1 अब्राहाम मम्रेए सोका साड़ोअ विसमेहें तिया दिहोअ होमसे तोंबाआ बाअपुरे बोहीत रोयुतो, ताहां यहोवा तियाहा दर्शन आप्यो: 2 तिये नजर टाकित पाल्यो ताहां, तियाहा तिन माटी तियाआ सामने उबा रोल्या देख्या.✝18:2 इब्री 13:2 ताहां तो तियांहां मिलीइलोअ कोअते पोड़ावाम रोत निहीत गुगद्यु, आन पुयींपोअ टुंगू पोड़ीत वोंदीत कोइत कोनु वोल्यू, 3 "प्रभु, जर मापोअ तुमाआं मेरवानी ओय ताहां तुमाआ सेवकोअ जागे रोत मा जाहा एहलीही आंय रावणी कोअहो. 4 जाराक पाईं लेतावोहो आन तुमू गुडा तुवीत कोइत या साड़ोअ थुड़ी आराम कोआ ताअहूं. 5 आंय रोटू लेतावोहो, आन तुमू लागे तेतुहू खाजान ताहराआ आगाड़ी जाजा." तियां कोयो, "ताहरुउ तेहेंज कोएएमे."

6 ताहरुउ अब्राहाम तावणी कोइत पोड़ावाम गोयुन साराहा कोयो, "दोह किलो लोट केलवोअ, आन रोटू बोणाव." 7 फाशुउ अब्राहाम डोगरान-बोकड़ाआ गोवाराम गुगद्यु आन एक मात्लो आन हाज्जोहो बासो लेत कोइत तियाआ पावरोहो तावणी कोइत पाजो बोणावे तेहें काजे आप्यो. 8 ताहां तिये गुल्ल्योन दुदेन खाटो दुद आन रांदाड़ल्यो माहां लेतावीत तियांआं आगाड़ी वाटी देदो आन ते खाना वोल्या; आन तो तिहींज साड़ोअ थुडी तियांआं जागे उबू रोयू.

9 तियां तियाहा फुश्यो, "ताआ लाडी सारा का होय?" तिये कोयो, "ते पोड़ावामेहें होय."

10 तिये कोयो, "आंय नोव मोयनाआ फासाड़ी नक्की ताआ जागे फाशुउ आविहीं, आन ताआ लाडी साराहा एक पोर्‍यू उब्जे." अब्राहामोअ फासाड़ीइ वोल सारा पोड़ावाआ बाओअहीं उनाअतीते. 11 अब्राहाम आन सारा बेनू जाअखीलेहे डाये ओत गोयेते; आन साराआ मासिक पाड़ी बोंद ओत गोयीते. 12 तियाहा काजे सारा मोनोम ओंहींत कोइत कोनी वोल्यी, "आंय ते डायी ओत गोयीही, आन माआ माटी*18:12 माटी मालिख बी डायु होय, ताहां माहूं ए खुसी केहें कोइत जोड़े?"✝18:12 1 पेत्र 3:6

13 ताहां यहोवा देव अब्राहामोहो कोयो, "सारा, आंय एती डायी ओत गोयीही, हुदाअलीज माहूं पोर्‍यू ओवे के एहें कोत कोइत काहा ओंहयीं? 14 यहोवा देवोअ काजे कोड्लो बी काम कोठीण होय के?✝18:14 मत्तय 19:26; मार्क 10:27; लुक 1:37 आवते साल ठरवीइल्यी वेलेम आंय फाशुउ ताआ जागे आविहीं, आन सारापोअ सोऊ रोय.✝18:14 रोम 9:9 "

15 ताहरीइ सारा बित गोयी आन एहें कोत कोइत बोदलीत पोड़्यी, "आंय नाहां ओंहयीं." तिये कोयो, "नाहां, तु ओंहयींते."

16 ताहराअ ते माटी तिहीं रोत जाना वोल्या आन सदोमोअहें नजर टाक्यी; आन अब्राहाम तियांहां वाटे लागीइलोअ काजे तियांअरी थोड़ेक जाआं गोयु. 17 ताहां यहोवा देवे कोयो, "ओं जो आंय कोअहो, याहा केहें अब्राहामोप रोत निकाड़ीत मिको के? 18 अब्राहामोप रोत ते खोरीज एक वोडू आन सेक्तीमान देस बोणे, आन धरतीइ आखा देसोहो तिया वाअहीं आशिर्वाद जोड़े.✝18:18 उत्प 12:3; प्रेशित 3:25; गलाती 3:8 19 काहाके माहूं मुंदू होय के तो तियाआ पोर्‍याहां आन कुटुंबाहा, जें तियाआ फासाड़ी रोत साले तियांहां तो यहोवा देवोअ वाटेमेहें टिकीत रोय तेहें काजे आदेश आपुहूं जोवे, आन न्यायनिती वाअहीं सालीइलोअ काजे देवोअ वाट तोअहूं जोवे; काहाके जों किबी यहोवा देवे अब्राहामोअ बाप्तिम कोयोहो तों तो पुरो कोइत सेके."

