1 Gyoo konɔɔ doo Degbeŋgyoo nyiŋmaa man ŋgba boo nɛ,

botɔɔ keŋ ɔ ne gyae na te ɔ ne yele kɛɛ lam.

2 Walaŋ ne kɛɛ nyi ɔ gbɛɛneŋ pou tenɛɛ fa e,

mɔna Degbeŋgyoo na gyoona konɔɔse man kɛɛ.

3 N ke yɛɛ keŋ tenɛɛ na keŋ doo ke gbɛɛ dɔɔ,

na gyoo Degbeŋgyoo sia kela kedeesa.

4 Wose kegate na agaŋtaŋ,

yɛna akpanyanyaŋtena awulaa, ke yɛɛ dukum ke.

5 Kakyeŋ doore nyeeman kebake na mo tɔnɔɔ kɔŋ,

mɔna wose kaperee yɛɛ kolo na mo diyem kɔŋ.

6 Wose kenyiŋ lee dekara kedi man,

yɛɛ ogyefeliŋ na yeŋ kegyae ke.

7 Akpanyanyaŋtena nombiakumɛɛ ne wɔlɛɛna wɔ,

nawolo nyi ba te bɛɛ keŋ doona kegbɛɛ keyɛɛ.

8 Dukumyɛɛre gbɛɛneŋ ba tenɛɛ ya,

mɔna ŋon ɔ nombia dei gbɛɛneŋ tenɛɛ.

9 Debɔɔlɔɔ man kekyaa nyaageŋ dei,

kela ɛmɛɛ na alo kale gyaere ke kyaa dekpaŋalaŋ man.

10 Nombia kumɛɛ ne gyɔ akpanyanyaŋtena loo,

bɔɔ ne wii be tebia waraŋase ya.

11 Nyi be wɔŋ ŋon ɔ ne kulu balaŋ deŋele nɛ, ŋon ɔ ba gyeŋ daale ya na gyeŋ nyansa,

nyi be tei siakaralatena na bɛɛ gyeŋ nombia.

12 Ŋon ɔ tenɛɛ nɛ na gyene akpanyanyaŋte dekpaŋalaŋ,

te ɔ na mo akpanyanyaŋte do kewɔlɛɛ man.

13 Ɔkamasɛ ŋon ɔ tɔ ɔ deŋela nyi ɔ bee nyii ayematena kewii ya nɛ,

ŋon mɔ waa wii keŋ ŋolo be nyii e ya.

14 Kolo kefa weese ne yɔkɔse baŋ,

te kolo kayofa keŋ bɔɔ mo kanyaŋ milii ke ne fɛɛ baŋkum.

15 Nombia kedi kegbɛɛ dɔɔ ne yele ŋon ɔ tenɛɛ ne nyaŋee,

mɔna ne yele nombiakumɛɛ yɛɛra ne ŋeŋii.

16 Ɔkamasɛ ŋon ɔ kpase lee nyansa gbɛɛ man nɛ,

waa kaa kpuna woyadɛɛ.

17 Ɔkamasɛ ŋon ɔ ne gyae nɔɔkedi nɛ waa bese diyemte,

ɔkamasɛ ŋon ɔ ne gyae waen na lafenta koyadoŋte be gyae waa nyiŋ kɔba korakora ya.

18 Baa mo akpanyanyaŋte tɔ ŋon ɔ tenɛɛ nɛ nyeeman kom,

te ŋon ɔ bee di anokoare ya nɛ fa ŋon ɔ gbɛɛneŋ tenɛɛ.

19 Depampaa man kekyaa nyaageŋ dei,

kela alo kale gyaere na katoroŋte gyaŋ ke kyaa.

20 Siakaralate ne yilaa weenɛɛ kpaakpaa na oliifi nuŋ see,

mɔna ayiŋtena ne di be wui pou munu.

21 Ɔkamasɛ ŋon ɔ silana katenee na kegyae nɛ,

waa nyiŋ nyeedoŋ na kede na obuo.

22 Siakaralate waa tale gyeŋ gyu ka seŋ tia doŋtena donɔɔ dinaa,

na ɔ te tekeri dekyaŋ keŋ bɔɔ mo ba wose lɔ ke dɔɔ nɛ lɔ.

23 Ŋon ɔ na do ɔ nɔɔ na ɔ laakem dokɔŋ nɛ,

na lese ɔ wose lee nombiikum man.

24 Agaŋtaŋte na ŋon ɔ ne gate ɔ wose nɛ yele yɛna Kulure,

ɔ ne yɛɛ wa abɔɔ bo konɔɔyuŋ man.

25 Keŋ ne gyɔ kebɔŋalete loo ne gyaela ka mo e gyu yeŋ man,

nawolo nyi ɔ nyiŋmaase te bɛɛ tom keyɛɛ.

26 Ɔ ne yase sia gyae burum debaŋ kamasɛ,

mɔna ŋon ɔ tenɛɛ ne faa lee ɔ konɔɔ man.

27 Akpanyanyaŋte kedeesa yɛɛ kolo anekɔlaŋ ke,

kaa yela nyi waa mo Nyeempɔkum mo ke kɔŋ.

28 Dekara adansɛɛdiiri waa munu,

mɔna ŋon ɔ ne tei nideli waa yako ke kegbɛɛ dɔɔ.

29 Akpanyanyaŋte na beo booli ɔ sia,

mɔna ŋon ɔ gbɛɛneŋ tenɛɛ ne kɛɛ ɔ ketabii man.

30 Nyansa na nombia man kenyii na nyeeman kebake daale be kyaa,

keŋ gyae ke tale seŋ Degbeŋgyoo siaman ya.

31 Bee desina dɛɛkyɔŋ see fa yoo wee,

mɔna keyoodi na lee bo Degbeŋgyoo gyaŋ.