1 Yele kpaakpaa dei kela wose kenyiŋ,

obuo dei kela kɔba wolom yaa kɔba yayam.

2 Kolo dokoloŋ doola fa ŋon ɔ be nyiŋ ɔ wose na diyemte,

Degbeŋgyoo yɛɛna be popou.

3 Siakaralate ne naa kayeyɛɛ keŋ ne kɔŋ na ɔ te yeu ka yo,

mɔna ŋon ɔ ba gyeŋ daale ya ne tɛɛ bo kagyoo ke man na ɔ te nyiŋ deŋele kewɔŋ.

4 Wose keyɔkɔse yɛna Degbeŋgyoo keyee,

ka kom ketɔ yɛna wosekenyiŋ na obuo na nyeedoŋ.

5 Kɔtase na sɔɔse doo akpanyaŋnyaŋte gbɛɛneŋ man,

mɔna ŋon ɔ ne gyee ɔ nyee ne wɔŋ ɔ wose lee ŋe gyaŋ gyu lemlem.

6 Wola biikyaa gbɛɛ kpaakpaa keŋ waa mo kyaa,

akpaa ɔ bee na ɔ ba lee ke dɔɔ ya.

7 Ŋon ɔ be nyiŋ ɔ wose ne di diyemte dɔɔ,

te ŋon ɔ ne paa kɔba nɛ yɛɛ gbeŋi fa ŋon ɔ be paa e nɛ.

8 Ɔkamasɛ ŋon ɔ duu nombia ketulii kegbɛɛ dɔɔ ne kara kayeyɛɛ bo,

te ɔ baŋ gbutu gyae ke tekeri

9 Baa hiraa ŋon ɔ ne gyae deeli keyɛɛ,

nawolo nyi ɔ ne kpɛlɛɛ ɔ weenɛɛ fa ayematena.

10 Gegi ŋon ɔ ne kulu balaŋ na yoo ke fɛɛ,

na kale na tuubia ke taŋ.

11 Ŋon ɔ ne gyae konɔɔ kpaakpaa te ɔ ne kekolosi bɛrɛɛ man nɛ,

gyoo waa mo e dɔɔre.

12 Degbeŋgyoo sia gyakaa nombia kagyeŋ dɔɔ,

mɔna ɔ ne bɛɛ ŋon ɔ bee di anokoare ya nɛ nɔɔwoya.

13 Kebɔŋalete ne yakola nyi <<Dinaate kyaa debɔɔman.

Waa ko maŋ gbɛɛnaa man.>>

14 Alo ŋon ɔ na mo ayimɛɛ wuu ɔ wose nɔɔ yɛɛ bɔɔ kyilimkyilim ke,

baale ŋon Degbeŋgyoo baŋ gyakaa ɔ dɔɔ waa yala gyoo ke man.

15 Diyiŋ nombia te milii biikyaa konɔɔ,

katenee dambila te bɛɛ mo booli ke.

16 Ŋon ɔ na ŋere diyemte do na waa mo nyiŋ agyapadɛɛse,

na ŋon ɔ ne fa ŋon ɔ be nyiŋ ɔ wose abɔɔ nɛ, be popou na bese ayematena bo.

17 See deŋele na n ke tei siakekara nombia,

gyueŋ me kawola man nideli.

18 Kaboena nyi nya mo ŋa do n konɔɔ man,

na n ke tɔɔse ŋe popou n nɔɔwoya man.

19 Keŋ n ka mo n wose lɔ Degbeŋgyoo dɔɔ,

dɔɔ te mɛɛ wola nyaŋ gbagba ŋa gyɛŋ.

20 Ma te ŋmarase nombia saonakufu fa neŋ,

keŋ kekolosifa na nombia kagyeŋ doo ŋe man.

21 Me ta wola neŋ nyi nya di anokoare na n ke kolosi anokoare,

na n ka mo anokoare nɔɔketira

gyina baŋ bɔɔ kpila neŋ nɛ yee?

22 Na wurutii diyemte nyi keŋ ɔ yɛɛ diyemte e dɔɔ ya,

te na ŋere ŋon ɔ be dana kolo ya nɛ do nombia dedii man ya,

23 nawolo nyi Degbeŋgyoo waa di be nombia fa wɔ,

na waa yɛɛ neŋ keŋ n be yɛɛ wɔ nɛ tɔ kom.

24 Na mo ŋon ɔ be dana konɔɔ ya nɛ dɔɔre ya,

te na mo n wose dona ŋon ɔ na gyeŋ baŋ bileŋbileŋ nɛ ya,

25 na mena ya n ke kasee be gbɛɛneŋ,

na n ka mo n wose do kɔta man.

26 Na sem ŋolo kom nawɔɔ man,

yaa n ka mo kolo see kom keŋ nae ya.

27 Akpaa n te nyiŋ kolo tɔ kom keŋ ya na,

baa lɛo n dofoŋoŋ keŋ dɔɔ n doo nɛ gba.

28 Na kyɛɛkee wulu bene,

keŋ n naanaɔ ba doo nɛ ya.

29 N ne naa nyiŋmaa man tomyɛɛre ŋon ɔ gyeŋ ɔ tom keyɛɛ nideli?

Waa som gyooneŋ,

ɔ be gyae waa som balaŋ baŋ bɔɔ dana dedii ya.