20 फाशुउ यहोवा देवे कोयो, "सदोम आन गोमोराआ आअड़ापेकड़ू वादीत गोयुहू, आन तियांआं पाप जुदू वादीत गोयुहू; 21 तियाआ आअड़ापेकड़ू माआ कानोम जाआं पोतीत गोयुहू तियाहा काजे आंय उतरीत कोइत पालीहीं, खोरीज तियांआं काम तेहलोज होय के नाहां तों माहूं मुंदू जाय."

22 ताहराआ ते माटी तिहीं रोत वोलीत कोइत सदोमोअहें जाना वोल्या; पोन अब्राहाम यहोवा देवोअ आगाड़ी उबू रोत गोयु. 23 ताहरुउ अब्राहाम तियाआ आहने जात कोइत कोनु वोल्यू, "केहें तु हुदाअलीज पाप्योअरीज धर्मीहीं बी आरवी देही के? 24 जर तिया होयरोम पोन्नास धर्मी ओय; ताहां तियां पोन्नास धर्मीइ वाखरी तु हुदाअलीज तिया जागाहा ने सोड़ही पोन आरवीत टाकही के? 25 पाप्योअरीज धर्मीहीं बी माइत टाके एहेलोहो काम ताआ ने ओवुहूं जोवे, आन धर्मी आन पाप्योअ बेनुउं एकुज दशा रोय, ओं तावाअहीं ने ओवुहूं जोवे. आखी कोलीइ मालिख तु होय, आन तु वारुहूं न्याय कोअही ओं माहूं मुंदू होय."

26 यहोवा देवे कोयो, "जर माहूं सदोम होयरोमेहें पोन्नास माअहें धर्मी सापड़े, ताहां तियांआं वाखरी तिया पुरा जागाहा आंय सोड़ी देहीं."

27 अब्राहामे फाश्योअ कोयो, "प्रभु, उनाआ, आंय ते कादुउ आन खाआं होय; तेबी आंय माआ मालख्योअरी गोठी कोइलाआ हिम्मत कोअहो. 28 मानित ले, जर तियां पोन्नास धर्मीमेहें रोत पास कमी ओत जाय; ताहां केहें तु पासुज जोंओं कमी ओत जाय ताहां तिया पुरा होयरोहो आरवी देही के?" तिये कोयो, "जर माहूं तियामेहें पोन्शेशाड़ीस बी सापड़े, तेबी तियाहा ने आरवो."

29 अब्राहाम फाशुउ बी कोयो, "जर तिहीं सालिहीज सापड़्ये ताहां?" तिये कोयो, "ताहां आंय सालिही जोड़्ये तेबी ने आरवो."

30 फाशुउ अब्राहामे कोयो, "प्रभु, आंय फाशुउ थोड़ोक कोहीं ताहां खोत मा कोअही. जर तिहीं तीसुज सापड़े ताहां?" तिये कोयो, "जर माहूं तिहीं तीसुज बी सापड़े, तेबी एहेलोहो ने कोओ."

31 फाशुउ अब्राहामे कोयो, "प्रभु, पाल, आंय ताअरी गोठी कोइलोअ हिम्मत कोअयीही : केहेंनेत तिहीं विहुज सापड़े ताहां." तिये कोयो, "आंय विहुज ओय तेबी तियाहा ने आरवो."

32 अब्राहामे कोयो, "प्रभु, खोत मा कोअही, आंय एकुज वारी फाशुउ कोहीं: मानित ले, तिया गांवोंमेहें दोहूज माअहें सापड़े ताहां?" तिये कोयो, "आंय दोहोअ वाखरी बी तियाहा ने आरवो." 33 जाहां यहोवा अब्राहामोअरी गोठी कोइत लेदी, ताहरुउ जातु रोयू; ताहां अब्राहाम तियाआ कोओ वोलीत गोयु.