1 Cu aide Aaron penai Moses leuhme caiha RAMPAUBE Moses de ngngwa Sinai Deutu gade kempau kecudau. 2 Aaron napeime zidung cai neraibe Nadab, nah Abihu, Eleazar, nah Ithamar. 3 Aidungde Aaron napeimedung zi, keniak kelu cingkumedung nah kedet kelumedung cingku ta tei kerane. 4 Dede Nadab penai Abihu Sinai hetaideu gade luugai kelak mi reca RAMPAUBE de kepeu dau penai pe dwaga de tsai kauzeu di. Nadab penai Abihu pename ga, cine Eleazar penai Ithamar rünne penai pei Aaron de ngngwa cingku ta tei.

5 RAMPAUBE Moses de mpau. Pa rang eh, 6 "Levi leuhme de ngngwa gwanglu nah penuide Aaron cingkupei dage kailu penuide peu pecu ngha lu kera ziemne. 7 Penui kengkwa paiki dwa gade Aaron nah tingbungme pelane keleu gade batadung teizie. Penui paiki recabam ga heta teizie. 8 Penui kengkwa paiki ga mania leune pie rengei zie, nah penui Israel leuhme de kengha eh reca paiki ngkwa gwa teizie. 9 Nang Levime de Aaron nah pe napeimedung de peudi maisia. Penuide kaiciak pwa pecu ngha eh Israelme de ngkwet kerane. 10 Nang Aaron nah pe napeimedung de cingkume kedetlu maisia, dede sangme keheibe de gwang nna kecume de teitset dizie."

11 RAMPAUBE Moses de mpau. Pa rang eh, 12 "Pielo, Ih Levime de Israelme kakga de keuteu dida. Ih aide tei kecu Israelme kakga de mna kelu mipeina neraibe ketket kecu keu kera mding gade. Levime agu dida. 13 Neraibe pelane agu. Ih Egyptme deu gade neraibe pelane de ketang kecu benai, Israel ga neraibe leune a katei aziemne keu ntsamlu, minadung nah makaune de. Penui au agu. Ih au RAMPAUBE."

14 RAMPAUBE Sinai hetaideu gade Moses de mpau. Pa rang eh, 15 "Levi leuhme kelak ketket kecu peilu, penui pautsadung gade. Mipeina leune kei ge cing nah ciswa cing kedime de peilu." 16 Moses penuide peilu, RAMPAUBE sam de mzui eh, pecu tei lulo aja kaikebeu siakte. 17 Levime napeimedung zi cai Gershon, Kohath, nah Merari. 18 Gershon napeime dade kegwang pautsadung cai Libni nah Shimei. 19 Kohath napeime dade kegwang pautsadung cai Amram, Izhar, Hebron nah Uzziel. 20 Merari napeime dade kegwang pautsadung cai Mahli nah Mushi. Aidungde Levime pautsadung, pautsa ge gade pautsa ge rau lu.

21 Gershon dade Libnitme nah Shimeitme pautsadung gwang. Aidungde Gershonme pautsadung. 22 Mipeinadung kei ge cing nah ciswa cing kedime pelane de peilu, pelane ge 7,500. 23 Gershonme pautsadung reca paiki naimiak kenlütle tule ge ramzeuki tei zie. 24 Lael napei Eliasaph de peu Gershon leuhme pautsadung muiteu tei zie. 25 Gershon kilungme de peu kengkwa paiki reca paiki de si eh pie rengei zie. Paiki cide kehezui nah kengkwa paiki kimui ga kehezu pai teu kecude penui pie rengei zie. 26 Penui pie rengei zie kigu kehezudung, kigu kenlüt ga kehezu paidung, kemci ni nah recabam twagwa pung kebam kigu. Kengkwa paiki heriadung nah cika kebam leune penui pie rengei zie.

