1 Degbeŋgyoo ne kɔla sikelise ŋan bɛɛ mo ŋere balaŋ do,

mɔna sikelise kpaakpaa nyiŋan na gyoo ɔ sia.

2 Akpaa wose kegate de kɔŋ na, desɛŋ mɔ te kɔŋ,

mɔna nyansa ne kyaa bo baŋ bɛɛ yɔkɔse ba wose nɛ gyaŋ.

3 Baŋ be gbɛɛneŋ tenɛɛ nɛ ba anokoare kedi ne gyee wɔ,

mɔna baŋ bɔɔ ne di anokoare ya nɛ ba akɛrɛɛ ne wɔlɛɛna wɔ.

4 Baŋ wee na dedii yɛɛ yakaa,

mɔna gbɛɛ katenee na lese walaŋ lee yeŋ man.

5 Baŋ nombiikum be doo be man ya gbɛɛneŋ katenee na teneena be dɛɛtɛe fa wɔ,

mɔna akpanyanyaŋte nombiakumɛɛ keyɛɛ na moona e lɔ.

6 Baŋ be nombia doona ke gbɛɛ nɛ, be gbɛɛneŋ katenee ne lɛɛna wɔ,

mɔna baŋ bɔɔ ne di anokoare ya nɛ be lookum ne kyaŋana wɔ.

7 Nyi walaŋkum da yem na ɔ lookegyakaa te taŋ,

na ŋan pou bɔɔ yakosee nɛ te yɛɛ yakaa.

8 Baa lese ŋon ɔ gbɛɛneŋ tenɛɛ nɛ lee wose kekyaŋ man,

na ta ke yale akpanyanyaŋte dɔɔ.

9 Ŋon ɔ bee yee Wurubuarɛ ya na mo ɔ nɔɔ wɔlɛɛ ɔ dɔɔ,

mɔna bɛɛ mo nombia kagyeŋ lese ŋon be gbɛɛneŋ tenɛɛ.

10 Nyi ŋon ɔ gbɛɛneŋ tenɛɛ de nyiŋ ɔ wose nɛ, na donɔɔ dinaa keŋ balaŋ ne nyaŋee,

nyi akpanyanyaŋte de wɔlɛɛ na, balaŋ ne nyaŋee fae yeesa.

11 Baŋ be gbɛɛneŋ tenɛɛ kehiraa ne yele donɔɔ dinaa keŋ ne gyu siaman,

mɔna akpanyanyaŋtena nɔɔwoya ne yele bɛɛ yɛlɛɛ ke.

12 Ŋon ɔ ne wɔlɛɛ ɔ dɔɔ ba gyeŋ daale ya,

mɔna ŋon ɔ ne nyii nombia man na do ɔ nɔɔ dokɔŋ.

13 Dekarate na lese nombia aweeseŋ debɔɔ,

mɔna ŋon bɛɛ mo wose lɔ ɔ dɔɔ na weese nombia.

14 Nyi donɔɔ be dana gbɛɛ wolare ya na kɛɛ yɛlɛɛ,

mɔna nyi balaŋ burum ne kolosi fa e na kee yoodi.

15 Ŋon ɔ sem fa ŋɔɔle waa naa diyem,

mɔna ŋon ɔ wɔŋ ɔ wose lee ke man wose ne fɛɛ e.

16 Alo ŋon ɔ ne booli ɔ sia ne nyiŋ obuo,

mɔna baala nyeeman doŋtena ne nyiŋ dedii kaageŋ bo.

17 Baŋ be dana wɔe nɛ yɛɛ deeli bo fa ba wose,

mɔna baŋ be dana nyeemanŋɔe ne di ba wose gyerebi.

18 Akpanyanyaŋte ne nyiŋ kabeo komketɔ bo,

mɔna ŋon ɔ ne duu gbɛɛneŋ katenee ne nyiŋ komketɔ kpaakpaate.

19 Ampaŋ ŋon ɔ gbɛɛneŋ tenɛɛ ne nyiŋ nyeedoŋ,

mɔna ŋon ɔ silana nombiakumɛɛ ne nyiŋ yeŋ.

20 Degbeŋgyoo ne kɔla baŋ bɛɛ gyueŋ nombia kumɛɛ,

mɔna baŋ dukum be doo ba kekyaabii man ya na gyoo ɔ sia.

21 Ke yɛɛ ampaŋ nyi, baa wɔŋ akpanyanyaŋte deŋele,

mɔna baŋ be gbɛɛneŋ tenɛɛ baa nyiŋ ba wose

22 Alo kyeote ŋon ɔ bɛɛ yɛɛ kolo nyansa man ya nɛ,

yɛɛ ŋgba kɔba yayam kɔlabii ke kekuirii memɔɔ man.

23 Keŋ ŋon ɔ gbɛɛneŋ tenɛɛ ne gyae yɛna deili keyɛɛ,

mɔna akpanyanyaŋte lookegyakaa yɛna baŋ.

24 Ŋolo ne faa lee ɔ konɔɔ man, mɔna ɔ ne nyim kpu,

ŋolo mɔ ne yɛɛ nkyekye, mɔna ɔ ne di diyem.

25 Ŋon ɔ ne yɛɛ wɔe ne dee,

ŋon ɔ ne kyɔ balaŋ nɛ, baa kyɔ ŋon mɔ.

26 Balaŋ ne falaa ŋon ɔ ne tɔ wamela see,

mɔna bee hiraa ŋon ɔ ne yɔɔ ɔ wui.

27 Ŋon ɔ ne gyae deeli ne nyiŋ bɛrɛɛ,

mɔna dukum ne kɔŋ ŋon ɔ ne gyae ke nɛ dɔɔ.

28 Baŋ bɛɛ mo ba wose lɔ ba wosekenyiŋ dɔɔ ne yale,

mɔna baŋ be gbɛɛneŋ tenɛɛ ne nyiŋ ba wose ŋgba faareŋ laŋte nɛ.

29 Ŋon ɔ ne naase ɔ dekpaŋalaŋmantena diyem bee nyiŋ kolo ya,

te diyiŋte waa bese siakaralate tobaale.

30 Ŋon ɔ gbɛɛneŋ tenɛɛ kekyaabii yɛɛ ŋgba nyeedoŋ daŋ nɛ,

te ŋon ɔ sia be kare ne lɛɛ balaŋ nyee.

31 Nyi bɛɛ tɔ ŋon ɔ gbɛɛneŋ tenɛɛ kom tɛɛle kei dɔɔ na,

kenaŋ na bɔɔ wɔŋ walaŋkum na dukumyɛɛre deŋele kela yee?