1 Ŋon ɔ ne gyae katenee ne gyae nombia kagyeŋ,

mɔna ŋon ɔ ne kɔla kedesina yɛɛ diyiŋte e.

2 Balaŋ kpaakpaa na gyoo Degbeŋgyoo sia,

mɔna ɔ ne bu baŋ bɛɛ yɛɛ akpanyanyaŋ nombia fɔɔ.

3 Ŋolo be tale kyaa gbeli lee akpanyanyaŋ keyɛɛ man ya,

mɔna bɔɔ tale kulu ŋon ɔ gbɛɛneŋ tenɛɛ nɛ ya.

4 Alo ŋon ɔ dana dinɔɔ kpaakpaa na do ɔ baale obuo,

mɔna alo ŋon ɔ ne yɛɛ desɛŋ nombia yɛɛ ŋgba kaweekum nɛ ɔ baale ŋɔɔ man.

5 Ŋon ɔ gbɛɛneŋ tenɛɛ nyeeman nombia doona ke gbɛɛ,

mɔna akpanyanyaŋte kekolosifa yɛɛ kabeo ke.

6 Akpanyanyaŋte nɔɔwoya yɛɛ balaŋ kako nombia ke,

mɔna ŋon ɔ gbɛɛneŋ tenɛɛ kekolosi ne lɛɛ wɔ.

7 Be tu akpanyanyaŋte na ɔ wui te taŋ,

mɔna ŋon ɔ gbɛɛneŋ tenɛɛ dekpaŋalaŋ kyaa kekpaakekpaa.

8 Walaŋ nombia kagyeŋ man te bɛɛ mo kɛlɛɛ e,

te bɔɔ ne kala ŋon ɔ dana Nyeempɔkum do kolo man ya.

9 Ŋon ɔ be doo kolo man ya te ɔ dana tobaale nɛ,

dei kela ŋon ɔ ne gyɔ konɔɔ mɔna ɔ be dana weenɛɛ ya.

10 Ŋon ɔ gbɛɛneŋ tenɛɛ ne kɛɛ ɔ wonembia dɔɔ nideli,

mɔna akpanyanyaŋte wɔe keyɛɛ yɛɛ nyeemandoŋ ke.

11 Baŋ bɛɛ kyaŋ ba wose fara ne nyiŋ weenɛɛ burum,

mɔna baŋ be silana abɔɔ yakaa nyiŋan be dana nyee ya.

12 Akpanyanyaŋte ne gyae abɔɔ ŋan nombiakumɛɛ yɛɛra be yilaa see nɛ,

mɔna ŋon ɔ tenɛɛ waa kyaa gbeli nideli.

13 Nɔɔwoya kumɛɛ yɛɛ kɔta ke fa nombiakumɛɛ yɛɛra,

mɔna ŋon ɔ gbɛɛneŋ tenɛɛ ne yeu lee nombia man.

14 Nombia ŋan na lee balaŋ nɔɔman na mo nombia kpaakpaa kɔna wɔ,

te be nyiŋmaa man tom na mo tɔnɔɔ kɔna wɔ.

15 Diyiŋte gbɛɛneŋ dei fa ŋon gbagba,

mɔna siakaralate ne tei kekolosifa.

16 Diyiŋte na lese ɔ baŋ wola karatetee dokoloŋ,

mɔna siakaralate bɛɛ mo tuubia yɛɛ kolo ya.

17 Ŋon ɔ ne di anokoare adansɛɛ ne kolosi anokoare,

mɔna adansɛɛkumdiiri ne di akɛrɛɛ bo.

18 Ŋon ɔ ne kolosi bo do nɛ nɔɔwoya ne sɔɔ ŋgba yoosila nɛ,

mɔna nyansate nɔɔwoya ne kyɔ kawee.

19 Anokoare nɔɔwoya doo kekpaakekpaa,

mɔna dekara laakem bee di weeya ya.

20 Dekara doo baŋ bɛɛ gyueŋ dukum nɛ konɔɔse man,

mɔna baŋ bɛɛ gyae wosefɛɛreŋ ne nyaŋee.

21 Nombiikum bɛɛ tale yala ŋon ɔ tenɛɛ ya,

mɔna nombiakumɛɛ ne yala akpanyanyaŋtena debaŋ kamasɛ.

22 Degbeŋgyoo ne kɔla akɛrɛɛtena,

mɔna baŋ bee di anokoare nɛ nombia na gyoo ɔ sia.

23 Ŋon ɔ sia be kare na weese ɔ nombia kagyeŋ,

mɔna diyiŋte na lese ɔ diyiŋ nombia debɔɔ.

24 Kakyeŋ doore nyiŋmaase gyae ke di gyoori,

mɔna kebɔŋale gyae ka mo neŋ do gbeŋiri man.

25 Kayeyɛɛ ne yele walaŋ wose ne yɔkɔse e,

mɔna nɔɔwoya kpaakpaa na do e kakyeŋ.

26 Ŋon ɔ tenɛɛ ne kɛɛ ɔ gyoo kalese man nideli,

mɔna akpanyanyaŋte kekyaabii man na mo e yooso.

27 Kebɔŋalete bee nyiŋ ŋale man naane ŋasee ya,

mɔna kakyeŋte ne nyiŋ ŋale man naane.

28 Nyeedoŋ doo katenee gbɛɛ man,

gbɛɛ kenaŋ bɛɛ mo walaŋ gyu yeŋ man ya.