Lucas 7

Kuhobhelela kwa akolo bha linyemba lya ku Loma

1 Ayesu pabhakajomola kolongela genago goha nnogni ja bhandu, bhakajaula ku Kapelenaumu. 2 Konokwe kukibha na akolo bha lilubhalo lya manyemba makomi komi yakubhe bhakibha ntumichi jwabhe jwabhampalite muno. Jonojwe ntumichi hakibha ntamwa kubhandikila na kuwehe. 3 Bhenibhala akolo bha manyemba makomi komi pabhakajoa ngani ja Ayesu, bhakaatumanga hakanaota bhangi bha bhayaudi bhajaulange kwaajopa bhaike kunnamia ntumichi jwabhe. 4 Pabhakaika kwa Ayesu, bhakaajopa muno, bhakalobholanga, "Hojo mundu hipaalikwa bhajangatilwe, 5 Kwa maana bhatenda kwaapala bhandu bhitu, na bhena bhatekuchengela Nyuumba ja konganilanga."

6 Bahi, Ayesu bhakajaula pamo nabho. Pabhakabhandikila kuhika pa nyuumba ja bhenibhala akolo, bhenibha akolo bha lilubhalo bhakaatumanga akaaganja bhabhe kwalobholela Ayesu, "Hangwana, nkotokuchiabhua muno, maana mwenga mpaalikwahopo nnyingile mu nnyumba jangu. 7 Kwakubhe nangachibhona nenga namwene mbaalikwahopo hata kuhika kwaachinu. Nambo nnobhole tu lilobhe, na antumichi bhangu bhapakulama. 8 Kwakubhehe nenga kabhele nga mundu ndekubhe pahi ja mamulaka, na ndekola manyemba bhabhilinge pahi jangu bhabhajeketelanga chinaakongolelanga. Handa naalobholile bhamo, ‘Nnyabhule!’ nabhena bhatendakujaula, ndenda kwalobholela bhangi, ‘Nhike!’ nabhena bhatenda kuika, hata habhanda bhangu handa naalobholile, ‘Ntende henela!’ nabhena bhapakutenda."

9 Ayesu pabhakajoha malobhe genago, bhakakangacha, na bhena akalitendebhukila lyenilyela lilubhalo lya bhangu bhabhatendita kunkagula, na bhakaalobholelanga, "Na nangaabhona amundu bhabhabhile na imani ngolongwa handa jenjeni hata mu bhandu bha ku Isilaeli"

10 Bhenibhala bhandu bhabhakatumwanga kwa Ayesu pabhabhujanga pakaja pa bhenibhala akolo bhakaakolela bhenibhala antumichi bhalamite.