1 Dawidi agendura ingabo ziri kumwe na we, ashiraho abagaba ingabo ijana n’abagaba igihumbi. 2 Dawidi atuma izo ngabo ku rugamba, ica gatatu c’izo ngabo catwarwa na Yowabu, ica gatatu kindi kigatwarwa na murumuna wa Yowabu, Abishayi mwene Zeruwiya, ikindi gice gisigaye kigatwarwa na Itayi Umugati. Umwami abwira ingabo ati: "Na jewe ubwanje ndajana namwe ku rugamba."

3 Ariko abantu baravuga bati: "Ntujane natwe; nitwahunga nta n’umwe bigira ico bibwiye mu ngabo za Abusalomu. Mbere naho hopfa igice co muri twebwe nta co vyobabwira; ariko wewe wenyene ungana n’ibihumbi cumi ni wewe baza barondera gusa. Ni co gituma ukwiye gusigara mu gisagara, ukaturungikira abadutabara igihe vyoba bikenewe."

4 Umwami arabishura ati: "Ndakora ibibahimbara vyose."

Nuko umwami ahagarara i ruhande y’irembo igihe ingabo zariko zirasohoka ziri mu mice y’ijanajana n’igihumbihumbi. 5 Umwami ategeka Yowabu, Abishayi na Itayi ati: "Ndabinginze, mwitondere uwo muhungu Abusalomu, mubikore ku bwanje." Kandi ingabo zose zarumva aho Umwami yatanga iryo tegeko ryerekeye Abusalomu ariha umukuru wese.

6 Ingabo za Dawidi zija ku rugamba kugwanya Abisirayeli, maze intambara ibera mw’ishamba ry’Abefurayimu. 7 Ingabo z’Abisirayeli zineshwa n’abantu ba Dawidi, kandi hapfa abantu benshi cane ibihumbi mirongo ibiri. 8 Intambara ikwira mu gihugu cose, kandi abishwe n’ishamba baba benshi kuruta abishwe n’inkota.

9 Maze abusalomu ahura n’abantu ba Dawidi. Yari ku nyumbu yiwe, hanyuma agerageje guhunga, iyo nyumbu ica musi y’amashami azitanye y’igiti kinini, umushatsi wa Abusalomu ufatwa na ya mashami y’igiti, aguma yenena mu kirere, ariko inyumbu yariko iguma yigira.

10 Umwe muri ba bantu ba Dawidi abibonye, abwira Yowabu ati: "Nabonye Abusalomu yenena ku giti."

11 Yowabu abwira uwo muntu amubwiye ivyo ati: "Wamubonye? None ni iki catumye utamwica ngo agwe aho nyene? Naca ndaguha shekeli icumi* z’ifeza n’umukanda w’abahizi ku rugamba."

12 Ariko uwo muntu aramwishura ati: "Naho shekeli igihumbi* zari kuba zaharuwe ziri mu ntoke zanje, sinari gukoza ukuboko ku mwana w’umwami. Twavyiyumviye yuko umwami yategetse wewe na Abishayi na Itayi ati: ‘Mwitondere uwo muhungu Abusalomu ku bwanje.’ 13 Iyo mba namwishe nari kuba nigiriye nabi ubwanje, kuko umwami yoruhiye kubimenya nawe ukanyigarama."

14 Yowabu aravuga ati: "Singomba guta umwanya ngo ndiko ndavugana nawe." Nuko yakira amacumu atatu mu ntoke ariruka asanga Abusalomu acenena kuri ca giti kandi akiri muzima, ayamutera mu mutima. 15 Maze ba basoda cumi batwaza ibigwanisho Yowabu bakikiza Abusalomu, bamucumitira aho nyene arapfa.

16 Nuko Yowabu aca avuza inzamba, ingabo ziwe zireka gukurikira Abisirayeli, kuko yari abahagaritse. 17 Bafata Abusalomu baja kumuta mu kinogo kirekire kiri mw’ishamba, baca bakirenzako ibibuye bininibinini. Muri uwo mwanya Abisirayeli bari bahunze, umuntu wese aja iwe.

