1 Canaanme gwangpei Arad, Negev ga lungh kebambe, Israel Atharim lampui ga nbeuh gwangla lie kecu siulu ge, pa Israel de ngngwa regi nah penui kangge de tuilu. 2 Israel RAMPAUBE dage sampet gai nah rang eh, "Nang anuide mina aidung de reu kengking peu liecai, iciucai anui penui namdidung teimsia ciak dizie." 3 RAMPAUBE Israelme kwa kingneilu nah pa Canaanme reu ngkienglu kera peu. Penui minadung nah penui namdidung ngkap ciak dedi. Heni cide de Hormah qu di.

4 Penui Hor Lamlwa gade tetpwa jaaidi kegie ga kegwang lampui gage tetgai Edom deu de tet tegwa kerane. Minadung lampui gade penui sui siasüt di. 5 Minadung Tinggwang penai Moses de mmau eh rang: "Daitei nang anuide Egypt gade ngngwa mpet no peu hetaideu gade tsai kera? Tangku gah, dui de gah, nah anui taktyei kemneu aide anui sui ma." 6 Pecai RAMPAUBE henei keradung minadung kakga ge langgai. Heneidung mina de nsau; mina kekiee ge tsaidi. 7 Minadung Moses da gwang eh pe dage ranggai, "Anui kemau tei dida kedanemene anui ncu nah RAMPAUBE de mmau eh rang kedine. RAMPAUBE dage pe ziemne kekie tei gailo heneidung de anui dade keu daidi kerane." Cine Moses minadung ziemne kekie teigai. 8 RAMPAUBE Moses dage ranggai, "Henei ge teilu nah tsingtie ge gage kailu. Mina keheibe de henei ne nsau kedime ringlu zie, pa cide piegai liecai." 9 Cine Moses hetageu gu henei ge teilu delwe tsingtie ge gage cide kai. Henei mina keheibede de nsau kedi dau, magade pa hetageu gu henei de pie cai, pa ring lubui.✝

10 Ge Israelme mbeu jüja gwang nah Oboth gage ramzeuki teilu. 11 Penui Oboth gade tetkai nah hetaideu ga Iye Abarim naimiak kepetle Moab de kemcwa gage ramzeuki teilu. 12 Cika de penui tetkai dai nah Zered Langkie gage ramzeuki teilu. 13 Cika de penui tet jüja eh Arnon Reuki lule gimle ge ramzeuki teilu, cide Amoritme gu deurai gade hetaideu ga miecang kecu ga. Moab nah Amoritme kakga, Arnon Reuki ne herai. 14 Cide ziemne RAMPAUBE Reutak laisiudum ga rangla,

"Suphah ga Waheb, nah Arnon chabakdung,

15 chabakdung gu hetia de mie Ar namceu cang kebamde ga

nah Moab deurai de cang kebamde ga."

16 Cika de penui Beer ga gwanglu, tekwa cide gade RAMPAUBE Moses dage ranggai, "Minadung de hekwa ncüt lulo a ziemne penuide dui peu kerane."

17 Pecai Israelme lei aide tei:

"Duiring petlo, tekwa!

Cipau ha de lei teilo,

18 anui muiteume ne tekwa kui kecu ha,

hegwang namedung tekwa kekui,

hegwangme tuitie nah penui tuitiedung dene."

Ge hetaideu gade penui Mattanah ga gwanglu. 19 Mattanah gade penui Nahaliel ga gwanglu nah Nahaliel gade Bamoth ga gwanglu, 20 nah Bamoth gade Moab deu chabak ga. Cipau Pisgah lamlwa twang gade hetaideu de pie nghung gai.

21 Pecai Amoritme gwangpei Sihon dage Israelme ne samgwame de langgai, rang eh, 22 "Anui de peu n deu tetkah gwanglo. Anui nnui luhga mede kubetsi luh ga lüt lak. Anui n tekwadung gade dui de sak lak. Anui hegwangpei puidiki ga la zie n deurai de kahdi kemaktane." 23 Dede hegwangpei Sihon Israel de pe deurai kahgwang kera peu tadi. Cimeliene Sihon pe reugwame pelane de qu hekwa lwe Israel de hetaideu gade gwaketang di. Pa Jahaz ga gwanglu, cika de Israel de ngngwa hereu tei. 24 Israel Sihon reugwame de kingtie keu eh regi nah pe deu Arnon gade Jabbok reuki kecang, Ammonme deu kemie kecang gumlu. Cu au Ammonme deurai de rie pwabam dida. 25 Israelme Amoritme namdidung pelane keulu da nah cidung pelane ga lungh dida, Heshbon de si eh nah renamdung pelane. 26 Heshbon au Amoritme hegwangpei Sihon namdi, Moab gwangpei kehegwabe de ngngwa regi kecube pei. Sihon pe deu pelane pe deurai lungga kebam Arnon reuki ga kecang. 27 Cide ziemne macisam ga kerangmedung rangla,

"Heshbon ga gwanglu.

Sihon namdi de retak dai nah yidai kelube teilo.

28 Mi ge Heshbon gade heu pet,

miheu ge Sihon namdi gade

cide ne Moab ga Ar de teimsia di,

nah Arnon ga heni kehudung mpaumedung.

29 Co nnui au tei lubui da, Moab!

Nnui ngkap dida, Chemosh minadung.

Pa pe napeidung de mbai kelame tei dida

nah pe napuimedung de Amoritme gwangpei Sihon baang tei dida.

30 Dede cu au anui Sihon reu ngkieng luda. Heshbon au ngkap dida Dibon kecang.

Anui penui reu ngkieng luda Nophah kecang,

cide Medeba cang bam."

31 Cine Israel Amoritme deu ga lungh ndeulu. 32 Pecai Moses minadung de Jazer pie kera langgai. Penui Amoritme cika kebamme de gwadi eh renamdung keulu.

33 Ge penui nreulu nah Bashan lampui le miedi. Og Bashan hegwangpei penuide mmau eh pa nah pe reugwame pelane Edrei gade penuide regi kera miedi. 34 Ge RAMPAUBE Moses dage rang, "Pecu hingso, kedanemene Ih nnuide pe reu, pe reugwame pelane nah pe deu reu ngkienglu kera peu dida. Pe dage tei gailo nang Amoritme hegwangpei, Heshbon ga lungh kebam Sihon dage tei kegai nzwa." 35 Cine penui pecu teitsetdi, pe napeidung, nah pe reugwame pelane, pe minadung de teitset ciakdi kemaktane. Iciu eh penui pe deu gumlu.