1 Me bu, di me nombia dɔɔ,

na n ka mo maŋ mmaraase do n konɔɔ man.

2 Di maŋ mmaraase dɔɔ na n ke kyaa nyeedoŋ man,

gyee me kawolase ŋgba n sibiibii nɛ.

3 Mo ŋa bake n nyiŋmaa,

mo ŋa do nya nyeempɔ man.

4 Yako nyansa nyi, <<Nyaŋ yɛna me deesi,>>

na n ke yako nombia man kenyii nyi,<<Nyaŋ yɛna ma loŋto.>>

5 Baa lɛɛ neŋ lee alo ŋon ɔ na mo ayimɛɛ wuu ɔ wose nɛ nyiŋmaa man,

lee alo ŋon ɔ na mo nɔɔwoya gyoŋ nyiŋan beo balaŋ nɛ nyiŋmaa man.

6 Me ka seŋ ma dekpaŋalaŋ nfansere man nɛ,

ma doo me sibii kɛɛ debɔɔ man.

7 Me naa baŋ bɔɔ gyeŋ daale ya,

ma gyene tewulɛɛ baŋ man,

me naa tobaale diyiŋte ŋolo.

8 Ɔ moo gbɛɛ keŋ ne gyu alo ŋon kebɔtala man,

mo ɔ sia tee alo ŋon dɛɛ gbɛɛ.

9 Ke yɛɛ balinɔɔ keŋ tɛɛ ne biri,

tɛɛ kee yuu keŋ detiŋtɛɛ tuum ba gyoo nɛ.

10 Keŋte alo ŋon leewɔ kaa gyaŋeena e,

ɔ doona abɔɔ ŋgba futooli alo nɛ na ke gyɔ e loo.

11 Ɔ te lɛɛ ɔ wose te ɔ na wola ɔ wose,

ɔ bɛɛ kyaa ɔ mokɔɔ dɔɔ ya.

12 kyomii na ɔ kyaa gbɛɛnɔɔ man, kyomii na ɔ kyaa balaŋ dɛɛgyaŋee man,

ɔ na yoo deke kebɔtala kamasɛ man.

13 Ɔ kyaŋa tobaale ŋon te ɔ pukaa e,

ɔ moo kegyae sia kɛɛ e yako e nyiaa,

14 <<Gyɛŋ ma te tɔ ma alaŋaŋ,

te me dana wosefɛɛreŋ kedeesa weenɛɛ me dɛɛ.

15 Mena dɔɔ te ma leewɔ kaa gyaŋeena neŋ.

me kɛo neŋ te me naa neŋ.

16 Me ta mo kanyaŋ keŋ bɔɔ mo Igyipite ŋmeeseŋ ŋan ŋa loŋse yɛɛ kpookpoo loo nɛ,

lɔ ma dofoŋoŋ dɔɔ.

17 Me ta mo lafenta ofoŋte,

keŋ bɔɔ mo adudo na pɛperɛ na sinamɔn yɛɛ nɛ ŋmatee ma dofoŋoŋ dɔɔ.

18 Kɔŋ de kaa di gyoŋ naasetɛɛ,

dɛɛ mo kegyae pukaa dɔŋa nideli.

19 Me baale be kyaa ya,

ɔ te lam gbɛɛ lemlem.

20 Ɔ moo kɔba burum do ɔ kotoku man,

waa di gyaalaŋ dokoloŋ pɛte waa kɔŋ.>>

21 Ɔ moo ɔ nɔɔwoya gyoŋ nyiŋan yela ɔ yoo gbɛɛ,

ɔ moo kekolosi gyoŋgyoŋ beo e.

22 Debokenaŋ man te ɔ sila e,

ŋgba nunkyue baale ŋon bee gyu be kaa ko nɛ,

ŋgba ŋaa na gyoola kɔta man nɛ.

23 Kelii debaŋ keŋ baŋdaŋ nyeele be sɔɔ e gyoo ɔ wɔɔsa man,

ŋgba gyeebu barasela ka gyoo kɔta man nɛ,

na ɔ ba gyeŋ nyi gyae ka mo e gyu yeŋ man ya.

24 Nɛnɛɛ ao me bia, ɛ tei maŋ,

ɛ nyii keŋ maa yako.

25 Na yele n konɔɔ ke kyɛɛkee gyu ɔ gbɛɛneŋ man,

yaa n ke kpase mo ɔ detɛe man ya.

26 Ɔ te yele balaŋ burum te yale,

ɔ ta koe balaŋ burum keŋ n be tale kala ya.

27 Ɔ dekpaŋalaŋ yɛna yebɔɔ gbɛɛ dinaa,

keŋ na mo gyoo yeŋ deni tɔɔmante man.