1 Diyemte ŋon nombiikum be doo ɔ keta man ya dei,

kela diyiŋte ŋon ɔ ne tulii ɔ nɔɔwoya.

2 Nyi ŋolo bɛɛ gyae nombia kagyeŋ ya na be dei ya,

nawɔɔ ɔsaate na yo gbɛɛ.

3 Walaŋ gbagba diyiŋ nombia ne wɔlɛɛna e,

te ɔ konɔɔ na koro tia Degbeŋgyoo.

4 Wose kenyiŋ ne wɔŋ dɔɔna burum kɔŋ,

mɔna diyemte ɔ dɔɔ koraŋ ne bɛɛ e.

5 Adansɛɛkumdiiri be nyiŋ ɔ wose nyi bɔɔ wɔŋ ɔ deŋele ya,

te dekarate be gyae waa nyiŋ gbɛɛ lɛɛ ɔ wose ya.

6 Balaŋ burum na mo gbɛɛ daale nyi be nombia kagyoo kegyia sia,

te walaŋ kamasɛ na mo ŋon ɔ ne fa abɔɔ nɛ dɔɔre.

7 Diyemte ɔ loŋtona pou ne kɔla e,

kaa bɔɔse nyi ɔ gyoona be wɔŋana ba wose lee ɔ gyaŋ yee?

Nyi ɔ yase sia waase wɔ koraŋ nɛ,

bɔɔ ne kɔŋ ya.

8 Ŋon ɔ nyiŋ nyansa ne gyae ɔ wose,

ŋon nombia man kenyii na gyoo ɔ sia waa de.

9 Adansɛɛkumdiiri be gyae waa nyiŋ ɔ wose nyi bɔɔ wɔŋ ɔ deŋele ya,

te ɔkamasɛ ŋon ɔ di dekara waa munu.

10 Tekaboena nyi diyiŋte waa kyaa gyoŋ kedi man ya,

kaa bɔɔse nyi gbeŋi ke di gyoorobia dɔɔ.

11 Ŋon ɔ gyeŋ nyansa ne nyiŋ konɔɔ,

nyi ŋolo da mo kolokum kyɛɛ na kɛɛ fa e obuo.

12 Gyoo baŋ kagyeŋ yɛɛ ŋgba dinaate kemuusu nɛ,

mɔna ɔ bɛrɛɛ yɛɛ ŋgba ŋale dɔɔ obosuo nɛ.

13 Bu diyiŋte yɛna ɔ kya kewɔlɛɛ,

te alo yalale kale gyaere yɛɛ ŋgba,

deni keŋ ne lilii debaŋ kamasɛ nɛ.

14 Dekpaŋalaŋ na wosekenyiŋ yɛɛ dedii lee kyaɔ gyaŋ,

mɔna alo yalale nyansate lee Degbeŋgyoo gyaŋ.

15 Kebɔŋale na mo kedoo yeŋ kɔŋ,

te wosegyoŋte na yeŋ tanam bo.

16 Ɔkamasɛ ŋon ɔ di mmaraase dɔɔ ne nyiŋ nyeedoŋ,

mɔna ɔkamasɛ ŋon ɔ te kɛɛ ɔ gbɛɛ man nideli ya waa yeŋ.

17 Ɔkamasɛ ŋon ɔ wii diyemte na mo baa paa Degbeŋgyoo,

te waa tɔ e keŋ ɔ be yɛɛ nɛ kom.

18 Tenee n bia debaŋ keŋ lookegyakaa doo nɛ,

n te yɛɛ mena ya na n na ko wɔ baa.

19 Ŋon ɔ dana baŋkum waa nyiŋ ka deŋele kewɔŋ,

nyi n lɛɛ e na, n ka bese lɛɛ e bela.

20 Nyii kekolosifa na n ke lɛɛ katenee do,

ɔtoman na baa kala neŋ kpu siakaralatena man.

21 Walaŋ ne bake nombia burum ɔ nyeeman,

mɔna Degbeŋgyoo kegyaebii na seŋala.

22 Walaŋ kegyaebii yɛna baa di anokoare fa e,

te diyemte dei kela dekarate.

23 Degbeŋgyoo keyee ne fa nyeedoŋ,

ŋon ɔ kyaŋ ke ne kyaa wɔekefɛɛ man keŋ nombiikum be yala e ya.

24 Kebɔŋalete na mo ɔ nyiŋmaa takaa weenɛɛ nyefale man,

mɔna ɔ bɛɛ lese ke kaa do ɔ nɔɔman gba ya.

25 Tuku ŋon ɔ ne kulu balaŋ, na ŋon ɔ ba gyeŋ daale ya ke kasee nyansa,

kalana ŋon ɔ ne nyii nombia man, na waa bese gyeŋ nombia kpu.

26 Ɔkamasɛ ŋon ɔ naase ɔ kya diyem te ɔ tu ɔ naa nɛ,

ɔ yɛɛ bu ŋon ɔ na mo desɛŋ na desɛŋ nombia kɔŋ.

27 Me bu nyi n bɛɛ nombia kawola nɛ,

n ke kpase lee nombia kagyeŋ gbɛɛ man.

28 Dekara adansɛɛte ne kulu nombii na kegbɛɛ,

te akpanyanyaŋte nɔɔ ne kolosi nombia kumɛɛ.

29 Deŋele kewɔŋ doo fa baŋ bee kulu balaŋ,

te ketuku doo fa ayiŋtena maamase dɔɔ.