Êxodo 2

मोशेए जल्म

1 लेवीइ पारवाड़ीमेहें एक माट्ये एकी लेवी पारवाड़ीइ बोईंइरी वेहेवाल कोइत लेदो. 2 ते बोईं पोटाअरी ओवी आन तियीइ एक सोऊ ओवू; ओ पोर्‍यू बाहरी एतुज होय ओं देखीत, तियी तियाहा तिन मोयना जाआं निकाड़ीत मेक्यो.✝2:2 प्रेशित 7:20; इब्री 11:23 3 पोन ते तियाहा हांहतिही जाआं निकाड़ीत ने सेक्यी, ताहां तियाआ काजे ते दुंग्लाआ एक टोपली बोणावीत तियीही मांयते आन बारथे डांबऱ्या वाअहीं निपी देदी. आन तिहींमेहें पोऱ्याहा मिकीत कोइत नील नोयीइ मेरेपोअ उसा खोड़ोमेहें मिकीत आयी. 4 तिया पोऱ्याअ बोअह्ही सेटेज रोत की ओवेहे तो पालीइलो काजेहे उबी रोयी.

5 ताहां फारोअ पोऱ्यी नील नोयीइ मेरे उंगली आवयी. तियीइ पावरी पोऱ्यी नोयीइ मेरे फिऱ्या कोअतीते. ताहां तियी उसा दुंग्लामेहें ते टोपली देख्यी आन तियीइ पावरीहीं ते टोपली लेत हाद्यी. 6 जाहां ते टोपली उगाड़ीत कोइत देख्यी, ताहां एक रोड़त्लोज पोऱ्यो देख्यो, ताहां तियीही कीइमाय आयी आन तियी कोयो, "ओं तोम एखा इब्रीइ पोर्‍यू ओय."

7 ताहां तिया पोऱ्याअ बोअह्हीं फारोअ बेटिह्हीही कोयो, "आंय जात कोइत या पोऱ्याहा बुजी पिवाड़ीत सेके एहेलिही एखू इब्री बोईंहीं हादीत लेतावो के?"

8 फारोअ बेटिह्ही कोयो, "जा." ताहां ते पोऱ्यी जात कोइत तिया पोऱ्याअ आयहीही हादीत लेत आवयी. 9 फारोअ बेटिह्ही तियीही कोयो, "तु या पोऱ्याहा लेत जात कोइत माआ काजे बुजी पिवाड़्या कोअजी, आन आंय ताहूं मोजरी आपिहीं." ताहां ते बोईं तिया पोऱ्याहा लेत जात कोइत बुजी पिवाड़ी वोल्यी. 10 जेहेलाम पोऱ्यो वोडो ओत गोयो ताहां तियी फारो राजाअ बेटिह्हीइ जागे लेत गोयी, आन तो तियीइ बेटुह्हू बोण्यू; आन तियी एहें कोत कोइत तियाआ नाव मोशे मेक्यो, "मी याहा पाअयोंम रोत काड्युतो."

मोशेए मिद्यान देसोम नाहींइलोअ

11 जाहां मोशे जुवान ओत गोयू, तिया दिहोमेहें बारथे तियाआ पाव्हीइलाआ जागे जात कोइत तियांआं तारास देखु वोल्यू; ताहां तिये देख्यो के एक मिसरवालू एका इब्री माट्योहो देहे.✝2:11 इब्री 11:24; प्रेशित 7:23-28 12 तिये एहें-तेहें पाल्यो के कोडोज नाहां, ताहां तिया मिसरवालाहा माइत टाक्यू आन रेटामेहें निकाड़ी देदू.

13 फाशुउ बिहीरे दिहे बाअथे जात कोइत पाल्यो के बेन इब्री पाही तियां तियांआंज सुलाअताहा. ताहां तिये पाप्योहो कोयो, "तु ताआ पायहोहो काहा देहे?"

14 तिये कोयो, "कोडे ताहूं आमापोअ आधिकारी आन न्यायाधिश कोअयुहू? जेहें कोइत तिया मिसरवालाहा माइत टाक्यु, तेहेंज कोइत माहूं बी माअहूं होदेहे के?" ताहां मोशे ओ विसार कोइत बित गोयू, "खोरीज ते गोठ खुल्ली ओत गोयीही." 15 जाहां फारो ए गोठ उनाअयू ताहां तो मोशेहे माअहूं कोअतुतो.

पोन मोशे फारोअ सामने रोत नाठू; आन मिद्यान देसोम जात कोइत रोनु वोल्यू; आन तो तिहीं एकी वेईइ जागे जात कोइत बोहीत गोयू.✝2:15 प्रेशित 7:29; इब्री 11:27 16 मिद्यान देसोअ पुंजाराआ हांत बेटिह्ही ओती; आन ते तिहीं आवीत कोइत पाईं काडी वोल्यी, ते तियींइं आब्हाआ मेडे-बोकड़े पाईं पियतेहें कोड्बामेहें पाईं पोई वोल्यी. 17 ताहां सारवाली आवीत कोइत तियींहीं सेटे कोआ वोल्या; तिहीं वाअहीं मोशे उबू रोत कोइत तियींहीं मदत कोअयी, आन मेडा-बोकड़ाहां पाईं पिवाड़्यो. 18 जाहां ते तियींइं आब्हा रूएलोअ जागे पोत्यी, ताहां तिये तियींहीं फुश्यो, "आज केहें एती वेगी फिरीत आवयीही."

19 तियीं कोयो, "एके मिसरवाले माट्ये आमुहूं सारवाल्योंअ आथे रोत वासाड़्यी, आन आमाआ काजे जाअखीलोह पाईं पोइत कोइत मेडा-बोकड़ाहां पिवाड़्यो,"

20 ताहां तिये तियाआ बेटिह्हीहीं कोयो, "तो माटी का होय? तुमू तियाहा का सोड़ी देत आयीही? तियाहा रोटू खायतेहें हादीत लेतावा,"

21 आन मोशे तिया माट्योअरी रोअलाआ तियार ओवू. तिये तियाअरी सोताआ बेटिह्ही सिप्पोराअ वेहेवाल कोइत आप्यो. 22 तियाआ एक बेटुह्हू उबज्यु, ताहां मोशे एहें कोत कोइत तियाआ नाव गेर्शोम*2:22 गेर्शोम मोन्ज्ये तिहीं पारकू ओतू, काडी देवाय. मेक्यो, "आंय यी जागेहे पारकू होय."

23 वारुज वोरह्ये सेके तेहेलाम मिसरोअ राजा मोइत गोयू. इस्राएलोअ माअहें कठीण तारासो वाअहीं काहें वोल्ये आन हाद कोए वोल्ये, आन तियांआं प्रार्थना जे कठीण तारासोअ वाखरी ओवी ते देवोअ जागे पोती. 24 देवे तियांआं काहींइलोअ उनात कोइत तियाआ शप्पतेहे, जे तिये अब्राहाम, इसाहाक आन याकोबोअरी खादी ते ओर कोअयी.✝2:24 उत्प 15:13-14 25 आन देवे इस्राएल माअहोंअ दशा देखीत कोइत तियांपोअ नजर टाक्यी.