27 Pautsa aidungde Kohath gade gwang: Amramme pautsa, Izharme pautsa, Hebronme pautsa, nah Uzzielme pautsa. Pautsa aidungde Kohath leuhme. 28 Mipeina kei ge cing nah ciswa cing kedime 8,600 peilu kemci ni gu niadung pie rengei kerane. 29 Kohath pautsadung reca paiki tingbangle tu ge ramzeuki teizie. 30 Uzziel napei Elizaphan Kohathme pautsadung gu muiteu teizie. 31 Penui samkakbung, taktyeibam, mitaubungbam, recabamdung, penui reca tingdau kemci niadung teu kelabe, kehezupai, nah bata leune cika twagwa kebamdung pie rengei zie. 32 Aaron napei Eleazar cingkube Levime reu muiteu tei kelame reu muiteu teizie. Kemci ni pie rengei kelame de pa heta saulia zie.

33 Pautsa kena Merari dade gwang: Mahlime pautsa penai Mushitme pautsa. Pautsa aidungde Merari kilungme gade gwang. 34 Mipeinadung pe teilung kei ge cing nah ciswa cing kedime 6,200 peilu. 35 Merari pautsadung de Abihail napei Zuriel ne teuswa zie. Penui reca paiki tingpeule tuge ramzeuki teizie. 36 Merari leuhme pie rengei maisia reca paiki radung, pehekangdung, petsiadung, pesingkamdung, mania leune nah penui teu maikesia leune, 37 kigu hesumtsiadung de si eh nah hetsiadung reca paiki twagwa kebam, kemtokdung, pegwakdung nah heriadung de si.

38 Moses penai Aaron nah pe napeimedung naimiak kepetle bie tu ge ramzeuki teizie, kengkwa paiki dwa gage, naimiak kepetle ge. Kemci ni ga heta nlumkebeu nah Israelmena da nlumkebeu heta teicanglu kera au penui nsam. Sangme keheibe de kemci ni ga kegwangme de teitset dizie. 39 Moses penai Aaron Levime pautsa mipeina kei ge cing nah ciswa cing kedime pelane peilu, RAMPAUBE aja kaikebeu siakte. Penui mipei cang ngkaiekena peilu.

40 RAMPAUBE Moses dage rang, "Israelme mipeinadung neraibe penui teilung kei ge cing nah ciswa cing kedime de pei ciaklu. Penui zidung raulu. 41 Nang Levime de a ziemne keulu maisia, Ih RAMPAUBE, Israelme neraibe pelane nding gade, nah Levime kauruine de Israel leuhme kauruine mciu kelu raitube mding gade." 42 Moses Israelme neraibe pelane de peilu RAMPAUBE pecu tei lulo aja kaikebeu nzwa eh. 43 Pa mipeina neraibe pelane de pezi rehi gade peilu, pe teilung kei ge cing nah ciswa cing kedime. Pa mina 22,273 peilu.

44 RAMPAUBE Moses de mpau dai, rang eh, 45 "Israelme kakgade neraibe pelane mding gade Levime de keulu, nah minadung kauruine mding gade Levime kauruine keulu. Levime agu, Ih RAMPAUBE. 46 Nang shekel mengei hekwalu maisia Israelmena neraibe 273 hangge ge kecu Levime swa pumpei twakedi me de rilu kera ziemne. 47 Nnui kemci ni ga perüt keteu rehi gade shekel keu zie. Shekel ge gerah ngkai pe nsamkap. 48 Nnui rilu kera mi pwa Aaron nah pe namedung de peu maisia." 49 Cine Moses rilu kera pemi kepeu de hekwalu Levime ne ri kelume pumpei twa kedime dade. 50 Moses Isrealmena neraibe dade rangkang hekwalu. Pa 1,365 shekel hekwalu, kemci ni shekel le perüt mdetlu. 51 Moses ri kelu rangkang pwa Aaron nah pe napeimedung de peudi. RAMPAUBE Moses de tei lulo aja kaikebeu leune pa teilu, RAMPAUBE pe dage aja kaikebeu nzwa.