1 Nyansa bee bololoo yee?

Nombia man kenyii bee gyina ɔ woya yee?

2 Bulasebia nyee dɔɔ gbɛɛ man

gbaŋgbasese man te ɔ na sem,

3 disim dinaa keŋ na mo gyu donɔɔ dinaa keŋ man,

ka denaanɔɔ yenaŋ te ɔ ne fae yeesa.

4 <<Ɛmɛɛ balaŋ yaa mɛɛ baake,

mee gyina ma woya baake denibalaŋ pou.

5 Ɛmɛɛ baŋ ɛ ba gyeŋ daale ya, ɛ yela ɛ sia kekara,

ɛmɛɛ ayiŋtena, ɛ nyii nombia man.

6 Ɛ tei, nawolo nyi me dana nombia tuturu maa yako,

me te gyuusu me nɔɔ maa kolosi keŋ doona kegbɛɛ.

7 Me nɔɔ ne kolosi anokoare bo,

te me nɔɔsebia ne kɔla nombia akaraŋkaraŋ.

8 Me nɔɔman nombia pou tenɛɛ,

ŋe man daale te tulii yaa ke gɛɛse ya.

9 Ŋe popou doona ŋe gbɛɛ fa baŋ bee nyii nombia man,

ŋa tenɛɛ fa baŋ be dana nombia kagyeŋ.

10 Lese me nombia kawola tina kɔba wolom yela,

nombia kagyeŋ yela kɔba yayam kpaakpaate.

11 Nawolo nyi nyansa na lee koya kela kegyaŋase kpaakpaa nyiŋan,

te kolo be kyaa keŋ n ne gyae keŋ n ke tale mo maana ke ya.

12 <<Maŋ nyansa, na siakekara kyaala debodokoloŋ,

maŋ tee nombia kagyeŋ na nombia kedi kegbɛɛ dɔɔ.

13 Degbeŋgyoo keyee yɛna dukum kekɔla,

Mɛɛ kɔla wose kegyina na agaŋtaŋ,

dinɔɔkum na nombia kekolosi tulii.

14 Kekolosifa na nombia kedi nideli yɛɛ me wui,

Me dana nombia man kenyii, me dana doŋ.

15 Me dɔɔ te gyooneŋ ne tɛɛ di gyoori,

te kegyiise ne fa kawolase ŋan doo ŋe gbɛɛ dɔɔ.

16 Me dɔɔ te gyoorobia ne tɛɛ di gyoori,

na siamantena baŋ bee di tɛɛle dɔɔ nɛ.

17 Mɛɛ gyae baŋ bɛɛ gyae maŋ nɛ,

te baŋ bɛɛ yase sia kɛo maŋ ne naa maŋ.

18 Wose kenyiŋ na obuo,

dedii keŋ bɛɛ wɔlɛɛ ya, na kede yɛɛ me wui.

19 Bii keŋ mɛɛ see dei kela kɔba yayam, kɔba yayam kpaakpaate gba,

keŋ na lee me man kela kɔba wolom kpaakpaate.

20 Mɛɛ tɛɛ nombia ŋan tenɛɛ nɛ gbɛɛ dɔɔ,

na nombia kedi ke gbɛɛ dɔɔ detɛe man,

21 na maa yela baŋ bɛɛ gyae maŋ nɛ kenyiŋ ba wose,

na ba abɔɔ dɛɛseese ke wulu.

22 Degbeŋgyoo tomse man na maŋ te ɔ taŋgbɛɛwɔ yɛɛ,

pɛte ŋan ɔ be yɛɛ gyaŋgba gyaŋgba nɛ.

23 Ɔ lese maŋ leenaŋ beneŋ beneŋ keŋ,

leenaŋ kewalaŋ keŋ pɛte ɔ yɛɛ tɛɛle.

24 Debaŋ keŋ leeneŋ ŋan ŋe dana siiliŋ be kyaa ya nɛ, na be ta lola maŋ,

debaŋ keŋ booneŋ nyeeya ŋan loŋse ne puu lee be kyaa ya nɛ.

25 Pɛte bulase kaa seŋ ŋe daseŋae man,

pɛte bulasebia kekɔŋ nɛ, na be ta lola maŋ.

26 Pɛte waa yɛɛ tɛɛle kei yaa ke ŋalese man,

yaa tɛɛle dɔɔ aŋasa kamasɛ.

27 Me kyaa botɔɔ pɛte ɔ moo adido see ka dedoi man,

debaŋ keŋ ɔ be kpase debuŋta keŋ gyakaa boo dinaana man nɛ.

28 debaŋ keŋ ɔ ba see debuŋta mokɔɔ adido keŋkeŋ,

te ɔ see ɛpo nyee keŋkeŋ.

29 debaŋ keŋ ɔ be fa ɛpo ke wulu,

na loŋse be nyiŋ yala ɔ mmaraa dɔɔ ya,

na debaŋ keŋ ɔ ba see tɛɛle mokɔɔ nɛ.

30 Na me kyaa ɔ yenaŋ ŋgba nyiŋmaa man tomyɛɛre kegyia nɛ,

na mee yele ɔ sia na gye wee na wee,

na mɛɛ nyaŋee ɔ siaman debaŋ kamase.

31 Mɛɛ nyaŋee ɔ tɛɛle keŋ pou ɔ be yɛɛ nɛ man,

te denibalaŋ na gyoo me sia.

32 <<Nɛnɛɛ me bia, ɛ tei maŋ,

baŋ be dɔŋ me gbɛɛneŋ man nɛ baŋna nyeebam.

33 Ɛ tei me kawola na ɛ sia ke kara.

ɛ na bɛɛ ŋa ya.

34 Baŋ bee tei maŋ,

te bee gyee ma anaanɔɔse wee kamasɛ,

te bɛɛ sem ma asima gbɛɛneŋ man nɛ baŋna nyeebam.

35 Nawolo nyi baŋ be naa maŋ na be te nyiŋ nyeedoŋ,

te Degbeŋgyoo waa boele wɔ.

36 Mɔna baŋ be bɛɛ nyi bɔɔ kɛo maŋ ya nɛ te di ba wose gyerebi,

baŋ pou bɛɛ kɔla maŋ ne gyae yeŋ baa.>>