1 Na yoo akpanyaŋnyaŋte nuŋkurili ya,

te na lese e dɔɔre ya.

2 nawolo nyi bɛɛ bake nombiakumɛɛ ba nyeempɔ man,

te be nɔɔwoya ne loo nombia kɔŋ.

3 Nyansa te bɛɛ mo ma deni,

te nombia man kenyii ne yelela kɛɛ sem.

4 Nombia kagyeŋ ne yelela ɔ ne nyiŋ,

abɔɔ ŋan na lee koya te ŋɛɛ gyoo sia nɛ wulu denɛɛ.

5 Siakaralate dana doŋ nideli,

te ŋon ɔ gyeŋ nombia na lese ɔ doŋ wola.

6 Kaboena nyi nya nyiŋ gbɛɛ kawola pɛ n ke gyu yoo,

te balaŋ burum kekolosifa ne fa keyoodi.

7 Nyansa korɛɛ nideli fa ayiŋtena,

bɔɔ ne gyuusu be nɔɔ balaŋ deyilae donɔɔ keŋ denaanɔɔ man ya.

8 Ɔkamasɛ ŋon ɔ ne bake nombiakumɛɛ nɛ,

baa baake nyi tɛɛle yɛlɛɛre.

9 Diyiŋte nyeeman kebake yɛɛ dukum,

te balaŋ ne kɔla ŋon ɔ ne kulu balaŋ.

10 Nyi n wose de tekerii neŋ wose kekyaŋ man nɛ,

na n doŋ yɛɛ peperee.

11 Lɛɛ baŋ bee gyu be kaa ko wɔ nɛ,

lɛo baŋ bee seree nyi bee gyu be kaa kara ba nyee nɛ.

12 Akpaa n yako nyi, <<Kɛɛ, daa ba gyeŋ ke man daale ya nɛ,>>

Ŋon ɔ na gyoo konɔɔse man kɛɛ nɛ ba gyeŋ yee?

Ŋon ɔ ne gyee n woo nɛ ba gyeŋ yee?

Ɔ be gyae waa tɔ walaŋ kamasɛ kom ŋgba mena keŋ ɔ be yɛɛ ɔ tom nɛ yee?

13 Me bu di teebɔɔ, nawolo nyi ke dei,

teebɔɔ keŋ ne kyɔsee lee afaŋalaŋ man nɛ dana neŋ gyoŋ.

14 Gyeŋ mɔ nyiaa nyansa yɛɛ ŋgba teebɔɔ nɛ fa n woo.

Akpaa n nyiŋ ke na, n dana lookegyakaa wee daale,

te n lookegyakaa be gyae ke yɛɛ yakaa ya.

Keyako 27

15 Na deke ŋon ɔ tenɛɛ dekpaŋalaŋ ŋgba akpanyanyaŋte nɛ,

na n kaa kuu wa abɔɔ ɔ dekpaŋalaŋ man ya.

16 Nawolo nyi ŋon ɔ tenɛɛ de yale betabo nyetooro na waa koro bela,

mɔna kayeyɛɛ da mo akpanyanyaŋte lɔ na ɔ te yale kekpaa.

17 Nyi n kɔlare de yale nɛ, na yele ke yɛɛ neŋ gyoŋ ya,

nyi ɔ kpaŋte nɛ, na nyaŋee n konɔɔ man ya.

18 Na mena ya Degbeŋgyoo waa naa te be gyae ke yɛɛ e gyoŋ ya,

na waa lese ɔ baŋ lee ɔ dɔɔ.

19 Na naase n wose diyem nombiakumɛɛ yɛɛra dɔɔ,

yaa n ke yoo akpanyanyaŋte nuŋkurili ya,

20 nawolo nyi nombiakumɛɛ yɛɛra be dana lookegyaa fa weedaale ya,

te akpanyanyaŋte kanea gyae ka yeŋ.

21 Me bu, yee Degbeŋgyoo na gyoo ŋon,

te na mo n wose dona baŋ bɛɛ seŋ tia wɔ nɛ ya,

22 nawolo nyi kewɔlɛɛ gyae ka lee be bala gyaŋ karatetee kɔŋ be dɔɔ,

te amɔte gyeŋana kayeyɛɛ keŋ gyae ka lee be bala gyaŋ kɔŋ?

23 Kɛŋa mɔ yɛɛ siakekara nombia keyako ŋa,

Walaŋ siaman kekɛɛ nombia kedi man be dei ya.

24 Ɔkamasɛ ŋon ɔ yako ŋon ɔ be di fɔɔ nɛ nyi, <<N nombia dei,>> nɛ,

balaŋ baa falaa e na tɛɛlese balaŋ ke bɛɛ e.

25 Mɔna gyae ke de fa baŋ bee bu ŋon ɔ nombia be dei ya fɔɔ nɛ,

na baa nyiŋ kehiraa nideli.

26 Ŋon ɔ ne yako neŋ anokoare nɛ,

ŋon ne gyaena neŋ nideli.

27 Yɛɛ n debɔɔman tomse,

na n ke fara n wɔɔ,

kenaŋ wɔle na n ke baŋ n dekpaŋalaŋ.

28 Na di adansɛɛ tia n dɔɔ yakaa ya,

te na beo balaŋ ya.

29 Na yako nyiaa, <<Maa yɛɛ e ŋgba mena keŋ ɔ be yɛɛ maŋ nɛ,

maa tɔ e keŋ ɔ be yɛɛ maŋ nɛ kom ya.>>

30 Me tɛɛwɔ kebɔŋalete ŋolo wɔɔ man,

na diyiŋte ŋolo gerepo wɔɔ man.

31 Kɛɛ, sɔɔse te lɛɛ wɔɔ keŋ pou,

te ŋalese wuu tɛɛle keŋ,

te boya dekyaŋ keŋ yɛlɛɛwɔ.

32 Keŋte me kɛɛwɔ te ma gyueŋ ke man nideli,

te me kasee nombia lee keŋ mɔɔ naa nɛ man nyiaa,

33 Dosoroŋ kyomii, kedeŋeli kyomii,

nyiŋmaase kamo do yoolaase man fɛɛfo kyomii nɛ,

34 diyem gyae kaa futaa neŋ ŋgba ŋmɛɛlate nɛ,

te n wose gyae ke kyaŋ neŋ ŋgba dekpaŋkpasare ŋmɛɛlate ne kuu abɔɔ nɛ.