1 Yake bu Agure nɔɔwoya yaa,

Ɔ yako Itiele na Ukale nyi,

2 Ampaŋ me yɛɛ diyiŋte e gbaa, keŋ ma te yɛɛ walaŋ e ya,

mɔɔ dana deniwalaŋ nombia man kenyii ya.

3 Ma te kasee nyansa ya,

te mɔɔ dana nombia man kagyeŋ lee Fereŋkyeŋte Ŋon wose man ya.

4 Amɔte gyeŋala gyu adido te ɔ tisiwɔ kɔŋ?

Amɔte teena ɔ nyiŋmaa lɛɛ feliŋ?

Amɔte bakena loŋ do kanyaŋ man see?

Amɔte seena tɛɛle kei ɔto pou mokɔɔ?

Ɔ yele yɛna sena, te ɔ bu yele yɛna sena?

Ke yɛɛ ampaŋ n gyeŋ.

5 Wurubuarɛ nombii kamasɛ doona ke gbɛɛ,

ŋon yɛna yoo nyeele pampasaŋ fa baŋ pou bee yeu kagyoo e nɛ.

6 Na mo kolo kpu ɔ nombia man ya,

na mena ya na waa kalana neŋ na n ka bese dekarate.

7 Degbeŋgyoo, abɔɔ ala te mɛɛ bɔɔse neŋ,

na bɛɛse maŋ ŋa pɛ maa yeŋ ya.

8 Lese kabeo na dekara lee me man gyu lem,

na yɛɛ maŋ diyemte yaa kɔbate ya,

fa maŋ ma wee kamasɛ weenɛɛ bo.

9 Na mena ya maa nyiŋ ma wose na maa bɛɛ neŋ,

na maa yako nyi, <Amɔte yɛna Degbeŋgyoo?>

Yaa maa di diyem na maa ŋmɛɛle,

na maa mo ayimɛɛ wuu me Wurubuarɛ yele ya.

10 Na wɔlɛɛ ŋolo tobaale fa ɔ gbeŋgyoo ya,

na mena ya waa falaa neŋ na n kena diyem.

11 Baale kyaa keŋ bɛɛ falaa be kyaɔ,

te bɔɔ ne hiraa be naɔ ya.

12 Baale ne kɛɛ ba wose nyi be dei baŋ gbagba siaman,

mɔna bɔɔ ne gberaa ba ayimɛɛ leki ya.

13 Baale kyaa keŋ bɛɛ gate ba wose,

te bɔɔ na mo walaŋ yɛɛ kolo ya.

14 Be kela yɛɛ yoosilase ŋa,

te silase doo ba kedaase man,

na baa mo wɔlɛɛ ayematena lee tɛɛle dɔɔ,

na baŋ bɔɔ dana kolo ya nɛ lee balaŋ man.

15 Desekpe dana bia alebia bala,

bɛɛ fae yeesa nyiaa, <Fa maŋ, Fa maŋ,

Abɔɔ atooro kyaa keŋ ŋɔ ne baa ya,

abɔɔ anaara bɛɛ yako nyi, <Tekaboe> ya,

16 Woyadɛɛ na ɔlamanbo dokyoa,

tɛɛle keŋ loŋ bɛɛ baa ke ya,

na boalaŋ keŋ bɛɛ yako nyi, <Tekaboe>ya.

17 Sibii keŋ ne kulu kya,

te ke bɛɛ kala naa do kolo man ya nɛ,

Kwaakwaadabise baa di ke,

na bapɛtɛɛna mɔ kaa di ke.

18 Abɔɔ atooro kyaa keŋ ŋe dana maŋ gyakoloŋ,

anaara te mɔɔ ne nyii ŋe man ya.

19 Otoloku ke furufu adido,

dom gbɛɛ kpanaŋ dɔɔ,

pantuu dinaa gbɛɛ loŋ dɔɔ,

na baale gbɛɛ alebu gyaŋ.

20 Alo ŋon ɔ na mo ayimɛɛ wuu ɔ wose gbɛɛ yaa,

ɔ ne dii na ɔ ta feefo ɔ nɔɔ

na ɔ kpa nyiaa, <Ma te yɛɛ kolokum ya.>

21 Abɔɔ atooro tɛɛ te tɛɛle ne seree,

anaara te ɔ be tale seele ya.

22 Gbeŋi ŋon ɔ be kaa bese gyoo,

diyiŋte ŋon ɔ be dii baa nideli,

23 Alo ŋon ŋolo bɛɛ gyae e ya de nyiŋ baale,

na alebu ŋon ɔ be kaa lɛo ɔ gbeŋgyoo alo baale.

24 Abɔɔ anaara yɛna buruburu tɛɛle dɔɔ,

mɔna ŋe sia te kare nideli.

25 Kameleese be dana doŋ ya,

mɔna bɛɛ see be weenɛɛ dugbututɛɛ.

26 Gbegyagbegyase be dana doŋ ya,

mɔna bɛɛ yɛɛ ba adoise bo kpanaŋse man.

27 Akpataana be dana gyoo ya,

mɔna bɛɛ tɛɛ akpiise man.

28 Nyaŋ ke tale mo n nyiŋmaa kyaŋ denite,

mɔna gyooro dekpaŋalaŋ man te ɔ kyaa.

29 Abɔɔ atooro keta man dana kyeo,

anaara ne tɛɛ gyooro keta.

30 Dinaate yɛna wonembia pou man doŋte,

ɔ bee yee kolo na kolo ya.

31 Kegyim baale, asoo baale,

na gyoo ŋon ɔ dɔŋ ɔ balaŋ siaman.

32 Nyi n yɛɛ diyiŋ gyina n wose adido,

yaa n gyueŋ dukum,

mo n nyiŋmaa gyɔ n nɔɔ dɔɔ.

33 Nyi n ŋmaase wonembu dide na nuŋ na lee,

nyi n boa n memɔɔ keŋkeŋ na fatabo na lee,

mena te n gyeŋ baŋ beiŋ na kale ne kɔŋ.