1 Akpaa n kyaa nyi ɛmɛɛ na kegyia ŋolo ke di nɛ,

gyene kpene keŋ doo n siaman nɛ nideli,

2 akpaa n yɛɛ diiri e na,

kyaŋ n wose.

3 Na ŋmaa ɔ weenɛɛ gyoŋ nyiŋan ŋan ya,

nawolo nyi weenɛɛ ŋenaŋ na beo balaŋ.

4 Na naase n wose diyem nyi n ke nyiŋ n wose ya,

yela n sia kekrara na n ke tina mena dinɔɔ kenaŋ yela.

5 N kaa gyɔ sibii naa na, ka te ŋaalaa,

nawolo nyi ke gyae ke tu beŋkelɛɛ,

furufu laŋ adido karatetee ŋgba otoloku nɛ.

6 Nkyekyete de baake neŋ nɛ na di ɔ weenɛɛ beiŋ ya,

na ŋmaa ɔ weenɛɛ gyoŋ nyiŋan ŋan ya.

7 nawolo ɔ yɛɛ walaŋ ŋon nyi,

debaŋ kamasɛ na ɔ na gyueŋ ŋa koya,

waa beo yako neŋ nyi, <<Di na n ke nyɔɔ,>>

mɔna ta lee ɔ konɔɔ man ya.

8 N ke tɔe kyomii keŋ n be dii nɛ,

na n te kɛlɛɛ e yakaa.

9 Na kolosi fa ayiŋtena ya,

nawolo nyi bɔɔ gyae baa lɛɛ n nombia kpaakpaa ŋan do ya.

10 Na kyɛɛkee wulu bene,

yaa n ke lɛo yoyolobiise tɛɛlese ya.

11 Nawolo nyi Wurubuarɛ ŋon ɔ seŋɛɛ be wɔle nɛ dana doŋ,

ŋon ne gyaela waa di be nombia fa wɔ.

12 Mo n konɔɔ sila kawola,

na n ke tei nombia kagyeŋ.

13 Na bɛɛ biikyaa katenee ya,

n mo dambila tuku e na, ɔ be gyae waa yeŋ ya.

14 Mo dambila tuku e,

na n ke lɛɛ e lee yeŋ man.

15 Me bu, nyi n sia de kare n konɔɔ man nɛ,

kenaŋ na me konɔɔ gyae ke fɛɛ maŋ nideli,

16 Akpaa n kolosi keŋ tenɛɛ nɛ,

kenaŋ na ma woo waa nyaŋee.

17 Na yoo dukumyɛɛra nuŋkurili ya,

mɔna yee Degbeŋgyoo debaŋ kamasɛ.

18 De yɛɛ senaa lookegyakaa doo fa neŋ wee daale,

te n lookegyakaa kenaŋ be gyae ke yɛɛ yakaa ya.

19 Me bu, tei na n sia ke kara,

na n ka mo n konɔɔ sila detɛe keŋ tenɛɛ.

20 Na mo n wose dona soloŋ nyɔɔra,

yaa kedikumtena ya,

21 nawolo nyi soloŋ nyɔɔra na kedikumtena baa bese ayematena,

te kedi na kedoo gyae ka mo kakyeŋgbelaase wuu neŋ.

22 Tei n kya ŋon ɔ ba lola neŋ,

te na lese n sia lee n naa dɔɔ ɔ degbanyaaretɛɛ ya.

23 Lɛɛ anokoare te na yɔɔ ke ya,

lɛɛ nyansa na kawola na nombia man kagyeŋ mɔ.

24 Kya ŋon ɔ bu gbɛɛneŋ tenɛɛ waa nyaŋee nideli,

kya ŋon ɔ bu sia be kare waa nyaŋee lee ɔ bu ŋonaŋ dɔɔ.

25 Yela n kya na n naa ke nyaŋee,

yela n naa ŋon ɔ ba lola neŋ nyee ka koro e.

26 Me bu, mo nya nyeempɔ fa maŋ,

na n ke yela me gbɛɛneŋ ka gyoo n sia,

27 nawolo nyi alo ŋon ɔ na mo ayimɛɛ wuu ɔ wose yɛɛ bɔɔ kyilimkyilim ke,

te alo ohuhoo yɛɛ bɔɔ bɔbɔkyee ke.

28 Ɔ ne daa ŋgba ŋmɛɛlate nɛ,

te ɔ ne yele baala baŋ bɔɔ ne di anokoare ya ne wuku.

29 Amɔte doola kaale maŋ? Amɔte ne nyiina weeleŋ?

Amɔte ne gyaena kale? Amɔte na toroŋla?

Amɔte ne lɛɛna gyamɛɛ yakaa? Amɔte sia yasela?

30 Baŋ bɛɛ nyɔɔ waen beiŋ nɛ,

baŋ bɛɛ gyae waen keŋ bɔɔ kyakale kedakee kɛɛ nɛ.

31 Na yele waen keŋ yasɛɛ,

te kee fiu kebia man,

te ne gyɔ neŋ loo nɛ ka beo neŋ ya.

32 Ɔtoman na kɛɛ kyom ŋgba dom nɛ,

ke dana teekum ŋgba dom duguŋte nɛ.

33 N kena gyakoloŋ nombia n sia dɔɔ,

te nyaŋ ke kolosi nombia ŋan taŋ nyee ya.

34 Nyaŋ ke yɛɛ ŋgba ŋon ɔ doo degbele dinaa man ɛpo dɔɔ,

keŋ feliŋ dinaa ne gyɔ ke gyu gyɔ ke kɔŋ nɛ.

35 N ke yako nyiaa, <<Ba ŋmera maŋ mɔna ma te gooli ya.

Be tuku maŋ, mɔna ta wee maŋ ya.

Debaŋ woŋti yaa maa foŋ,

na maa bese nyiŋ soloŋ daale nyɔɔ bela?>>