1 Me bu, akpaa n lɛɛ me nombia do,

te n mo maŋ mmaraase do n konɔɔ man,

2 te n see deŋele tei nyansa,

te n mo nombia man kenyii do n konɔɔ man,

3 te n yase n sia gyoo ŋe man,

te n baake nombia man kenyii keŋkeŋ,

4 te n kɛo ke ŋgba kɔba wolom,

te n yase sia kɛo ke ŋgba kolo kpaakpaa keŋ weesɛɛ nɛ,

5 kenaŋ na n ke nyii Degbeŋgyoo keyee nawolo,

na n kena Wurubuarɛ nombia kagyeŋ man.

6 Nawolo nyi Degbeŋgyoo ne faana nyansa,

ɔ nɔɔman te nombia man kagyeŋ na nombia man kenyii na lee.

7 Ɔ ne desina kede see fa baŋ be gbɛɛneŋ tenɛɛ,

ŋon yɛna baŋ nombiikum be doo ba kekyaabii man ya nɛ yoo nyeele pampasaŋ.

8 Nawolo nyi ɔ ne gyee baŋ bee di nombia kegbɛɛ dɔɔ nɛ gbɛɛneŋ,

te ɔ ne kɛɛ baŋ bee di anokoare fa e nɛ keta man.

9 Kenaŋ na nyaŋ ke nyii kpene keŋ doona kegbɛɛ, na nombia kedi ke gbɛɛ dɔɔ,

na keŋ siaman kekɛɛ be doo ya na gbɛɛ kpaakpaa kamasɛ.

10 Nawolo nyi nyansa gyae ka gyoo n konɔɔ man,

na nombia kagyeŋ ke yɛɛ neŋ gyoŋ nideli.

11 N nyeeman nombia kpaakpaa gyae ke kɛɛ n dɔɔ,

na nombia man kenyii ke gyee neŋ.

12 Nyansa gyae ke lɛɛ n nyee lee akpanyanyaŋtena gbɛɛneŋ man,

lee baŋ bee tulii nombia nyiŋmaa man.

13 Baŋ bɔɔ tina gbɛɛneŋ ŋan tenɛɛ nɛ yela,

gyu be dɔŋ detiŋtɛɛ gbɛɛneŋ man.

14 Baŋ nombiakumɛɛ keyɛɛ na gyoo be sia,

te bɛɛ nyaŋee lee nombia nkaraŋkaraŋ keyɛɛ man.

15 Baŋ be gbɛɛneŋ be gɛɛse,

te bɔɔ ne di anokoare be gbɛɛneŋ man ya.

16 Nyansa gyae ke lɛɛ n nyee lee alo ŋon ɔ ba mo ayimɛɛ wuu ɔ wose nɛ gyaŋ,

lee alo ohuhoo ŋon ɔ na mo nɔɔwoya gyoŋ nyiŋan beo balaŋ nɛ gyaŋ.

17 Ŋon bɛɛna wa alebiiritɛɛ baale,

te ɔ bɛɛ nɔɔkebakesee keŋ ɔ be yɛɛ Wurubuarɛ siaman nɛ.

18 Ampaŋ ɔ dekpaŋalaŋ ne gyu yeŋ man,

te ɔ gbɛɛneŋ ne gyu woyadɛɛ.

19 Ŋolo bee gyu ɔ gyaŋ bese kɔŋ ya,

yaa waa nyiŋ nyeedoŋ bela ya.

20 Mena dɔɔ ta balaŋ kpaakpaa gbɛɛneŋ man,

na n keta baŋ be gbɛɛneŋ tenɛɛ nɛ dɛɛtɛe man.

21 Nawolo nyi baŋ be gbɛɛneŋ tenɛɛ nɛ ne gyaela baa kyaa tɛɛle keŋ dɔɔ,

na baŋ nombiikum be doo be man ya nɛ ke ka ke dɔɔ.

22 Mɔna baa munu akpanyanyaŋtena lee tɛɛle keŋ dɔɔ,

na baa wɔlɛɛ baŋ bɔɔ ne di anokoare ya nɛ lee ke dɔɔ.