1 Solomɔn aduya yaa,

Bu siakaralate ne yele ɔ kya ne nyaŋee,

mɔna bu diyiŋte ne yele nombia ne takaa ɔ naa.

2 Wose kenyiŋ lee gbɛɛkum man be dana tɔnɔɔ ya,

mɔna gbɛɛneŋ katenee na lese walaŋ lee yeŋ man.

3 Degbeŋgyoo bee yele tanam ka ko ŋon ɔ gbɛɛneŋ tenɛɛ nɛ ya,

mɔna ɔ ne tɔ akpanyanyaŋte kegyaebii gbɛɛ.

4 Kebɔŋale nyiŋmaase ne fa diyem,

mɔna kakyeŋ nyiŋmaase ne yele walaŋ ne nyiŋ ɔ wose.

5 Ŋon ɔ ne yilaa weenɛɛ kekɛrɛɛtɛɛ nɛ yɛɛ bu siakaralate e,

mɔna ŋon ɔ ne doo weenɛɛ kekɛrɛɛtɛɛ nɛ na do ɔ wose desɛŋ.

6 Nyeebam ne kɔŋ ŋon ɔ gbɛɛneŋ tenɛɛ nɛ dɔɔ,

mɔna nombiakumɛɛ te wulu akpanyanyaŋte.

7 Bɛɛ mo ŋon ɔ gbɛɛneŋ tenɛɛ nɛ yele hiraa,

mɔna akpanyanyaŋte yele gyae ke yo.

8 Ŋon ɔ sia be karae ɔ konɔɔ man ne lɛɛ mmaraase do,

mɔna diyiŋte ŋon ɔ ne kpee nɛ waa wɔlɛɛ.

9 Ŋon nombiikum be doo ɔ kekyaabii man ya nɛ ne kyaa wɔe kefɛɛ man,

mɔna ŋon ɔ dɛɛtɛe be gɛɛse nɛ gyae ka lese e debɔɔ.

10 Ŋon ɔ ne gyɔ sia kpabee kpabee nɛ na mo kayeyɛɛ kɔŋ,

te diyiŋte ŋon ɔ ne kpee nɛ ne wɔlɛɛ.

11 Ŋon ɔ gbɛɛneŋ tenɛɛ nɔɔ yɛɛ nyeedoŋ detiribuŋ ke,

mɔna akpanyanyaŋte nɔɔ ne wuu nombiakumɛɛ.

12 Kekɔla ne putii kale,

mɔna kegyae ne wuu nombiakumɛɛ pou dɔɔ.

13 Nyansa doo ŋon ɔ ne nyii nombia man nɛ nɔɔman,

mɔna dambila kaboena diyiŋte maama man.

14 Siakaralate ne kyaŋ nombia kagyeŋ see,

mɔna diyiŋte nɔɔwoya na mo kewɔlɛɛ bo kɔŋ.

15 Kɔbate wosekenyiŋ yɛɛ ŋgba ɔ donɔɔ dinaa keŋ bɔɔ baŋ dekyaŋ kilisi ke,

mɔna diyemte diyem yɛna ɔ kewɔlɛɛ.

16 Ŋon ɔ gbɛɛneŋ tenɛɛ kom ketɔ yɛna nyeedoŋ,

mɔna keŋ akpanyanyaŋte ne nyim yɛna yeŋ.

17 Ŋon ɔ ne nyii katenee dɔŋ nyeedoŋ gbɛɛ,

mɔna ŋon ɔ bɛɛ kedesina na mo balaŋ yooso.

18 Ŋon ɔ mo dekara nɔɔwoya wuu kekɔla dɔɔ,

te ɔ yaasee akɛrɛɛ yɛɛ diyiŋte e.

19 Nɔɔwoya burum bɛɛ tɔ dukum gbɛɛ ya,

mɔna ŋon ɔ gyeŋ nombia na do ɔ laakem dokɔŋ.

20 Ŋon ɔ gbɛɛneŋ tenɛɛ laakem yɛɛ kɔba wolom kpaakpaate ke,

mɔna akpanyanyaŋte konɔɔ bɛɛ lee koya ya.

21 Ŋon ɔ gbɛɛneŋ tenɛɛ nɔɔwoya ne kɛɛle balaŋ burum,

mɔna ayiŋtena na yekee lee keŋ bɔɔ gyeŋ daale ya dɔɔ.

22 Degbeŋgyoo kehiraa ne yele walaŋ ne nyiŋ dedii,

keŋ ɔ bɛɛ mo weeleŋ kpu ya.

23 Diyiŋte sia na gyoo akpanyanyaŋ nombia keyɛɛ man,

mɔna ŋon ɔ ne nyii nombia man sia na gye lee nyansa man.

24 Kpene keŋ akpanyanyaŋte ne yee nɛ keŋ ne kɔŋala ɔ dɔɔ,

mɔna ŋon ɔ gbɛɛneŋ tenɛɛ waa nyiŋ keŋ ɔ ne gyae.

25 Akpaa feliŋ dinaa de gyɔɔ laŋ nɛ, ne kuu akpanyanyaŋtena laŋ,

mɔna baŋ be gbɛɛneŋ tenɛɛ na sem keŋkeŋ kekpaakekpaa.

26 Mena keŋ soloŋ denyaŋesa ne yesi kela te nyɔɔse na gyoo sia nɛ,

mena te kebɔŋalete yɛɛ fa ŋon ɔ be kpila e nɛ.

27 Degbeŋgyoo keyee ne fa kekyaa kyare,

mɔna baa kɔɔkee akpanyanyaŋte weeya.

28 Ŋon ɔ gbɛɛneŋ tenɛɛ lookegyakaa yɛna kenyaŋee,

mɔna akpanyanyaŋtena lookegyakaa yɛɛ yakaa.

29 Degbeŋgyoo gbɛɛneŋ yɛna keyeu kagyoo fa ŋon dukum be doo ɔ man ya,

mɔna ke yɛɛ kewɔlɛɛ fa baŋ bɛɛ yɛɛ nombia kumɛɛ nɛ.

30 Bɔɔ gyae baa tale kulu ŋon ɔ gbɛɛneŋ tenɛɛ korakora ya,

mɔna akpanyanyaŋte be gyae waa kyaa tɛɛle dɔɔ ya.

31 Ŋon ɔ gbɛɛneŋ tenɛɛ na lese nyansa nombia lee ɔ nɔɔman,

mɔna baa gyɔ dekara laakem duguŋ.

32 Ŋon ɔ gbɛɛneŋ tenɛɛ nɔɔwoya na gyoo deŋele,

mɔna akpanyanyaŋte nɔɔ ne kolosi dekara bo.