1 ताहरुउ अब्राहामे एक बिहीरी बोईंइरी वेहेवाल कोअयो. तियीइ नाव कतूरा ओतो. 2 तियीप रोत जिम्रान, योक्शान, मदान, मिद्यान, यिशबाक, आन शूह ए पोऱ्या ओवा. 3 योक्शानोप रोत शबा आन ददान उबज्या; आन ददानोअ पारवाड़ीमेहें अश्शूरी, लतूशी आन लुम्मी माअहें ओवे. 4 मिद्यानोअ पोर्‍या एफाह, एपेर, हानोक, अबीदा, आन एल्दा उबज्या. ए आखा कतूराआ पोर्‍या ओवा.

5 इसाहाकोहो ते अब्राहामे तियाआ आक्खो आपी देदो. 6 पोन अब्राहामे तियाआ उप-लाडहींइं पोर्‍याहां भेट आपीत कोइत तियाआ जिवताइज तियाआ पोर्‍यू इसाहाक, यापरोत उक्तामा देसोम मोकली देदा.

7 अब्राहामोअ पुरी वय एक होव पोन्शात्तर वोरह्ये ओवी. 8 अब्राहाम जाअखीलुहू डायु ओतू, आन तियाआ डायापणामेहें जिव निहीत गोयु आन तो तियाआ डायहांआं जागे जातु रोयू. 9 तियाआ पोर्‍या इसाहाक आन इस्माएल, हित्ती सोहारोअ पोर्‍यू एफ्रोन याआ उगताआ वोल मम्रेए सामनेवाला जागामेहें जिहीं मकपेलाआ कुपू ओतू, तिहीं तियाहा डाटी देदू. 10 जो जागु अब्राहामे हित्तीवालाप रोत वेसातु लेदुतो; तियाजमेहें अब्राहाम आन तियाआ लाडी सारा यां बेनुहूं ओजे पाड़्ये.✝25:10 उत्प 23:3-16 11 अब्राहाम मोयु तिहींइं फासाड़ी देवे तियाआ पोर्‍या इसाहाकोहो आशिर्वाद आप्यू; तेहलाम तो लेहाय-रोई नावोअ वेईइ जागे रोतुतो.

12 साराआ मिसरवाली उप-लाडी हाजिराआ पेटे अब्राहामोहो इस्माएल नावोअ पोर्‍यू ओवू, तियाआ ए पारवाड़ होय: 13 इस्माएलोअ पोर्‍या आन पारवाड़ ए होय: मोन्ज्ये इस्माएलोअ डायु पोर्‍यू नबायोत, तियाआ फासाड़ी केदार, अद्बेल, मिबसाम, 14 मिश्मा, दूमा, मस्सा, 15 हदाद, तेमा, यतूर, नापीश, आन केदमा 16 इस्माएलोअ पोर्‍या एज ओवा; आन यांआंज नावोअ पुरमाणे तियांआं गांव आन टोलाआ नावे बी पोड़्ये; आन जिवज्योअ कुटूंबाआ परमाणे एज बारा पुडारी बोण्या. 17 इस्माएलोअ पुरी वय एक होवेन सदोतीस वोरह्ये ओवी; ताहां तियाआ जिव निहीत गोयु आन तियाहा तियांआं डायहांअरी ओजी देदू. 18 तियाआ पारवाड़ हवीलाप रोत शूर जाआं जे मिसरोअ उगतामाआं वोल आश्शूरोअ वाटेमेहें होय, तिहीं वोहती कोइत रोयी; एहें कोइत तो तियाआ पायहोअ सामनेवाला भागोम जात कोइत रोयू.

