1 Waen ne kulu balaŋ, te soloŋ doŋte na mo kale kɔŋ,

ŋon ŋe da beo e na ɔ yɛɛ diyiŋte e.

2 Gyoo baŋ kagyeŋ ne ŋmaase ŋgba dinaate kemuusu nɛ,

ŋon ɔ do e baŋ na ɔ ne nyiŋ yeŋ.

3 Walaŋ obuo yɛna n ke wɔŋ n wose lee kale kegyae man,

mɔna diyiŋte kamasɛ ne gyae kale bo bileŋbileŋ.

4 Kebɔŋalete bɛɛ fare kefaratɛɛ ya,

mena dɔɔ weenɛɛ da gyoo na ɔ bee nyiŋ kolo ya.

5 Walaŋ nyeeman kebake yɛɛ ŋgba lee nɛ,

mɔna ŋon ɔ gyeŋ nombia man waa tale wɔŋ ke lee ke man.

6 Balaŋ burum ne yɛɛ ŋgba be dana kegyae keŋ taŋ ɔto ya,

mɔna amɔte ne gyaela waa nyiŋ walaŋ anokoarete?

7 Baŋ ba tenɛɛ nɛ nombiikum be doo ba kekyaabii man ya,

be wɔle na be bia baa yɛɛ nyeebam.

8 Gyoo de kyaa ɔ gyoorogbeli dɔɔ waa di nombia nɛ,

ɔ na gyoo nombia ŋan pou man kɛɛ.

9 Amɔte ne gyaela waa tale yako nyi, <<Me konɔɔ man dei,

ma te gberaa ma wose lee dukum pou man>>?

10 Sikeli na temkuruwaa keŋ bɛɛ mo ŋere walaŋ do nɛ,

Degbeŋgyoo ne kɔla ŋe popou.

11 Bia buruburu gba ba abɔɔ ayɛɛsa te bɛɛ mo naa be dinɔɔ,

nyi be dinɔɔ ŋenaŋ dei te ŋa tenɛɛ.

12 Deŋela ŋan ne nyii na sia ŋan ne naa,

Degbeŋgyoo yɛɛna ŋa ala pou.

13 Na gyae dosoroŋ ya, na mena ya nyaŋ ke di diyem,

na doo ya na n ke nyiŋ weenɛɛ burum.

14 Abɔɔ lɛɛre ne yako nyiaa, <<Be dei ya, be dei ya,

nyi ɔ lam na ɔ ne kɛlɛɛ ɔ wose nyi ɔ te nyiŋ ke kafo.

15 Kɔba yayam doo te kegyaŋase kpaakpaa nyiŋan boe burum,

mɔna nɔɔ keŋ ne kolosi nombia kagyeŋ nombia dei kela kegyaŋase kpaakpaa nyiŋan.

16 Mo ŋon ɔ ba sem ŋɔɔle ŋolo kom nawɔɔ man kegba,

na n ka mo ke see kom keŋ nae.

17 Weenɛɛ ŋan bɛɛ mo gbɛɛkum man nyiŋ dana gyoŋ,

mɔna kenaŋ wɔle na gyae ka bese aŋasa n nɔɔman.

18 N nyii kekolosifa na n nyeeman kebake na sem,

nyi n ne gyu yoo na gyae gbɛɛ kawola.

19 Kelabere ketao na lese nombia aweeseŋ debɔɔ,

mena dɔɔ wɔŋ n wose lee nkpee wose man.

20 Nyi ŋolo de falaa ɔ kya yaa ɔ naa nɛ,

ɔ kanea gyae ka yeŋ detiŋtɛɛ tuum man.

21 Dedii keŋ n peree nyiŋ ke bileŋ nɛ,

nhira be gyae ke doo ke man ɔtoman ya.

22 Na yako nyi, <<Maa tɔ neŋ dukum kei kom,>> ya.

Daa Degbeŋgyoo, ŋon ne gyaela waa yoo fa neŋ.

23 Degbeŋgyoo ne kɔla sikeli keŋ bɛɛ mo ŋere walaŋ do,

temkuruwaa keŋ bɛɛ mo ŋere walaŋ do bɛɛ gyoo ɔ sia ya.

24 Degbeŋgyoo na wolana walaŋ nawɔɔ kekulu,

sena te ŋolo waa tale nyii ŋon gbagba gbɛɛneŋ man?

25 Na barase sɛɛ kom pɛna n kaa gyueŋ ke man ya,

na mena ya na n te nyɔɔ n wose kɔta.

26 Gyoo nyansate na lese akpanyanyaŋtena see yenaŋ,

te ɔ ne wɔŋ be deŋele nideli.

27 Deniwalaŋ weesɛɛ yɛna Degbeŋgyoo kanea,

kɛɛ ŋmaŋee gyoo walaŋ wose man nideli.

28 Kegyae keŋ taŋ ɔto ya na anokoare kedi ne gyee gyoo,

kegyae keŋ taŋ ɔto ya ne yele ɔ gyoorogbeli na sem nideli.

29 Tewulɛɛ gyoorobiiri yɛna be doŋ,

te akpegyiina gyoorobiiri yɛna ba nyee kawolose.

30 Ketuku kɛrɛɛ gyamɛɛ na lese dukum,

te ketuku da gyoo walaŋ wose man nideli na ne desina e.