1 Weenɛɛ dekpake kedi wosefɛɛreŋ man,

dei kela nɔɔkedi dekpaŋalaŋ keŋ kale wolowolo.

2 Gbeŋi ŋon ɔ sia be kare nɛ waa di bu desɛŋte dɔɔ,

te waa nyiŋ dedii ŋgba bia baŋ man ŋolo nɛ.

3 Bɛɛ mo boalaŋ yalakee kɔba wolom na boalaŋ degyapaa yalakee kɔba yayam,

mena ke te Degbeŋgyoo ne kɛɛse konɔɔ man kɛɛ.

4 Akpanyanyaŋte ne tei akpanyanyaŋ nombia,

dekarate mɔ ne tei akɛrɛɛ nombia.

5 Ɔkamasɛ ŋon ɔ kulu diyemte na ɔ ta tee Wurubuarɛ,

ɔkamasɛ ŋon ɔ nyaŋee lee ŋolo nombiikum dɔɔ na baa wɔŋ ɔ deŋele.

6 Kegyiise gyoorobiiri yɛna be naana doona,

te bia obuo yɛna ba lolala.

7 Nombii kpaakpaa bɛɛ lee diyiŋte kekolosi man ya,

te dekara bɛɛ lee siamante nɔɔman ya.

8 Kayofa yɛɛ ŋgba bɛrɛɛ nɛ fa ŋon ɔ ne faa,

bɛɛ gyueŋ nyi kede gyae ka lee ke man kɔŋ gbɛɛ kamasɛ man.

9 Ŋon ɔ na mo dukum kyɛɛ na mo kegyae kɔŋ,

mɔna ŋon ɔ ne putii nombia ne tira gyoona nsana.

10 Nyi be kalena ŋon ɔ ne nyii nombia man nɛ, na gyoo ɔ nyeeman,

kela baa tuku diyiŋte dembiise sɔŋonoŋ (100)

11 Balaŋkumɛɛ kegyaebii yɛna nombia keloodo,

mena dɔɔ kpilare nyeeman doŋte waa kaa seŋ tia wɔ.

12 Dei nyi nya gyaŋeena mokɔɔte ŋon bɔɔ gate ɔ bia,

kela diyiŋte ɔ diyiŋ nombia man.

13 Ŋon ɔ na mo dukum tɔ deeli kom nɛ,

dukum be gyae ke paŋ ɔ dekpaŋalaŋ man ya.

14 Kale kewalaŋ yɛɛ ŋgba detiribuŋ keŋ kɔɔ toro nɛ,

mena dɔɔ tina aŋmaareŋ yela pɛna ke kaa yɛɛ doŋ.

15 Ŋon ɔ tina ŋon ɔ be di fɔɔ yela te ɔ bu ŋon ɔ nombia dei fɔɔ nɛ,

Degbeŋgyoo ne kɔla ŋe popou.

16 Weera dɔɔ te diyiŋte na tela kɔba nyi waa lɛɛ nyansa,

debaŋ keŋ ɔ ba gyeŋ keŋ waa mo ke yɛɛ ya?

17 Dɔɔ ne gyae debaŋ kamasɛ,

te loŋto dɔɔ waa kyɔ neŋ n wose kekyaŋ man.

18 Walaŋ ŋon ɔ be dana nyansa ya na seŋala kom man,

te ɔ ne sɛɛ nyi waa tɔ ke fa ɔ dɔɔ.

19 Ŋon ɔ ne gyae kale ne gyae dukum,

ŋon ɔ ne kolosi agaragara man ne gyae nombia fa ɔ wose.

20 Ŋon ɔ na gyueŋ dukum ɔ konɔɔ man be gyae waa de ya,

ŋon ɔ dana laakemse ala ala ne yale nombia man.

21 Bu diyiŋte kalola na mo mutii kɔŋ,

ɔ bee yele ɔ lolala ke nyaŋee korakora ya.

22 Konɔɔ keŋ ne nyaŋee yɛɛ tee kpaakpaa ke,

mɔna wose ketekerii ne fa ŋɔɔ man kaweekum.

23 Akpanyanyaŋte na yoo lɛɛ kolo detiŋtɛɛ man,

na waa nyiŋ tulii nombia kedi kegbɛɛ man.

24 Ŋon ɔ ne nyii nombia man ne kɛo nyansa gbɛɛ,

mɔna diyiŋte sia ne kɛo bo ŋɔlɔŋɔlɔ yenaŋ kamasɛ.

25 Bu diyiŋte na mo kemutii kɔna ɔ kya,

na weeleŋ kɔna ɔ naa ŋon ɔ ba lola e.

26 Akpaa tekaboena nyi ba do ŋon ɔ nombia dei kom ya nɛ,

mena ke te tekaboena nyi baa tuku kegyia ŋon ɔ gbɛɛneŋ tenɛɛ ya.

27 Ŋon ɔ gyeŋ nombia bee kolosi yakaayakaa ya,

te ɔkamasɛ ŋon ɔ ne nyii nombia man ne nyiŋ konɔɔ.

28 Nyi diyiŋte de wuu ɔ nɔɔ na, bɛɛ kɛɛ nyi ɔ sia te kare,

nyi ɔ do ɔ laakem dokɔŋ na bɛɛ kɛɛ nyi ɔ gyeŋ nombia man.