19 अब्राहामोअ पोर्‍या इसाहाकोअ पारवाड़ ए होय: अब्राहामोप रोत इसाहाक ओवू; 20 आन इसाहाक सालिही वोरह्योअ ओवू तेहलाम तिये रिबीकाअरी वेहेवाल कोइत लेदो, जे पद्दन-अरामवाला अरामी बतूएलोअ पोर्‍यी आन अरामी लाबानोअ बोअह्हीं ओती. 21 इसाहाकोअ लाडी वांज्यी ओती, तियाहा काजे तिये तियाआ लाडीइ काजे यहोवाहा विनंती कोअयी; आन यहोवा तियाआ विनंती उनाअयू, ताहरीइ तियाआ लाडी रिबीका पोटाअरी ओवी. 22 तियीइ पोटामेहें बेन पोर्‍ये एकान एकाअरी सुलाए वोल्ये. ताहां रिबीका कोयो, "माआ जर एहेलीज दशा रोय, ताहां आंय कि कोइत जिवीहीं?" आन ते ओं कि होय कोत यहोवा देवोहो फुसी गोयी.

23 ताहां यहोवा देवे तियीही कोयो,

"ताआ पोटामेहें बेन बेन देस होय,

आन ताआ पेटे बेन पारवाड़ निहें,

बेन राजोअ माअहें आलाग आलाग ओवे;

आन एका राजोअ माअहें बिहीराप रोत वादार ताकतवाले रोय,

आन डायु बेटुह्हू हानीइलाआ सेवा कोए."✝25:23 रोम 9:12

24 जाहां तियीइ ओलवाइलोअ वेल आयी, ताहां की देखाअयो के तियीइ पोटामेहें जुड़वा पोर्‍या होय. 25 पेल्लुउ पोऱ्यु उबज्यु तो रातबाअलुहू ओतु आन तियाआ पुरो डिल कांबलाआ होस बुरावालो ओतो; तियाहा काजे तियाआ नाव एसाव*25:25 एसाव मोन्ज्ये रुंग्हाल मिकाअयो. 26 तिहींइं फासाड़ी तियाआ पाही उबज्यु, तियाआ आथोम एसावोअ खेटोव ओतू; आन ताहरोअ तियाआ नाव याकोब*25:26 याकोब मोन्ज्ये कोदरे वाअहीं बुउसीइनारु मिक्यो. जेहेलाम रिबीका तियांहां जल्म आप्यो तेहेलाम इसाहाक साट वोरह्योअ ओतू.

27 ताहराआ एसाव आन याकोब वोडा ओवता गोया, आन एसाव ते जंगलोम रोत कोइत हुशार पारद्यू बोण्यु, पोन याकोब सादो माअहुंउं ओतो आन तोंबामेहें रोया कोअतुतो. 28 एसाव लेतावत्लू तिया हावोजोअ माहां इसाहाक खात्लू कोत तियाहा तो गोमतुतो; पोन रिबीकाहा याकोब गोमतुतो.

29 एक दिही याकोब डाआ रांद्या कोअतुतो; आन एसाव जंगलोम रोत थाकीत आयू. 30 ताहां एसावे याकोबोहो कोयो, "माहूं फोअली रात्ली वस्तुमेहें रोत जारिक खाअहूं लाव, काहाके माहूं जाअखीलीही फुक लागीही!" तिहीं वाअहीं तियाआ नाव एदोम*25:30 एदोम मोन्ज्ये लाल बी पोड़्यो.

31 याकोबे कोयो, "पेल तु माहूं ताआ डायापणोअ आधिकार वेसी दे."

32 एसावे कोयो, "पाल, आंय ते ओमे मोअहूं कोअहो: या आधिकारोअ माआ की कामे?"

33 याकोबे कोयो, "माअरी ओमेज शप्पत खा," ताहां तिये तियाअरी शप्पत खादी, आन तियाआ डायु बेटुह्हू ओवीइलाअ आधिकार याकोबोहो वेसी देदू.✝25:33 इब्री 12:16 34 ताहरुउ याकोबे एसावोहो रोटू आन रांदल्यी मोसुरुउ डाआ आप्यी; आन तिये खादोन पिदो, आन उठीत कोइत जातु रोयू. एहेंकोइत एसावे तियाआ डायापणोअ आधिकार नाकारी देदू.