigai kera duilabung kaizie. Taktyeibam ga tangku bammui maisia. 8 Penui cipau reu gage pai kegie kam zie nah cide makaune geu keyibe le hacim zie. Penui taktyeibam pungkera matiedung heci nlüt maisia. 9 Penui hepai kepuge keulu nah kebaabungbam de hacim di maisia, kebaabungdung, misiepdung, makwakdung de si eh, nah macadui bungdung pelane kebaabungdung ziemne. 10 Penui kebaabungbam de nah teumaikesia niadung pelane teigeu keyi le kezui pwa kebam gage kaibi lu maisia, nah penui cide pungkela rak gage kailu maisia. 11 Penui kecak recabam de ga hepai kepuge kamgai lu maisia. Penui cide teigeu keyi ge le hacim lu maisia, nah ciu eh pungkera matiedung de heci nlütlu. 12 Penui kemci ni ga mata tei kerane mania keu maikesia pelane keulu nah cide pai kepuge le kezui lu maisia. Cidungde makaune geu keyibe le hacim di maisia nah maniadung de pungkela perak gage kailu. 13 Penui recabam gade mimüt de keugi di maisia nah recabam gage gieremang pai ge kamgailu. 14 Penui pungkela perak gage recabam ga mata tei eh keukecu niadung pelane kaigai lu maisia. Mania aidungde cai mikwakdung, petiadung, hepeidung, hekwakdung, nah recabam ziemne kedabe niadung pelane. Penui ratakbam de makaune geu keyige le hacim maisia nah pecai pungkera matiedung heci nlütlu. 15 Aaron nah pe napeidung kemci ni cide hacim cangsiak keludau nah pe niadung pelane, nah ramzeuki teu tetswa kecudau, Kohath leuhme kemci ni de pwa kera gwangbi maisia. Magade penui kemci niadungde tungdi cai, penui tsai bizie. Aide Kohath leuhme ta da, kengkwa paiki ga cipau niadung de pwa gwang kera. 16 Cingkupei Aaron napei Eleazar ne kebaa ziemne macadui, perim kehengui, peubam kela meibui reca, nah maca keniak kelu aidungde pie rengei bam. Pa ne reca paiki pelane pie rengei nah cika kebam pelane, kemci ni nah pe niadung."

17 RAMPAUBE Moses penai Aaron de mpau. Pa rang eh, 18 "Levime kakga de Kohath pautsa leuhme de teumpet diso. 19 Penuide gumlu, iciude penui ringlu zie nah tsai dilak, aide tei kegaine. Penui mcitube taiga gwang nna keludau 20 kaknage ziemne de penuide peu kemci ni de nlüt pie so, mecai penui tsai bizie. Aaron nah pe napeidung nlüt maisia, nah ciciu eh Aaron nah pe napeimedung Kohath leuhme hangge ge kecu de peta nlumbeu maisia, pe ziemne yitu kera tadung ga."

21 RAMPAUBE Moses de mpau dai. Pa rang eh, 22 "Gershon leuhme pum de pei gailo, penui paume gade nah penui pautsadung gade. 23 Mmi camrei gade mmi riakngei medung de peilu. Kengkwa paiki ga ncüt eh hemaa ga hetatei kerame pelane de peilu. 24 Aide Gershonme pautsadung ta da, penui hetatei kecudau nah penui pungkela de. 25 Penui reca paiki kehezupaidung de punglu maisia, kengkwa paiki, cide hacim kebamdung, cika makaune geu keyi hacim pwa kebam, nah kengkwa paiki ga tet kenlüt kehezupaidung. 26 Penui kigu kehezupaidung de punglu maisia, kigu herieki ga kimuiki gu kehezupai de, reca paiki nah ratakbam taiga nna kebamde, pe riadung, nah penui tadung ziemne maniadung pelane. Aidungde teu eh daige tei maisia bambi, penui teibi maisia. 27 Aaron nah pe napeimedung Gershon leuhme hetadung leune ranglia beu maisia, mapelane penui punggwang pungmie kebam ga, nah penui tadung leune ga. Penui pungkera pütdung leune nnui penuide nlumbeu maisia. 28 Paiki de ziemne Gershon pautsa leuhme hetatei kera aipau deda. Cingkupei Aaron napei Ithamar de peu penui ta ga penuide teuswa lu maisia.

29 Nnui Merari leuhme de penui pautsadung gade peilu maisia, nah penui paume kelakdung gade, 30 mmi camrei gade nah penreume mmi riakngei kecang. Hemaa ga ncüt eh kengkwa paiki ga heta tei kerame pelane de peilu. 31 Aide penui pungkera püt da nah penui ta da kengkwa paiki de ziemne penui ta leune ga heta teikera. Penui reca paiki perak de pie teune lu maisia, pehekangdung, hetsiadung, nah kemtokdung, 32 reca paiki twagwa kebam kigu hetsiadung de si eh, cide kemtokdung, pegwakdung, nah penui gu heriadung, penui gu mania leune. Hezi gade raulu penui pung maikesia dungde. 33 Aide Merari pautsame leuhdung tei kera tadung da, kengkwa paiki ziemne penui daipai teimai sia bi kecu, cingkupei Aaron napei Ithamar saulia kebeu kangga de."

34 Moses penai Aaron nah hemaabe gu muiteume Kohath leuhme de peilu penui paume kelakdung pautsa gade. 35 Penui mmi camrei gade nah penreume mmi riakngei kecang de peilu. Penui mileune de peilu hemaa ga ncüt kerame de kengkwa paiki ga hetatei kerane. 36 Penui mipeidung 2,750 penui pautsa gade peilu. 37 Aide Kohathme kengkwa paiki ga heta tei kera hezirau kelu pelane da. RAMPAUBE Moses da aja kaikebeu ria gade Moses penai Aaron penuide peilu.

38 Gershon leuhme de penui pautsadung gade peilu, penui paume kelakdung gade, 39 mmi camrei gade mmi riakngei kecang, keheibe de hemaabe ga ncüt eh kengkwa paiki ga hetatei keramedung. 40 Mipei pelane, penui pautsa nah penui paume kelakdung gade peilu, pumpei 2,630. 41 Moses penai Aaron Gershon leuhme pautsadung kengkwa paiki ga heta tei kerame de peilu. Aide tei kecudau, Moses da RAMPAUBE ne penuide tei lulo aja kaikebeu de mzailu.

42 Merari leuhme de penui pautsa ga penui paume kelakdung gade peilu, 43 mmi camrei gade mmi riakngei kecang, keheibe de hemaabe ga ncüt eh kengkwa paiki ga heta tei keramedung. 44 Mipei pelane, penui pautsa gade nah penui paume kelakdung gade peilu, pumpei 3,200. 45 Moses penai Aaron mipei aidungde de peilu, Merari leuhmedung. Aide tei kegai, Moses da RAMPAUBE ne penuide tei lulo aja kaikebeu de mzailu.

46 Cine Moses, Aaron, nah Israel muiteumedung Levime pelane penui pautsa nah penui paume kelakdung gade peilu 47 mmi camrei gade mmi riakngei kecang. Penui reca paiki ga heta tei kerame pelane de peilu, nah mapung beu kerame nah kengkwa paiki ga maniadung pierengei kerame. 48 Penui mipei 8,580 peilu. 49 RAMPAUBE aja kaikebeu gade, Moses mina ketket kecu peilu, pecu daipai ta ga nlum pwapeu bambi kecu rehi gade pei gwang. Penui pungpwa kera ta nsam gade pa ketket de peilu. Aide teikegai gade, Moses da RAMPAUBE ne penuide tei lulo aja kaikebeu de mzailu.