18 Akiriho, Abusalomu yari yarashinze inkingi y’icibutso ciwe mu kiyaya c’umwami, kuko yiyumviriye ati: "Nta muhungu mfise ngo aze yibutse izina ryanje." Aca yita iyo nkingi izina ryiwe, n’uwu musi iracitwa Icibutso ca Abusalomu.

19 Nuko Ahimazi mwene Sadoki aravuga ati: "Nyemerera niruke menyeshe iyi nkuru umwami ko Uhoraho amukuye mu maboko y’abansi biwe."

20 Yowabu aramubwira ati: "Reka, si wewe wo kumenyesha iyo nkuru uwu musi. Nshobora kuzogutuma kumenyesha inkuru uwundi musi, ariko uwu musi ntubikore, kuko umuhungu w’umwami yapfuye."

21 Maze Yowabu abwira Umunyakushi ati: "Genda ubwire umwami ivyo wabonye." Wa Munyakushi yunama imbere ya Yowabu aca ariruka.

22 Ahimazi mwene Sadoki yongera kubwira Yowabu ati: "Ukwo vyogenda kwose, ndakwinginze ndeka nanje nkurikire uwu Munyakushi."

Ariko Yowabu arishura ati: "Muhungu wanje, ni kuki ugomba kugenda? Nta nkuru ufise yotuma uronka ingero."

23 Aravuga ati: "Egome, ariko nyemerera, nshaka kugenda."

Nuko Yowabu aravuga ati: "Iruka!" Maze Ahimazi ariruka aca mu kiyaya asiga wa Munyakushi.

24 Dawidi acicaye hagati y’ibikingi vy’irembo, umurinzi aduga hejuru ku nzu, ku muryango w’irembo. Aravye, abona umuntu yiruka ari wenyene. 25 Wa murinzi ahamagara umwami arabimubwira.

Umwami aravuga ati: "Ko ari wenyene, ashobora kuba azanye inkuru nziza." Wa muntu aguma yegereza.

26 Wa murinzi abona uwundi aje yiruka, aca ahamagara umurinzi w’irembo ati: "Ehe uwundi aje yiruka ari wenyene!"

Umwami aravuga ati: "Na we nyene ashobora kuba azanye inkuru nziza."

27 Wa murinzi aravuga ati: "Umengo umwe wa mbere yiruka nka Ahimazi mwene Sadoki."

Umwami ati: "Ni umuntu mwiza. Azanye inkuru nziza."

28 Maze Ahimazi ahamagara umwami ati: "Vyose ni vyiza!" Yunama imbere y’umwami akoza umutwe hasi aca aravuga ati: "Uhoraho Imana yawe ahimbazwe! Kuko yagabuye abantu bahagurukiye kugwanya umwami wanje."

29 Umwami arabaza ati: "Wa muhungu Abusalomu ariho?"

Ahimazi arishura ati: "Igihe Yowabu yandungika ivyariko biraba ntivyari bwasobanuke neza, sinamenye ivyo ari vyo."

30 Umwami aravuga ati: "Hagarara i ruhande urindirire aha." Nuko aja i ruhande ahagararaho.

31 Wa Munyakushi arashika aca aravuga ati: "Mwami nyeningoma, niwumve inkuru nziza! Uhoraho yagutabaye agukura mu maboko y’abari baguhagurukiye."

32 Umwami abaza wa Munyakushi ati: "Wa muhungu Abusalomu nta co yabaye?"

Wa Munyakushi arishura ati: "Abansi b’umwami wanje n’abomuhagurukira bose ngo bamugirire nabi barakaba nk’uko uwo musore yabaye."

33 Umwami aca aracika intege. Aca aja mu cumba co hejuru cari ku muryango w’igisagara aririrayo. Agenda aravuga ati: "Ewe mwana wanje Abusalomu! Mwana wanje, mwana wanje Abusalomu! Iyo mpfuma aba ari jewe mpfa hako wewe upfa; yewe Abusalomu, mwana wanje, mwana wanje!"