1 RAMPAUBE Moses penai Aaron de mpau, rang eh, 2 "Aide au hezai ge, hezai Ih nnuide aja kai kebeu ge: Israelme de rangbeu eh penuide peu hetumna kegie ge pe kemnei gah mede zamra di kemakpe teugwang maisia lie beulu, nah madaude ngwanggai pungkemak ge. 3 Hetumpuina cide de cingkupei Eleazar de peulu. Pa cide paiki hegwale teupet lu eh mige de peu pe dwa gade gi maisia. 4 Cingkube Eleazar cipau jai de pe zurang le keulu eh nah paiki dwa lebie ge pia hena kezin gai zie. 5 Cingkube kedame ge hetumpuina Eleazar kebam gade ru dizie. Pa cide gu pegeu, peteih, nah pejai gage peteu de ncüt eh ru di maisia. 6 Cingkube cedar tsing, hyssop, na heria kegie ge keulu eh hetumpuina de rubam kecu ga heling gai maisia.✝ 7 Pecai pa pe paini heta di nah duipia di maisia. Iciu eh pa paiki ga nlüt luzie, cikade pa ting hegi kecang renet gade mci mene bam dizie. 8 Hetumna de ru kedibe de pe painidung dui gade heta nah duipia di maisia. Pa tinghegi kecang renet gade mci mene bamzie. 9 Mige renet gade mci bam cume ge hetumpuina gu mimüt de pwa hekwalu eh nah paiki hegwale mci kebam bam gage kaidi maisia. Aipau mimütdung de Israelme hemaabe ziemne kainzeu maisia. Penui mimüt cide dui gage kai ncüt lu eh kemau gade tei kemci zai tei kerane, mimüt cide kemau ratak gu kecu ziemne.✝ 10 Mina be hetumpuina gu mimüt pwa hekwa kecube de pe paini heta di maisia. Pa renet gade ting hegi kecang mci lak. Aide Israelme ziemne hezai teili gaikelak zai ge zie nah sangme penuide ngngwa lungh kebamme de.

11 Mina caucau ketsaipau de tung dibi cipaume lang henane ge renet gade mci lak. 12 Cipaume lang pekecum benai nah lang henane benai pekatei pecu teimci di maisia. Cipaucai pa mci dizie. Dede magade pa lang pekecum benai pecu teimci mecai, iciucai lang henane benai pa mci gailak. 13 Mikeheibe de ketsaipau de tungdi, mina pumteih tsai kedibe de, nah pekatei pecu teimci lu mecai, cipaube RAMPAUBE gu paiki de teihera dida. Cipau de Israelmena lie qu silak kedanemene tei kemci dui pereu gage kezin gai kemakne. Pa hera bam dizie; kehera de peda lamui dizie.

14 Hezai aide paiki gade tsaidi kedime ziemne. Mi pekiene paiki ga kelüt me nah paiki ga kebamme lang henane ge mci mene bam dizie. 15 Paiki ga mabung pegum kegabe leune de hera kecu tei dizie. 16 Cide siakte keheibe de ketsaipau kingtie gade tsai kedime ge de tungcai, ketsaipau keheibe liede, mina rah, mede herau ge tungcai, cipaume ge lang henane ge hera dizie. 17 Aide nang mci kemakme ge de tei beulu: Kemau reca mimüt ru kenzeu de keulu nah li ge gage kemci dui penai kerui ncüt lu. 18 Mige mci kebamme ge iciu eh hyssop keulu maisia, dui gage mpung lu, nah paiki gage kezin gailu, cika mabung kebam pekiene ga, mina cika kebamme de, nah pera tung kedime ge de, teitset kedime ge de, tsai kedime ge de, mede herau tung kedi mede de. 19 Lang cumne benai nah lang henane benai, mci kebamme gene mci kemakme ge de kezin gai zie. Lang henane benai mci kemakme ge pekatei pecu ratak tei kemci zai teizie. Pa pepai peni hui mci dizie nah dui pia dizie. Tinghegi dicai pa mci dizie.✝

20 Dede mige mcimene bam cai, pekatei pecu teimci laklie dicai, cipaume de heleuhbe gade langgi dizie, kedanemene cipaude ne RAMPAUBE gu paiki tei heradi de lugu. Mcikemak ziemne dui le pecu kezin gai kemak nzwa eh; pa mcimene bam dizie. 21 Hezai aide teilu eh teidai dai kecube ge zie aikenzwa dau kecudau. Ratak dui kehera gage kezin gai kecu mege pe paini heta di maisia. Cauge mci mene dui cide tung dibi tinghegi kemaktane hera bam dizie. 22 Hera kecumege keheibe tung cai hera dizie. Tung hera kedi reuga mige tung daicai cipaume ge hera bam dizie ting hegi gwang kemaktane."