1 Nɔɔketira wose keyɔkɔse man ne fɛɛ wɔe,

mɔna nɔɔwoya kefuŋ lɔ na mo baŋ kɔŋ.

2 Siakaralate laakem na lese nombia kagyeŋ wola,

mɔna diyiŋ nombia na lee bo diyiŋte nɔɔman.

3 Degbeŋgyoo sia doo yenaŋ kamasɛ,

ne kɛɛ akpanyanyaŋtena na balaŋ kpaakpaa.

4 Nɔɔwoya keyɔkɔse yɛɛ nyeedoŋ daŋ ke,

mɔna nɔɔwoya ketulii ne yɔkɔse awoya.

5 Diyiŋte bɛɛ mo ɔ kya katenee yɛɛ kolo ya,

mɔna ŋon ɔ ne tei kedesina yɛɛ siakaralate e.

6 Dedii burum doo ŋon ɔ tenɛɛ nɛ dɛɛ,

mɔna keŋ akpanyanyaŋte ne nyim yɛɛ kewɔlɛɛ ke.

7 Siakaralate nɔɔ ne yaasee nombia kagyeŋ,

mɔna ayiŋtena konɔɔ ba tenɛɛ ya.

8 Degbeŋgyoo ne kɔla akpanyanyaŋtena kedeesa,

mɔna baŋ ba tenɛɛ kefane na gyoo ɔ sia.

9 Degbeŋgyoo ne kɔla akpanyanyaŋtena gbɛɛneŋ,

mɔna ɔ ne gyae baŋ be silana gbɛɛneŋ katenee.

10 Deŋele kewɔŋ doŋte doo fa ŋon waa yo gbɛɛ,

ŋon ɔ bɛɛ kekalena na waa yeŋ.

11 Nyi yeŋ na woyadɛɛ doo Degbeŋgyoo siaman teŋteŋeleŋ na,

kaa bɔɔse nyi deniwalaŋ konɔɔ man?

12 Baŋ bee kulu balaŋ bɛɛ gyae nyi baa kalana wɔ ya,

mena dɔɔ bɔɔ ne gyu siakaralatena gyaŋ ya.

13 De yɛɛ ŋolo gyoŋ ɔ konɔɔ man na ɔ ne booli ɔ sia,

mɔna nombia ketakaa ne yɔkɔse awoya.

14 Konɔɔ keŋ ne nyii nombia man ne gyae nombia kagyeŋ,

mɔna diyiŋte nɔɔ ne kolosi diyiŋ nombia bo.

15 Baŋ bɔɔ ŋere wɔ do nɛ weeya pou dana waraŋase,

mɔna ŋon ɔ sia na gye ne di ɔ nɔɔ wee kamasɛ.

16 Kolo kyomii kenyiŋ keŋ Degbeŋgyoo keyee doo ke man,

dei kela dedii burum kenyiŋ keŋ kaale doo ke man.

17 Faareŋ weenɛɛ kedi keŋ kegyae doo ke man,

dei kela nunkyuebu ŋon ɔ be doo nuŋ kedi keŋ kekɔla doo ke man.

18 Baŋ kporokporo na mo kale kɔŋ,

mɔna konɔɔ kenyiŋ ne pataa kale.

19 Sɔɔse te lɛɛ kebɔŋalete gbɛɛnaa man pou,

mɔna baŋ be gbɛɛneŋ tenɛɛ detɛe man doo teeŋ.

20 Bu siakaralate ne yele ɔ kya ne nyaŋee,

mɔna bu diyiŋte na mo ɔ naa sia tiu tɛɛle.

21 Diyiŋ na mo kenyaŋee kɔna ŋon ɔ ba gyeŋ nombia ya nɛ,

mɔna ŋon ɔ ne nyii nombia man keta man doo teeŋ.

22 Nyi n te nyii kekolosifa ya na n nyeeman kebake bee dee ya,

mɔna balaŋ burum kekolosifa kpaakpaa ne yele abɔɔ ne gyu nideli fa wɔ.

23 Nɔɔketira nideli na mo kenyaŋee kɔŋ,

nombii kekyako ka debaŋ man mɔ dei nideli.

24 Siakaralate ne tɛɛ gbɛɛ keŋ gyae ka mo e gyu nyeedoŋ man bo,

na waa wɔŋ ɔ wose lee gbɛɛ keŋ gyae ka mo e gyu woyadɛɛ man.

25 Degbeŋgyoo ne yɛlɛɛ baŋ bɛɛ gate ba wose nɛ akpaŋalaŋ,

mɔna ɔ na do lialo wuluse nideli.

26 Degbeŋgyoo ne kɔla akpanyanyaŋtena nyeeman kebake,

mɔna nombia kpaakpaa kekolosi na gyoo ɔ sia.

27 Ŋon ɔ sia ne yɛɛ abɔɔ ne wɔlɛɛ ɔ dekpaŋalaŋ,

mɔna ŋon ɔ ne kɔla abɔɔ kayolɛɛ waa nyiŋ nyeedoŋ.

28 Ŋon ɔ tenɛɛ na gyueŋ nideli pɛte waa tira nombii nɔɔ,

mɔna akpanyanyaŋte nɔɔ ne kolosi nombiakumɛɛ bo lɔ.

29 Degbeŋgyoo na akpanyanyaŋtena nsana dana lem,

mɔna ɔ ne nyii baŋ ba tenɛɛ nɛ kefane.

30 Sia kebooli ne yele walaŋ ne nyaŋee ɔ konɔɔ man,

te nombia kpaakpaa kenyii ne yele walaŋ ŋɔɔman ne yɛɛ e doŋ.

31 Walaŋ ŋon ɔ ne tei kedesina,

waa kyaa siakaralatena man.

32 Baŋ bɔɔ ne gyae katenee ya ne yɛɛ ba wose,

mɔna ŋon ɔ ne gyae nyi baa desina e ne nyii nombia man.

33 Nyansa kawola yɛna Degbeŋgyoo keyee,

te wose keyɔkɔse dɔŋ siaman fa obuo.