1 Na gyɔ n konɔɔ lee kyoo dɔɔ ya,

nawolo nyi n ba gyeŋ keŋ gyae ke kɔŋ kyoo ya.

2 Yela ŋolo kpoo ke kɛlɛɛ neŋ, na nyaŋ gbagba ya,

yenaŋte, na lee nyaŋ gbagba nɔɔman ya.

3 Boe dana yuŋ te aŋasa yɛɛ kasolɔ ke,

mɔna diyiŋte da gyeŋ baŋ na, ke dana yuŋ kela ŋa ala pou.

4 Baŋ dana nyeeman ŋɔe na baŋkum,

mɔna amɔte ne gyaela waa tale seŋ nuŋkurili siaman?

5 N kalena walaŋ na,

dei kela ɔ yɛɛ dukum na n ke kyaŋ n sia wuu.

6 Nyi n gyoo da tenee neŋ na n ke tale mo n wose lɔ ɔ dɔɔ,

mɔna n kɔlare de pukaa neŋ na kɛɛ e nideli.

7 Ŋon ɔ be baa nɛ teebɔɔ bɛɛ gyɔ e loo ya,

mɔna ŋon tanam na ko e nɛ, kolo ŋaŋte koraŋ dana e gyoŋ.

8 Mena keŋ gyeebu be furufu lee ɔ desaa man nɛ,

mena te ŋon ɔ be yeu lee ɔ dɛɛ nɛ doo.

9 Lafenta na oliifi ne yele walaŋ wɔe ne fɛɛ e,

mɔna gyoo kpaakpaa kekolosifa,

dei kela.

10 Na bɛɛ n gyoo yaa n kya ɔ gyoo ya,

nyi nombii de yala neŋ nɛ na gyu n loŋto dɛɛ ya,

nawolo nyi n dɔɔ ŋon ɔ benaana neŋ dei kela n loŋto ŋon ɔ kyaa lem.

11 Me bu, yela n sia ke kara na n ke yela maa nyaŋee me konɔɔ man,

na maa nyiŋ tale tiranɔɔ fa baŋ bee kulu maŋ nɛ.

12 Siakaralate ne naa nombiikum na ɔ te yeu ka yo,

mɔna ŋon ɔ ba gyeŋ daale ya ne tɛɛ bo ka gyoo ke man, na ɔ te nyiŋ deŋele kewɔŋ.

13 Mo ŋon ɔ ba sem ŋɔɔle ŋolo kom nawɔɔ man kegba,

na n ka mo ke see kom keŋ nae.

14 Ŋon ɔ karatɛɛ nebo nebo mo yeesa hiraa ɔ dɔɔ nɛ,

baa mo ke nyi ke yɛɛ kefaala ke.

15 Alo yalale kale gyaere yɛɛ ŋgba deni,

keŋ ne lilii dekpaotɛɛ nɛ.

16 Ŋon ɔ kpa waa tɔ e gbɛɛ yɛɛ ŋgba ŋon ɔ ne tɔ feliŋ gbɛɛ,

yaa waa mo ɔ nyiŋmaa tee nuŋ nɛ.

17 Mena keŋ nyeele ne sara nyeele nɛ,

mena te walaŋ mɔ na wola walaŋ.

18 Ŋon ɔ ne gyee fiigi daŋ ne diina ke bia,

te ŋon ɔ ne gyee ɔ gbeŋgyoo nɛ baa do e obuo.

19 Mena keŋ walaŋ ne naa ɔ siagbɛɛ loŋ man nɛ,

mena te walaŋ konɔɔ na lese ɔ dinɔɔ wola.

20 Yeŋ na woyadɛɛ bɛɛ baa ya,

mena te walaŋ sibii mɔ bɛɛ baa ya.

21 Bɛɛ mo boalaŋ gyene kɔba wolom te bɛɛ mo boalaŋ degyapaa gyene kɔba yayam,

mɔna walaŋ kekɛlɛɛ te bɛɛ mo gyeŋ mena keŋ ɔ doo.

22 Nyi n sɔɔ diyiŋte soi man,

nyi n mo sɔɔdaŋ sɔɔ e ŋgba wamela koraŋ nɛ,

n be gyae n ke tale lese ɔ diyiŋ lee ɔ man ya.

23 Kɛɛ nideli nyi n gyeŋ n namense kedoobii man,

tee n sia kɛɛ n nunkyuese nideli.

24 Nawolo nyi wosekenyiŋ be gyae ke doo kekpaakekpaa ya,

te gyoorikedi mɔ be gyae ke doo fa kalola kegyakaarese pou ya.

25 Nyi be kɛrɛɛ ŋalese te wɔlɛɛ de tuu,

te be yilaa ŋalese lee bulase dɔɔ nɛ,

26 n namensebia baa fa neŋ wose man abɔɔ,

na nya asoose ke fa neŋ tɛɛle.

27 N ke nyiŋ asoose dideloŋ burum kɛɛ ɛmɛɛ na n denimantena,

na nya alebia dɔɔ.