1 Denibalaŋ ne bake ba nyeeman,

mɔna Degbeŋgyoo nɔɔketira yɛna kpaakpaate.

2 Ne yɛɛ walaŋ nyi ɔ gbɛɛneŋ pou dei fa e,

mɔna Degbeŋgyoo na gyoona ŋe man kɛɛ.

3 Mo n kpene kamasɛ do Degbeŋgyoo nyiŋmaa man,

na waa yela n nyeeman kebake pou ka seŋ.

4 Degbeŋgyoo gyeŋ keŋ dɔɔ te ɔ ne yɛɛ kpene kamasɛ,

akpanyanyaŋte koraŋ ɔ te desina e fa nombiikum wee.

5 Degbeŋgyoo ne kɔla baŋ pou be dana agaŋtaŋ.

Ke yɛɛ ampaŋ. De yɛɛ senaa waa wɔŋ ba deŋele.

6 Kegyae taŋ ɔto ya na anokoare kedi te bɛɛ mo pataa dukum keyɛɛ,

Degbeŋgyoo keyee ne yelela walaŋ ne wɔŋ ɔ wose lee dukum man.

7 Nyi ŋolo gbɛɛneŋ da gyoo Degbeŋgyoo sia nɛ,

ɔ ne yele ŋon na ɔ kɔlara ne kyaa wosefɛɛreŋ man.

8 Kolo kyomii kenyiŋ lee katenee gbɛɛ man dei,

kela abɔɔ burum kenyiŋ lee nombia ketulii gbɛɛ man.

9 Deniwalaŋ ne bake bo ɔ nyeeman,

mɔna Degbeŋgyoo na wolana ɔ nawɔɔ kekulu man.

10 Gyoo kekolosi lee Wurubuarɛ gyaŋ,

te ɔ nɔɔ bee tulii keŋ doona ke gbɛɛ ya.

11 Sikeli na abɔɔ kekeri kpaakpaate yɛɛ Degbeŋgyoo wui,

ŋon doona kasolɔse ŋan pou doo kotoku man nideli.

12 Gyooneŋ ne kɔla nombiakumɛɛ keyɛɛ,

nawolo nyi ba see gyoorogbeli bo katenee gbɛɛ dɔɔ.

13 Anokoare nombia kekolosi na gyoo gyooneŋ sia,

te bɛɛ gyae ŋon ɔ ne kolosi keŋ tenɛɛ.

14 Gyoo baŋ yɛna yeŋ kpilare,

mɔna siakaralete ne fɛɛ ɔ wɔe.

15 Nyi gyoo de booli ɔ sia nɛ, na mo nyeedoŋ kɔŋ,

ɔ bɛrɛɛ yɛɛ ŋgba weenɛɛ keduutɛɛ ɔga nɛ.

16 Nyansa kenyiŋ dei kela kɔba yayam,

nombia man kagyeŋ dei kela kɔba wolom.

17 Baŋ be gbɛɛneŋ tenɛɛ ne kɔla dukum keyɛɛ,

baŋ bɛɛ kɛɛ ba keta man ne gyee ba nyeedoŋ.

18 Agaŋtaŋ na mo walaŋ gyu kewɔlɛɛ man,

wose kegyina ne yele walaŋ ne yale.

19 Dei nyi nya yɔkɔse n wose kpuna baŋ bɛɛ ŋere wɔ do nɛ,

kela ɛmɛɛ na agaŋtaŋtena ke kpala yoo abɔɔ.

20 Ɔkamasɛ ŋon ɔ ne tei nombia kawola nɛ abɔɔ ne dee fa e,

te ŋon ɔ na mo ɔ wose lɔ Degbeŋgyoo dɔɔ nɛ, ŋonna nyeebam.

21 Bɛɛ yako nyi siakaralate ne nyii nombia man,

te nɔɔwoya gyoŋ nyiŋan na do walaŋ kakyeŋ na waa yɛɛ keŋ dei.

22 Nyansa yɛna nyeedoŋ loŋ deepue lee fa ŋon ɔ dana nyansa,

mɔna diyiŋ nombia na mo deŋele kewɔŋ kɔna ayiŋtena.

23 Siakaralate ne kɛɛ ɔ kekolosi man nideli,

te ne yele ɔ nɔɔwoya na do balaŋ kakyeŋ na baa yɛɛ keŋ dei.

24 Nɔɔwoya gyoŋ nyiŋan yɛɛ ŋgba teebɔɔ nɛ,

dana walaŋ woo gyoŋ te ŋɛɛ kyɔ e kaweese.

25 Gbɛɛ daale doo keŋ ne yɛɛ walaŋ nyi ka tenɛɛ,

mɔna kɔ ɔto ne gyu yeŋ man.

26 Ne gyɔ paate loo nyi waa yɛɛ tom nedoŋ,

tanam ne tɛɛsena e do ke man.

27 Ɔhuhoo ne bake dukum,

te ɔ nɔɔwoya yɛɛ ŋgba boalaŋ keŋ ne kpaa nɛ.

28 Ŋon ɔ ne tulii nombia na mo kale kɔŋ,

te kelaberetaore ne tira dɔɔna nsana.

29 Nyeeman detiŋtɛɛte na beo ɔ dɔɔ,

na ɔ ta mo e ta detɛekum man.

30 Ɔkamasɛ ŋon ɔ ne gyɔ sia kpabeekpabee na gyueŋ nombia ketulii,

ɔkamasɛ ŋon ɔ ne tao ɔ kela na ɔ ne yɛɛ dukum.

31 Keŋmɛ yɛɛ obuo ke,

katenee man te bee nyiŋ ke.

32 Ŋon ɔ ne nyiŋ konɔɔ dei kela baalabiiri,

ŋon ɔ ne di ɔ wose dɔɔ dei kela ŋon ɔ ne lɛo donɔɔ dinaa.

33 Bɛɛ lɔ boe mo kɛɛ nombia man,

mɔna Degbeŋgyoo gyeŋana keŋ gyae kekɔŋ gbagba.