1 Ɔkamasɛ ŋon be kalena e agbaatee agbaatee te ɔ bee nyii ya nɛ,

waa wɔlɛɛ karatetee keŋ ɔ be gyae waa nyiŋ kekyɔ ya.

2 Akpaa baŋ ba tenɛɛ ne wuku na balaŋ baŋ ne nyaŋee,

akpaa akpanyanyaŋtena ne di balaŋ dɔɔ na balaŋ baŋ na toroŋ.

3 Ŋon ɔ ne gyae nyansa ne yele ɔ kya ne nyaŋee,

mɔna ŋon ɔ na mo ɔ wose dona futoolitena ne wɔlɛɛ ɔ wosekenyiŋ.

4 Nombia kedi kegbɛɛ dɔɔ te gyoo na mo bake donɔɔ,

mɔna ŋon ɔ sia ne yɛɛ abɔɔ ka yo lɛɛ ne yɛlɛɛ ke.

5 Ŋon ɔ na mo kabeo nɔɔwoya fa ɔ tebia nɛ,

ne nyɔɔ wɔ kɔtase be gbɛɛneŋ man baa.

6 Nombiakumɛɛ yɛɛre gbagba dukum ne nyɔɔna kɔta,

mɔna ŋon ɔ tenɛɛ ne fae yeesa nyaŋee na te yɛɛ e gyoŋ.

7 Ŋon ɔ tenɛɛ ne kɛɛ nyi baa di ayematena nombia ke gbɛɛ dɔɔ fa wɔ,

mɔna akpanyanyaŋte ŋon be famenɛna wɔ ya.

8 Balaŋ kulura na mo yoo kɔŋ donɔɔ man,

mɔna siakaralate ne yele baŋ ne fɛɛ.

9 Nyi siakaralate na diyiŋte de gyu nombia dedii man nɛ,

diyiŋte na boŋo bo fae yeesa tɔ deŋela.

10 Awudiini ne kɔla walaŋ ŋon ɔ dana yele,

te ɔ ne gyae waa ko ŋon ɔ gbɛɛneŋ tenɛɛ.

11 Diyiŋte na lese ɔ baŋ pou debɔɔ,

mɔna siakaralate ne nyiŋ konɔɔ.

12 Akpaa gyoo de tei akɛrɛɛ nombia nɛ,

ɔ kyaarabia pou na bese akpanyanyaŋtena.

13 Diyemte na ŋon ɔ na ŋere e do pou dana kolo dokoloŋ,

Degbeŋgyoo faana be bala nyeedoŋ.

14 Nyi gyoo de di ayematena nombia kegbɛɛ dɔɔ nɛ,

ɔ gyoori ne kyaa gbeli kyare.

15 Dembila na kekalana ne fa biikyaa nyansa,

mɔna biikyaa ŋon bɔɔ na tenee e ya na do ɔ naa desɛŋ.

16 Nyi akpanyanyaŋtena ne wuku na dukum mɔ na boo,

mɔna baŋ ba tenɛɛ baa naa ba keyala man.

17 Akpaa n tenee n bia nideli na baa fa neŋ wosefɛɛreŋ,

baa yela n ke nyiŋ keŋ n konɔɔ ne gyae.

18 Nyi kalesewola be kyaa ya na balaŋ na yo gbɛɛ,

mɔna ŋon ɔ ne di nombia kawola dɔɔ nɛ ŋonna nyeebam.

19 Bɔɔ na mo nɔɔwoya yakaa tenee gbeŋi ya,

akpaa ɔ nyii ke man koraŋ na ɔ be gyae waa di ke dɔɔ ya.

20 N ne naa ŋon ɔ ne barase kolosi?

Diyiŋte dana lookegyakaa kela e.

21 Nyi n do n gbeŋi lee ɔ kewalaŋ na,

wee daale waa kaa gyeŋ seŋ n nyeedɔɔ.

22 Baŋte ne loo nombia kɔŋ,

te baŋ kporokporote ne yɛɛ nombiakumɛɛ burum.

23 Wose kegate ne tisina walaŋ tɛɛle man,

mɔna wose keyɔkɔse ne fa obuo.

24 Ŋon ɔ ne kyɔ ŋmɛɛlate bɛɛ gyae ɔ nyeedoŋ ya,

ɔ ne kaŋ ntam keŋ ɔ bɛɛ yako ya.

25 Deniwalaŋ keyee yɛɛ kɔta ke,

mɔna ɔkamasɛ ŋon ɔ mo ɔ wose lɔ Degbeŋgyoo dɔɔ na waa nyiŋ kegyee.

26 Balaŋ burum ne gyae nyi gyoo kaboele wɔ,

mɔna Degbeŋgyoo ne diina nombia kegbɛɛ dɔɔ.

27 Ŋon ɔ tenɛɛ ne kɔla baŋ bɔɔ ne di anokoare ya,

akpanyanyaŋte ne kɔla ŋon ɔ tenɛɛ.