1 Me bu, na wolee me kawola ya,

mɔna mo ma mmaraase ŋan do n konɔɔ man.

2 Nawolo nyi ŋe gyae ke yela n kulutooneŋ ka bo,

na ka mo wosefɛɛreŋ kɔna neŋ.

3 Na yele kegyae keŋ taŋ ɔto ya na anokoare kedi ke paŋ neŋ ya,

mo kpaŋna n wɔŋe,

ŋmarase ŋa gyakaa n konɔɔ dɔɔ.

4 Kenaŋ na waa boele neŋ na n ke nyiŋ yele kpaakpaa,

Wurubuarɛ na balaŋ siaman.

5 Mo n konɔɔ pou lɔ Degbeŋgyoo dɔɔ,

na mo n wose lɔ nyaŋ gbagba n nombia man kenyii dɔɔ ya.

6 Yɔkɔse n wose fa e n kekyaabii man pou,

ŋon ne gyaela waa tenee n detɛe man.

7 Na kɛɛ n wose nyi n sia te kare ya,

yee Degbeŋgyoo na n ke bɛɛ dukum keyɛɛ.

8 Kei gyae ka do n wose doŋ,

na ke desina n wose.

9 Mo nya dedii,

na n weenɛɛ gyaŋgba nyiŋan pou do Degbeŋgyoo obuo.

10 Kenaŋ na n kpeese gyae ke wulu leki,

na waen wɔle ke wulu nyɔ osuŋse belebelebele.

11 Me bu, nyi Degbeŋgyoo da tenee neŋ nɛ, na bɛɛ ke ya,

nyi ɔ kalena neŋ nɛ, na yele ke takaa neŋ ya.

12 Nawolo nyi Degbeŋgyoo na tenee baŋ ɔ ne gyae wɔ,

ŋgba mena keŋ kya ne yɛɛ ɔ bu ŋon ɔ na gyoo ɔ sia nɛ.

13 Baŋ ba gyeŋ nyansa,

na baŋ bee nyii nombia man nɛ, baŋna nyeebam.

14 Nawolo nyi ɔ dana tɔnɔɔ burum kela kɔba wolom,

te abɔɔ kpaakpaa na lee ɔ man kela kɔba yayam.

15 Ɔ na lee koya kela kegyaŋase kpaakpaa nyiŋan,

kpene keŋ ne gyɔ neŋ loo be maana e ya.

16 Kabee kyare doo ɔ dunoluŋ nyiŋmaa man,

te wose kenyiŋ na obuo doo ɔ demena nyiŋmaa man.

17 Ɔ gbɛɛneŋ na gyoo sia,

ɔ detɛe pou yɛɛ wosefɛɛreŋ.

18 Ɔ yɛɛ nyeedoŋ daŋ ke fa baŋ bɛɛ kyaŋ e,

baa hiraa baŋ bɛɛ kyaŋ e keŋkeŋ nɛ.

19 Nyansa te Degbeŋgyoo moowɔ see tɛɛle mokɔɔ,

nombia man kenyii te ɔ moowɔ see adido.

20 Ɔ nombia kagyeŋ man te ɔ yela loŋse puuwɔ lee,

te debuŋta yela obosuo yalawɔ.

21 Me bu, kyaŋ nyansa na nombia kenyii man,

na yele ŋe ka lee n nyiŋmaa man ya.

22 Ŋe gyae ke yela n ka bee kyare,

na n ke nyiŋ obuo.

23 Kenaŋ na nyaŋ ke ta n gbɛɛ wɔe kefɛɛ man,

te n be gyae n ke gyɔ n nae ya.

24 Akpaa n tisi doo na, n be gyae n ke yee ya,

akpaa n tisi doo na, n dosoroŋ gyae ke yɛɛ gyoŋ.

25 Nyi nombiikum de yale karatetee,

yaa kewɔlɛɛ de yala akpanyanyaŋtena nɛ na yee ya.

26 Nawolo nyi Degbeŋgyoo waa kpuna neŋ,

keŋ ɔ be gyae waa yela n nae ka gyoo kɔta man ya.

27 Akpaa gbɛɛ doo na,

na bɛɛ deeli keyɛɛ fa baŋ kaboena nyi nya yɛɛ fa wɔ ya.

28 Na yako fa n dɔɔ nyi,

<<Gyu n ke kɔŋ kyoo na maa fa neŋ,>>

lee keŋ n dana kpene kenaŋ ya.

29 N dɔɔ ŋon ɔ kyaa benaana neŋ te ɔ na mo ɔ wose lɔ n dɔɔ nɛ,

na bake ɔ nyeeman nombiikum,

30 Na mo nombii gyakaa ŋolo dɔɔ yakaa,

lee keŋ ɔ te yɛɛ neŋ kolokum ya.

31 Na yoo nyeemandoŋte ŋolo nuŋkurili,

yaa n ke yɛɛ wa abɔɔ ayɛɛsa ŋaale ya.

32 Nawolo nyi Degbeŋgyoo ne kɔla nombiakumɛɛ yɛɛra,

mɔna loŋ bɛɛ lam ŋon na baŋ be gbɛɛneŋ tenɛɛ nɛ nsana ya.

33 Degbeŋgyoo kefaala gyakaa akpanyanyaŋtena dekpaŋalaŋ dɔɔ,

mɔna ɔ ne hiraa baŋ be gbɛɛneŋ tenɛɛ nɛ denimantena.

34 Ɔ ne kulu baŋ bee kulu balaŋ nɛ,

mɔna ɔ na boele baŋ bɛɛ yɔkɔse ba wose nɛ.

35 Nyansatena baa nyiŋ obuo,

mɔna ayiŋtena baa di desɛŋ.