1 Me bia, ɛ tei ɛ kyaɔ nombia kawola,

ɛ tei ŋa nideli na ɛ ke nyii nombia man.

2 Nombia kpaakpaa yaa mɛɛ wola ŋon,

mena dɔɔ ɛ na bɛɛ me nombia kawola ya.

3 Nawolo nyi na maŋ mɔ yɛɛ bu e fa me kya,

me yɛɛ biikyaabii e te me naa ne gyae me nombia.

4 Keŋte ɔ wola maŋ te ɔ yako maŋ nyiaa,

<<Mo n konɔɔ pou kyaŋ me nɔɔwoya,

di ma mmaraase dɔɔ na n ke kyaa kyare.

5 Gyeŋ nyansa, nyii nombia man,

na wolee me nɔɔwoya yaa n ka lee ŋe wɔle ya.

6 Na bɛɛ nyansa ya, na waa gyee neŋ,

gyae e na waa kɛɛ n dɔɔ.

7 Nyansa kewalaŋ yaa, gyae nyansa,

mo ŋan pou n dana gyae nombia man kenyii.

8 Gyae e nideli, na waa gyina neŋ adido,

pukaa e na waa do neŋ obuo.

9 Waa mo abotire kpaakpaate bake n nyee,

na waa mo gyooro kotɔtɔɔ kpaakpaate wuu neŋ.

10 Me bu tei maŋ, na n ke lɛɛ keŋ maa yako neŋ nɛ do,

na n kulutooneŋ ka bo.

11 Nyansa gbɛɛ yaa ma wola neŋ,

te ma moo neŋ ta gbɛɛneŋ tee dɔɔ.

12 Akpaa n dɔŋ na, kolo be tɔ n nawɔɔ kekulu gbɛɛ ya,

akpaa n yeu na, ne be gyɔ nae ya.

13 Kyaŋ nombia kawola man keŋkeŋ, na tina ke yela ya,

gyee ke nideli, nawolo nyi keŋ yɛna n nyeedoŋ.

14 Na tɛɛ akpanyanyaŋtena dɛɛtɛe man,

yaa n ke ta nombiakumɛɛ yɛɛra gbɛɛneŋ man ya.

15 Bɛɛ ke, na tɛɛ ke dɔɔ ya,

kpase lee ke dɔɔ na n ka mo n gbɛɛ laŋ.

16 Nawolo nyi akpaa ba te yɛɛta dukum ya na bɔɔ ne doo ya,

nyi ba ta wɔŋ ŋolo lɔ ya na, be sibii bee wuu ya.

17 Akpanyanyaŋ keyɛɛ yɛna be weenɛɛ anediŋ,

te nyeemandoŋ keyɛɛ yɛna ba soloŋ keŋ bɛɛ nyɔɔ.

18 Baŋ be gbɛɛneŋ tenɛɛ detɛe yɛɛ ŋgba weese kebɛɛ nɛ,

kɛɛ ŋalakee menɛɛ kelii weese kabee.

19 Mɔ akpanyanyaŋtena gbɛɛ yɛɛ ŋgba detiŋtɛɛ tuum nɛ,

bɔɔ gyeŋ botɔɔ keŋ baa gyɔ nae ya.

20 Me bu, tei keŋ mɛɛ yako neŋ,

see deŋele nyii me nɔɔwoya.

21 Na yele n sia ka lee ŋe dɔɔ ya,

mo ŋa do n konɔɔ man.

22 Nawolo nyi baŋ be nyiŋ ŋa na bee nyiŋ nyeedoŋ,

na wosenaane pou doŋ.

23 Kɛŋa pou wɔle na gyee n konɔɔ,

nawolo nyi ke man te n nyeedoŋ pou na lee.

24 Lese n nɔɔ lee nombia ketulii man,

lese n nɔɔsebia lee nombia kekara gyakaa walaŋ dɔɔ man.

25 Yela n sia ke kɛɛ n siaman tee,

kɛɛ n siaman fee.

26 Kɛɛ n detɛe man nideli,

na n gbɛɛneŋ ke de fa neŋ.

27 Na kpase gyu demena yaa dunoluŋ ya,

wɔŋ n nawɔɔ lee dukum keyɛɛ man.