1 Akpanyanyaŋtena ne yeu keŋ ŋolo bee gegi e ya,

mɔna baŋ be gbɛɛneŋ tenɛɛ dana konɔɔ ŋgba dinaate nɛ.

2 Nyi tɛɛle daale bee di mmaraase dɔɔ ya nɛ, ne yele siamantena baŋ ne kyɛɛkee bileŋbileŋ,

mɔna siamante ŋon ɔ sia be kare te ɔ gyeŋ nombia ne kyaa gbeli kyare.

3 Diyemte ŋon ɔ na ŋere ayematena do nɛ,

yɛɛ ŋgba ɔga ŋon ɔ ne wɔlɛɛ weenɛɛ nɛ.

4 Baŋ bɔɔ ne di mmaraa dɔɔ ya nɛ ne kɛlɛɛ akpanyanyaŋtena,

mɔna baŋ bee di mmaraa dɔɔ na sem tia wɔ.

5 Nombiakumɛɛ yɛɛra bee nyii keŋ doona ke gbɛɛ man ya,

mɔna baŋ bɛɛ kɛo Degbeŋgyoo ne nyii ke man nideli.

6 Diyemte ŋon nombiikum be doo ɔ man ya dei,

kela kɔbate ŋon ɔ gbɛɛneŋ ba tenɛɛ ya.

7 Bu ŋon ɔ ne nyii nombia man ne di mmaraase dɔɔ,

mɔna bu ŋon ɔ na mo ɔ wose dona kedikumtena na do ɔ kya desɛŋ.

8 Ɔkamasɛ ŋon ɔ nyiŋ ɔ wose lee loŋ kelɛɛ gyakaa kɔba dɔɔ beiŋ man nɛ,

ɔ ne yilaa ŋa bo see fa ŋon waa wii diyemte waraŋase nɛ.

9 Nyi ŋolo da besena ɔ nimboo tee nombia kawola ŋan nɛ,

ɔ kefane koraŋ yɛɛ anekɔlaŋ ke.

10 Ɔkamasɛ ŋon ɔ beo ŋon ɔ gbɛɛneŋ tenɛɛ do dukum man nɛ,

waa yala ŋon gbagba bɔɔ man,

mɔna ŋon dukum be doo ɔ man ya waa nyiŋ dedii kpaakpaa.

11 Kɔbate ne kɛɛ ɔ wose nyi ɔ sia te kare,

mɔna diyemte ŋon ɔ ne nyii nombia man ne naa ɔ mokɔɔ.

12 Nyi ŋon ɔ tenɛɛ de dee na balaŋ ne nyaŋee,

mɔna nyi akpanyanyaŋte ne di balaŋ dɔɔ na balaŋ ne gyu ka yo.

13 Ɔkamasɛ ŋon ɔ ne wuu ɔ dukum dɔɔ bee nyiŋ ɔ wose ya,

mɔna ŋon ɔ yako ɔ dukum te ɔ tina ka keyɛɛ yela na baa wii ɔ waraŋase.

14 Ŋon ɔ ne yee Degbeŋgyoo debaŋ kamasɛ nɛ ŋonna nyeebam,

mɔna ɔkamasɛ ŋon ɔ yɛɛ konɔɔyuŋ na waa gyoo kayeyɛɛ man.

15 Akpanyanyaŋte ŋon ɔ ne di ayematena dɔɔ nɛ,

yɛɛ ŋgba dinaate ŋon ɔ ne muusu yaa mokɔɔte ŋon ɔ sibii be yɛɛ nɛ.

16 Gyoo ŋon ɔ bee nyii nombia man ya na ŋere balaŋ do,

mɔna ŋon ɔ ne kɔla gbɛɛkum ka mo nyiŋ wose nɛ waa kyaa kyare.

17 Ŋon be bu e fɔɔ lee walaŋ kako dɔɔ nɛ,

ɔ na wula ŋon gbagba yebɔɔ baa,

ŋolo na lɛɛ e ya.

18 Ŋon nombiikum be doo ɔ kekyaabii man ya waa nyiŋ kegyee,

mɔna ŋon ɔ gbɛɛneŋ be tulii waa yala gyoo bɔɔ man.

19 Ŋon ɔ ne kyaŋ ɔ wose fara waa nyiŋ weenɛɛ burum,

mɔna ŋon ɔ silana abɔɔ ŋan taŋ tɔnɔɔ ya nɛ waa dɔɔ ɔ diyem man.

20 Baa hiraa ŋon ɔ ne di anokoare nɛ nideli,

mɔna baa wɔŋ ŋon ɔ ne yase sia do wosekenyiŋ man nɛ deŋele.

21 Walaŋ siaman kekɛɛ nombia kedi man be dei ya,

mɔna weenɛɛ kyomii dɔɔ walaŋ waa yɛɛ dukum.

22 Nkyekyete ne yase ɔ sia nyi waa nyiŋ ɔ wose,

mɔna ɔ ba gyeŋ nyi diyem doo daana e ya.

23 Ɔkamasɛ ŋon ɔ kalena walaŋ nɛ kɔ ɔto na baa boele e,

kela kabeo nɔɔwoyate.

24 Ɔkamasɛ ŋon ɔ ŋmɛɛle ɔ kya yaa ɔ naa abɔɔ, te ɔ yako nyi <<Ka te yɛɛ dukum ya nɛ,>>

ɔ yɛɛ abɔɔwɔlɛɛre ɔ gyoo e.

25 Ŋon ɔ sia ne yɛɛ abɔɔ na mo kale kɔŋ,

mɔna ŋon ɔ mo ɔ wose lɔ Degbeŋgyoo dɔɔ waa de.

26 Ŋon ɔ ne lɛɛ ŋon gbagba wose di nɛ yɛɛ diyiŋte e,

mɔna ŋon ɔ ne tɛɛ nyansa man waa nyiŋ kegyee.

27 Ŋon ɔ ne fa ayematena nɛ, ɔ wose be gyae ke kyaŋ e ya,

mɔna ŋon ɔ na besena ɔ nimboo tee wɔ nɛ waa nyiŋ kefaalase burum.

28 Nyi akpanyanyaŋte ne di balaŋ dɔɔ na balaŋ ne gyu ka yo,

mɔna nyi akpanyanyaŋte de munu na baŋ ba tenɛɛ ne wuku.