1 Nyansa te baŋ ɔ deni,

ɔ te baŋ ke pilase nyetooro.

2 Ɔ ta teŋe ɔ naneŋ te ɔ kyakale ɔ soloŋse,

ɔ ta see ɔ tebulu mɔ.

3 Ɔ te kpilii wa alebia, te ɔ ne baake,

lee donɔɔ dinaa keŋ nyeeman nyiaa,

4 <<Ɛmɛɛ baŋ ɛ ba gyeŋ daale ya nɛ ɛ kɔŋ me dɛɛ.>>

Te ɔ yako ayiŋtena nyiaa,

5 <<Ɛ kɔŋ, ɛ di me weenɛɛ,

na ɛ ke nyɔɔ ma soloŋ keŋ mɔɔ kyakale nɛ.

6 Ɛ tina ɛ nombia ŋan ɛ ba gyeŋ ya nɛ gbɛɛ yela na ɛ ke nyiŋ nyeedoŋ,

Ɛ ta nombia kagyeŋ gbɛɛ man.>>

7 Ɔkamasɛ ŋon ɔ desina ŋon ɔ ne kulu balaŋ nɛ, bɛɛ tee e bo,

ɔkamasɛ ŋon ɔ kalena akpanyanyaŋte ne nyiŋ tuubia bo.

8 Na kalena ŋon ɔ ne kulu balaŋ ya, na mena ya na waa kɔla neŋ,

kalana siakaralate, na waa gyae neŋ.

9 Wola siakaralate nombia, na waa bese gyeŋ kpu,

wola ŋon ɔ gbɛɛneŋ tenɛɛ nɛ, na waa bese gyeŋ nombia kpu.

10 Degbeŋgyoo keyee yɛna nyansa kewalaŋ,

te fereŋkyeŋte ŋon nombia kagyeŋ yɛna nombia man kenyii.

11 Nawolo nyi lee maŋ dɔɔ te n weeya gyae ka bo burum,

na kulutooneŋ ke kpu n nyeedoŋ man.

12 Nyi n sia de kare nɛ, n nyansa gyae ke tɔ neŋ kom,

nyi n yɛɛ walaŋ kulure e na, nyaŋ kena diyem nyaageŋ.

13 Alo diyiŋte ne tɔ balaŋ deŋela bo,

ɔ ba gyeŋ daale ya, te ɔ ba gyeŋ kolo ya.

14 Ɔ ne kyaa ɔ dekpaŋalaŋ denaanɔɔ man,

gbeli keŋ doo donɔɔ dinaa keŋ adogbɛɛ nɛ dɔɔ,

15 ɔ ne baake baŋ bɛɛ lam botɔɔ,

baŋ be dɔŋna be gbɛɛ tee bee gyu nɛ,

16 <<Baŋ pou bɔɔ gyeŋ daale ya nɛ ɛ kaa soo me dɛɛ.>>

ɔ ne yako ayiŋtena nyiaa,

17 <<Ŋmɛɛleŋ loŋ dana gyoŋ,

weenɛɛ ŋan bɛɛ yoo di nɛ dana gyoŋ nideli.>>

18 Mɔna bɔɔ gyeŋ nyi woya kyaa botɔɔ ya,

nyi ɔ ŋɔɔla baŋ kyaa yeŋdɛɛ ya.