1 इस्राएलवाले माअहें मिसर देसोम रोत निंहील्याहा जेदिहीं तिन मोयना ओवा, तेदिहीं ते सिनायोअ जंगलो मेहें आये.✝19:1 गणती 33:15 2 आन जेहेलाम ते रफीदीम रोत सिनायोअ जंगलो मेहें आये, ताहां इस्राएलवाला जंगलोमेहें पोड़ावू कोअयू; 3 ताहरुउ मोशे डोगो पोअ देवोअ जागे सोढ़ीत लागू,

आन यहोवा डोगोपोअ रोत तियाहा आअड़ीत कोयो, "याकोबोअ घराणाहा एहें को, आन इस्राएलोहो माआ ओं वसन कोत आप: 4 तुमू देख्योहो के मी मिसर वालाअरी कि कि कोअयोहो; तुमुहूं आंय मोरागाआ फाकापोअ बोहाड़ीत कोइत माआ जागे लेत आयुहू.✝19:4 कायदा 32:11; यश 63:9 5 तिहींज वाअहीं ओमे जर तुमू माआ गोठ कान देत उनाअहा, आन माआ नियम पालन कोअहा; ताहां आखा माअहूंम रोत तुमूज माआ खास सोको देस ठरहा; आखी कोल ते माआ होय.✝19:5 कायदा 4:20; 7:6; 10:10; 26:18; तित 2:14 6 आन तुमू माआ नजरेमेहें पुंजाराआ राज आन सोका देस बोणहा. जे गोठी ताहूं इस्राएलोहो कोअलोअ होय, ते एज होय."✝19:6 1 पेत्र 2:9; प्रगटी 1:6; 5:10 7 ताहां मोशे आवीत कोइत डाया माट्योहों हाद्या, आन ए आखी गोठी, जियांहां कोअलाआ आदेश यहोवा तियाहा आप्युतो, तियांहां समजाड़ी देदी. 8 आन आखा माट्यों मिलीत एकवार्‍याज उत्तर आप्यो, "जों किबी यहोवा देवे कोयोहो तों आखो आमू कोअहूं." माअहोंअ ए गोठी मोशे यहोवाहा उनावयी.✝19:8 यहो 24:14

9 ताहां यहोवा मोशेहे कोयो, "उनाआ, आंय काल्ला वाद्लाआ आंदाराम रोत ओत कोइत ताआ जागे आवोहो, याअकाजे के जेहेलाम आंय ताअरी गोठी कोअहीं ताहां ते माअहें उनाय, आन हादाफल तापोअ विश्वास कोए." आन मोशे यहोवाहा माअहोंअ गोठी कोताप्यी. 10 ताहां यहोवा मोशेहे कोयो, "तु माअहोंअ जागे जा आन तियांहां आज आन हांदाआ सोताहा सोके ओवे तेहें को, आन तें तियांआं आंगड़े तुवीत लेअहूं जोवे, 11 आन तें तिसरे दिही जांआं तियार ओत जाअहूं जोवे; काहाके तिसरे दिही यहोवा आखा माहुंउं डोए देखताइज सिनाय डोगोपोअ उतरीत आवे. 12 आन तु माहुंउं काजे शारी वोगेहे वाड़ बांदी देजी, आन तियांहां कोजी के कोडोज डोगोपोअ ने सोड़ुहूं जोवे आन तियाआ हिवेहें बी ने टेकुहूं जोवे; आन जों कोडो डोगोहो टेके तियाहा मोतोअ डोंड जोड़े.✝19:12 12:20 13 तियाहा कोडोज आथ ने लागाड़ुहूं जोवे; जों आथ लागाड़े, तों डोणोवाअहीं नेत बिलखा वाअहीं मोए; जनवारे ओय नेत माहुंउं, तों जिवतो ने मिकीइलो. जेहेलाम वोडा आवाजोवाली मेडाआ हिंगोअ तुरीइ शब्द हांहतोहो जाआं होंबलाय, ताहां माअहें डोगोअ जागे आवुहूं जोवे."

14 ताहां मोशे डोगोपोअ रोत उतरीत कोइत माअहुंउं जागे आवीत कोइत तियांहां सोके कोआड़्ये; आन तियां सोताआ आंगड़े तुवीत लेदे. 15 आन मोशे कोयो, "तिसरे दिहे जाआं तियार ओत जाजा; बोईंइ जागे मा जाहा."

16 जेहेलाम तिसरु दिही आयू, ताहां हुजताज वाआ वादलो गाज्यो आन विजलो वोल्यो, आन डोगोपोअ कालु सावलू आवीत लागू, फाशुउ तुरीइ वोडा शब्दाआ आवाज ओवू, आन पोड़ावा मेऱ्येए जेतेहे माअहें ओते तें आखे बित गोये. 17 ताहां मोशे माअहोंहों देवोहो मिले तेहें काजे पोड़ावाम रोत काडीत लेत गोयु; आन तें डोगोअ थुड़ोअहीं उबे रोये.✝19:17 कायदा 4:10 18 आन यहोवा जो आगीम रोत ओत कोइत सिनाय डोगोपोअ उतऱ्युतो, देव डोगोम रोत उतरीइल्यु कोत आखु डोगोअ तुमाणा वाअहीं टापाइत गोयु; आन तों तुमाणो दावाड़ाआ होस तुमाअतोतो, आन डोगोअ जाअखीलुहू कापतुतो. 19 आन जेहेलाम तुरीइ आवाज वोडु वोडु वादतू गोयु, ताहां मोशे गोग्यू, आन देवो आवाज उनाइत कोइत तियाहा उत्तर आप्यो. 20 आन यहोवा सिनाय डोगोअ सुटीपोअ रोत निसे उतऱ्यु; आन मोशेहे डोगोअ सुटीपोअ हाद्यू, आन मोशे डोगोपोअ सोड़ीत लागू. 21 ताहां यहोवा मोशेहे कोयो, "निसे उतरीत कोइत माअहुंहूं कोत देखाड़, एहलोहो ने ओवुहूं जोवे के वाड़ तोड़ीत कोइत यहोवाहा पालीइलोअ काजे आवे, आन तियांम रोत वार जोएं मोईत जाय. 22 आन पुंजारा जे यहोवाआ आगाड़ी आया कोअताहा ते बी सोताहा सोका ओवुहूं जोवे, एहेलोह ने ओवुहूं जोवे के यहोवा तियांहां डोंड आपे."

23 मोशे यहोवाहा कोयो, "तें माअहें सिनाय डोगोपोअ नाहां सोड़ीत सेकते; काहाके तुमे आमुहूं ओं कोत देखाड़्योहो के डोगोअ शारी वोलेहे वाड़ बांदीत कोइत तियाहा सोको मिका."

24 यहोवा तियाहा कोयो, "उतरीत जा, आन आरोनोहों लेतुज उसे आव; पोन पुंजारा नेत कोड्लाज माअहुंहूं इंहीं मा लेत आवही, एहेलोहो ने ओवुहूं जोवे के यहोवा तियांहां डोंड आपे." 25 ताहां ए गोठी मोशे डोगोपोअ रोत उतरीत कोइत माअहुंउं जागे आवित तियांहां कोयी.