1 Bu siakaralate ne nyii ɔ kya kawola,

mɔna ŋon ɔ ne kulu balaŋ bɛɛ gyae kekalana ya.

2 Walaŋ nɔɔman nombia man te ɔ ne nyiŋ abɔɔ kpaakpaa,

mɔna nombiakumɛɛ ne gyɔɔna baŋ bɔɔ ne di anokoare ya nɛ loo.

3 Baŋ bɛɛ do be nɔɔ dokɔŋ nɛ ne gyee ba nyee,

mɔna baŋ bee kolosi safelalaa nɛ ne wɔlɛɛ ba wose.

4 Kolo ne gyɔ kebɔŋalete loo, mɔ ɔ bee nyim ya,

mɔna ŋon ɔ na do kakyeŋ ne nyiŋ ŋan pou ɔ ne gyae.

5 Ŋon ɔ tenɛɛ ne kɔla akɛrɛɛ nombia,

mɔna akpanyanyaŋtena ne yɛɛ duwaare nombia,

mo do ba wose desɛŋ.

6 Gbɛɛneŋ katenee ne gyee ŋon ɔ nombia dei,

mɔna akpanyanyaŋ keyɛɛ na soo nombiakumɛɛ yɛɛre lɔ.

7 Ŋolo na beo yɛɛ ŋgba ɔ dana ɔ wose, mɔna ɔ be dana kolo ya,

ŋolo mɔ na beo yɛɛ ŋgba ɔ yɛɛ diyemte e, mɔna ɔ dana ɔ wose nideli.

8 Walaŋ wose kenyiŋ te ɔ na mo tɔ kom lɛɛ ɔ nyee,

mɔna ŋolo bɛɛ ŋmaase diyemte ya mena dɔɔ ɔ be dana kom waa tom ya.

9 Ŋon ɔ tenɛɛ keŋmaŋee ne ŋmaŋee nideli,

mɔna akpanyanyaŋte kanea na yem.

10 Wose kegate na mo kale bo kɔŋ,

mɔna baŋ be dana nyansa ne nyii kekolosifa.

11 Kɔba kenyiŋ lee gbɛɛkum man ne taŋ bileŋ,

mɔna ŋon ɔ ne yilaa kyomii kyomii nɛ ne nyiŋ ke burum.

12 Lookegyakaa keŋ ne dɔɔ wɔle na do konɔɔ kawee,

mɔna kegyaebii keŋ ne kɔŋ mena yɛɛ nyeedoŋ daŋ ke.

13 Ŋon ɔ bɛɛ mo kawola yɛɛ kolo ya na mo ɔ wose do kayeyɛɛ man,

mɔna ŋon ɔ ne di mmaraa dɔɔ waa nyiŋ kom ketɔ.

14 Siakaralate kawola yɛɛ nyeedoŋ lee ke,

keŋ na lese walaŋ lee yeŋ kɔta man.

15 Nombia kedi nideli na gyoo sia,

mɔna ŋon ɔ bee di anokoare ya gbɛɛ na e wɔ gyu kewɔlɛɛ man.

16 Baŋ be sia be kare ne yɛɛ ba abɔɔ nombia kagyeŋ man,

mɔna ayiŋtena na lese be diyiŋ nombia debɔɔ.

17 Kpilare akpanyanyaŋte ne yele kayeyɛɛ ne kɔŋ,

mɔna kpilare anokoarete na mo wosefɛɛreŋ kɔŋ.

18 Ŋon ɔ bɛɛ nyi be na tenee e ya nɛ diyem na desɛŋ ne kyaŋana e.

mɔna ŋon ɔ sɛɛ nyi baa desina e ne nyiŋ obuo.

19 Nyi ŋolo de nyiŋ keŋ dɔɔ ɔ loo gyakaa na ne yɛɛ e gyoŋ nideli,

mɔna ayiŋtena ne kɔla nombiakumɛɛ man kalee.

20 Ŋon ɔ mo ɔ wose dona siakaralatena na ɔ sia ne kare,

te ŋon ɔ mo ɔ wose dona ayiŋtena na ɔ ne naa diyem.

21 kayeyɛɛ ne kuu gyakaa dukumyɛɛra dɔɔ,

mɔna bɛɛ mo abɔɔ kpaakpaa tɔ ŋon ɔ tenɛɛ nɛ kom.

22 Walaŋ kpaakpaa ne tina wa abɔɔkedi yela see ɔ naanasebia,

mɔna bee yilaa dukumyɛɛre dedii see ŋon ɔ tenɛɛ nɛ.

23 Diyemte ne nyiŋ weenɛɛ burum lee awulaa man,

mɔna baŋ bɔɔ ne di nombia kegbɛɛ dɔɔ ya ne kuu ŋa pou laŋ.

24 Walaŋ ŋon ɔ bɛɛ gate dambila ya ne kɔla ɔ bu,

mɔna ŋon ɔ ne gyae ɔ bu na tenee e.

25 Ŋon ɔ tenɛɛ ne nyiŋ weenɛɛ di baa nideli,

mɔna akpanyanyaŋte dɔŋ bo tɔɔ dekpake.