1 Alo siakaralate ne baŋ ɔ dekpaŋalaŋ,

mɔna alo diyiŋte dɔɔ ŋon gbagba ne yɛlɛɛna ɔ wui.

2 Ŋon ɔ gbɛɛneŋ tenɛɛ ne yee Degbeŋgyoo,

mɔna baŋ bɔɔ ne di anokoare be gbɛɛneŋ man ya nɛ bɛɛ mo e yɛɛ kolo ya.

3 Diyiŋte nɔɔwoya yɛna dambila keŋ ne tuku wɔ,

mɔna siakaralate nɔɔwoya ne kɛɛ be dɔɔ.

4 Botɔɔ keŋ nunkyue baala be kyaa ya na, weenɛɛ adakaa keŋ ne doo yakaa,

mɔna weenɛɛ burum kenyiŋ na lee bo nunkyue baale doŋ man.

5 Adansɛɛ anokoarete bee di dekara ya,

mɔna dekara adansɛɛte ne di akɛrɛɛ.

6 Ŋon ɔ ne kulu balaŋ nɛ ne kɛo nyansa mɔna ɔ bee nyim ya,

mɔna nombia kagyeŋ be dana ŋon ɔ ne nyii nombia nawolo nɛ baŋ ya.

7 Wɔŋ n wose lee diyiŋte gyaŋ,

nawolo nyi n be gyae n ke nyii nombia kagyeŋ nombia ya.

8 Siakaralate nyansa yɛna nyi waa gyeŋ ɔ keta man,

mɔna diyiŋte diyiŋ nombia yɛɛ kabeo ke.

9 Ayiŋtena be famenɛ na dukum keŋ bɛɛ yɛɛ ya,

mɔna bɛɛ boele baŋ be gbɛɛneŋ tenɛɛ nɛ.

10 Konɔɔ kamasɛ gyeŋ weeleŋ keŋ doo ke man,

te ŋolo be tale nyaŋee kpuna ke ya.

11 Akpanyanyaŋte dekpaŋalaŋ gyae ke yɛlɛɛ,

mɔna ŋon ɔ gbɛɛneŋ tenɛɛ kanyaŋ deni gyae ka seŋ.

12 Gbɛɛ daale doo keŋ ke yɛɛ ŋgba ke dei,

mɔna kɔ ɔto ne gyu yeŋ man.

13 Boŋɛɛse man koraŋ na konɔɔ ne nyii weeleŋ,

te kenyaŋee ɔto gyae ke tale yɛɛ waraŋsa kedi.

14 Baŋ bɔɔ ne lɛɛ di ya baa nyiŋ ba komketɔ pou lee be gbɛɛneŋ dɔɔ,

te balaŋ kpaakpaa mɔ baa nyiŋ be wui.

15 Ŋon ɔ be doo daale man ya ne lɛɛ nombii kamasɛ di,

mɔna siakaralate ne kɛɛ ɔ keta man nideli.

16 Siakaralate ne yee te ɔ ne wɔŋ ɔ wose lee dukum keyɛɛ man,

mɔna diyiŋte ne barase yɛɛ kolo keŋ ɔ bɛɛ gyueŋ ke man ya.

17 Ŋon ɔ na gyeŋ baŋ bileŋbileŋ ne yɛɛ diyiŋ abɔɔ bo,

te bɛɛ kɔla ŋon ɔ ne yɛɛ nombia kumɛɛ adao man.

18 Baŋ bɔɔ doo daale man ya ne di ayiŋtena abɔɔ bo,

mɔna nombia kagyeŋ yɛna siakaralate obuo.

19 Nombiakumɛɛ yɛɛra baa buŋ balaŋ kpaakpaa,

te akpanyanyaŋtena baa buŋ baŋ ba tenɛɛ nɛ anaanɔɔse man.

20 Diyemte dɔɔ ɔ dɔɔna gbagba koraŋ ne kɔla e,

mɔna kɔbate dana gyoona burum.

21 Ŋon ɔ bɛɛ kala ɔ dɔɔ do kolo man ya na, ɔ yɛɛ dukum yɛɛre e,

mɔna ŋon ɔ ne wii ayematena na ŋonna nyeebam.

22 Baŋ bɛɛ bake nombiakumɛɛ nɛ bɛɛ yo gbɛɛ yee?

Mɔna kegyae na anokoare kedi gyae ke sila baŋ bɛɛ gyueŋ nombia kpaakpaa nɛ.

23 Tom keyɛɛ nedoŋ na mo tɔnɔɔ kɔŋ,

mɔna nɔɔwoya yakaa na mo diyem bo kɔŋ.

24 Siakaralatena obuo yɛna ba wose kenyiŋ,

mɔna ayiŋtena diyiŋ nombia na mo diyiŋ kɔŋ.

25 Anokoare adansɛɛte ne lɛɛ balaŋ nyee,

mɔna adansɛɛkum diiri na beo balaŋ.

26 Ɔ kamasɛ ŋon ɔ ne yee Degbeŋgyoo na sem keŋkeŋ,

keŋ gyae ke yɛɛ keyeu kagyoo fa ɔ bia.

27 Degbeŋgyoo keyee yɛɛ nyeedoŋ detiribuŋ ke,

kɛɛ lese walaŋ lee yeŋ kɔta man.

28 Balaŋ booroŋ man te gyoo ne nyiŋ gyoorobiiri,

nyi balaŋ be kyaa ya na gyoori kedi bɛɛ sem ya.

29 Ɔ kamasɛ ŋon ɔ ne nyiŋ konɔɔ ne nyii nombia man,

mɔna ŋon ɔ na gyeŋ baŋ bileŋbileŋ na lese ɔ diyiŋ debɔɔ.

30 Wosefɛɛreŋ ne fa walaŋ nyeedoŋ,

mɔna nuŋkurili na do ŋɔɔ kaweekum.

31 Ɔkamasɛ ŋon ɔ ŋere diyemte do na ɔ ta tee Wurubuarɛ,

mɔna ŋon ɔ wii diyemte na mo obuo fa Wurubuarɛ.

32 Nyi nombiikum de kɔŋ nɛ, akpanyanyaŋtena ne yale ba dukum keyɛɛ man,

mɔna nyi yeŋ man koraŋ na baŋ ba tenɛɛ ne yeu gyoo Wurubuarɛ.

33 Nyansa te wulu ŋon ɔ ne nyii nombia nawolo nɛ nyee man,

mɔna be doo mena ayiŋtena man ya.

34 Katenee ne gyina tɛɛlese adido,

mɔna dukum na do walaŋ kamasɛ desɛŋ.

35 Gyoo sia na gyoo tobaale ŋon ɔ sia be kare nɛ,

mɔna tobaale ŋon ɔ ne yɛɛ desɛŋ nombia na do gyoo baŋ.