Aduya 31

Alo Yalale Kpaakpaa

10 Wɛɛle kpaakpaa, amɔ ne gyaela waa nyiŋ?

Ɔ na lee koya kela kegyaŋase kpaakpaate.

11 Ɔ baale na mo ɔ loo pou gyakaa ɔ dɔɔ,

keŋ kolo na kolo bee hia e ya.

12 Alo ŋon kekyaabii man pou ɔ ne yɛɛ baale ŋon deeli,

ɔ bɛɛ yɛɛ e dukum ya.

13 Ɔ na lese kuŋtuŋ na dukurufa,

na ɔ ta mo ɔ nyiŋmaase yɛɛ tom gyoŋ man.

14 Ɔ yɛɛ ŋgba kebudiira pantuu dinaa nɛ,

ɔ na mo ɔ weenɛɛ lee lemlem kɔŋ.

15 Ɔ ne karatɛɛ koro pɛ tɛɛ kena,

ɔ ne fa ɔ dekpaŋalaŋmantena weenɛɛ,

na ɔ te fa wa alebia tomse ŋan baa yɛɛ.

16 Ɔ ne kɛo tɛɛle na ɔ te lɛɛ ke,

ɔ na mo keŋ ɔ be nyim nɛ fara gerepo wɔɔ.

17 Ɔ ne kpaŋ abɔsɔɔ yɛɛ ɔ tom nedoŋ,

ɔ na do ɔ kakyeŋ yɛɛ tom.

18 Ɔ ne kɛɛ nyi ɔ ne nyiŋ tɔnɔɔ ɔ kebu kedi man,

te ɔ kanea bɛɛ yem nelim ya.

19 Ɔ dana ɔ dukurufadaŋ ɔ nyiŋmaa man,

na ɔ ta mo ɔ nyimbia kyaŋ dukurufa keŋ.

20 Ɔ ne yɛɛ wɔe fa ayematena,

te ɔ ne kyɔ baŋ bɔɔ dana koo ya nɛ.

21 Ɔ bee yee fa ɔ dekpaŋalaŋmantena waaretɛɛ ya,

nawolo nyi be popou ne wuu kuŋtuŋ.

22 Ɔ ta loo kuŋtuŋ wuu ɔ dofoŋoŋ dɔɔ,

ɔ kaana kanyaŋ kpaakpaate na amɔlaloŋ kanyaŋse.

23 Bee bu ɔ baale donɔɔ dinaa keŋ denaanɔɔ man,

botɔɔ keŋ ɔ ne gyu kekyaa tɛɛle keŋ kegyiise man nɛ.

24 Ɔ ne ŋara kanyaŋ kpaakpaate abɔɔ yɔɔ,

te ɔ ne yɔɔ kanyaŋse ŋan bɛɛ mo kpaŋ teŋase man nɛ fa kebudiira.

25 Yele kelɛɛ na doŋ yɛna ɔ kanyaŋse ŋan ɔ ne wuu,

ɔ bee yee weeya akaŋ ŋan ne kɔŋ nɛ ya.

26 Ɔ ne kolosi nyansa man,

te anokoare nombia kawola gyakaa ɔ laakem dɔɔ.

27 Ɔ sia gyakaa ɔ denimantena pou dɔɔ,

te ɔ be dana kebɔŋale ya.

28 Ɔ bia na koro na ba te baake e nyi kehiraa,

ɔ baale mɔ mena, na ɔ ta lese ɔ yele.

29 <<Ala burum ne yɛɛ ŋan kaboena,

mɔna nyaŋ kela be popou.>>

30 Aleebiri yɛɛ kabeo ke, te kyeo yɛɛ yakaa,

mɔna kaboena nyi baa lese alo ŋon ɔ ne yee Degbeŋgyoo yele.

31 Ɛ mo obuo fa e lee ŋan pou ɔ ba mo ɔ nyiŋmaase yɛɛ dɔɔ,

na ɔ tomse ka lese ɔ yele donɔɔ dinaa keŋ denaanɔɔ man.