1 Ŋon ɔ bɛɛ mo ɔ wose dona balaŋ ya ne sila keŋ dei fa e bo,

te ɔ na sem tia nyeempɔ kpaakpaa kamasɛ.

2 Nombia man kenyii bɛɛ gyoo ayiŋtena sia ya,

mɔna keŋ doo be man kaageŋ te bɛɛ lese yako.

3 Akpanyanyaŋ na mo sia kamo tiu tɛɛle kɔŋ,

te desɛŋ na mo balaŋ kaboŋo kɔŋ.

4 Siakaralate nɔɔwoya yɛɛ ŋgba ɛpo siiliŋ nɛ,

mɔna nyansa yɛɛ ŋgba boo keŋ ne lam nɛ.

5 Tekaboena nyi baa seŋ akpanyanyaŋte wɔle,

na baa ŋere ŋon ɔ nombia dei nɛ do nombia kedi kegbɛɛ man ya.

6 Diyiŋte nɔɔwoya na mo kale kɔŋ,

te ɔ kekolosi ne kɔna ketuku.

7 Diyiŋte nɔɔwoya na moona e do nombia man.

te ɔ kekolosi ne nyɔɔna e kɔta.

8 Kelaberetaore nɔɔwoya yɛɛ ŋgba weenɛɛ gyaagyi nɛ,

ŋɛɛ gyoo walaŋ debaa man nideli.

9 Ŋon ɔ bɛɛ do kakyeŋ ɔ tom man ya nɛ,

ɔ loŋto yɛna abɔɔ wɔlɛɛre.

10 Degbeŋgyoo yele yɛɛ dekagya doŋte ke,

baŋ ba tenɛɛ ne yeu gyu ke man kenyiŋ kegyee.

11 Kɔbate nyeempɔ yɛna nyi wa dedii yɛna ɔ donɔɔ dinaa doŋte,

ɔ kɛɛ ke nyi ke yɛɛ dekyaŋ keŋ ka korɛɛ nideli.

12 Wose kegate na mo keyala kɔŋ,

mɔna wose keyɔkɔse na mo obuo kɔŋ.

13 Nombii nɔɔketira pɛte n ne tei ke nɛ,

yɛɛ diyiŋ na desɛŋ ke.

14 Kakyeŋ kado ne yele walaŋ na sem kawee man,

mɔna amɔte ne gyaela waa tale seŋ wose ketekerii man?

15 Ŋon ɔ ne nyii nombia man ne nyiŋ nombia kagyeŋ,

te siakaralate deŋela ne kɛo ke.

16 Kefa na toro gbɛɛ,

na ta mo ŋon ɔ ne faa nɛ gyu kegyiise siaman.

17 Nombia dedii man nɛ, bɛɛ kɛɛ kolosire gyaŋgbate nyi ɔ nombia dei,

kelii debaŋ keŋ ɔ dɔɔ ŋon waa kaa bɔɔse e nombia.

18 Boe kelɔ ne yele kale ne fɛɛ,

te kɛɛ pataa doŋtena nsana.

19 Loŋto ŋon bɔɔ yɛɛ e dukum dana doŋ nideli kela donɔɔ dinaa keŋ bɔɔ baŋ dekyaŋ kilisi ke,

kale yɛɛ ŋgba gyooro dekpaŋalaŋ keŋ bɔɔ do ke nyeele denaanɔɔ nɛ.

20 Nombia ŋan na lee walaŋ nɔɔman ne wuluna ɔ tɔɔ,

keŋ na lee ɔ kekolosi man ne yelela ɔ ne baa.

21 Nyeedoŋ na yeŋ doŋ doo laakem man,

ŋon ɔ ne gyae ke waa di ke bia.

22 Ŋon ɔ nyiŋ alo kpaakpaa yala na ɔ te nyiŋ kolo kpaakpaa,

na Degbeŋgyoo boele e baa.

23 Diyemte na mo kewaase bo kolosi,

mɔna kɔbate ne tiranɔɔ bo pataapataa.

24 Ŋon ɔ dana dɔɔna baŋ bɔɔ na mo wose lɔ be dɔɔ ya ne tale wɔlɛɛ e,

mɔna dɔɔ ŋolo kyaa keŋ ɔ ne mataa kela loŋto.