1 Maze uburake bw’Uhoraho bwongera kuziriringira Abisirayeli, aca atera Dawidi agatima ko kubaharura kugira ngo abakwegere ivyago, avuga ati: "Genda uharure Abisirayeli n’Abayuda."

2 Nuko umwami abwira Yowabu n’intwazangabo bari kumwe na we ati: "Nimukwiragire mu miryango yose y’Abisirayeli kuva i Dani gushika i Berisheba muharure abazi kugwana, kugira ngo menye uko bangana."

3 Ariko Yowabu yishura umwami ati: "Uhoraho Imana yawe arakagwiza ingabo incuro ijana, kandi inyonga z’umwami wanje zize zibibone. Ariko ni kubera iki umwami wanje ashaka gukora ikintu nk’ico?"

4 Ariko ijambo ry’umwami rirengera irya Yowabu, maze Yowabu n’intwazangabo bava imbere y’umwami, baja guharura ingabo z’Abisirayeli.

5 Bamaze kujabuka Yorodani, bacumbika i ruhande ya Aroweri, mu bumanuko bw’igisagara mu kabande, hanyuma baca mu ntara ya Gadi n’i Yazeri. 6 Baja i Gileyadi n’i Kadeshi mu ntara y’i Tahutimu Hodushi, bashishikara baja i Dani Yani berekeye i Sidoni. 7 Maze baca baja ku ruzitiro rw’i Tiro no mu bisagara vy’Abahiwi n’Abanyakanani. Barangije baja i Berisheba n’i Negebu i Buyuda.

8 Bamaze kunyuragira mu gihugu cose, bagaruka i Yerusalemu haheze amezi icenda n’imisi mirongo ibiri.

9 Yowabu ashikiriza umwami igitigiri c’abantu baja ku rugamba. Muri Isirayeli hari ibihumbi amajana umunani b’abahizi bazi kugwanisha inkota, mu Buyuda na ho ibihumbi amajana atanu.

10 Dawidi amaze guharura ingabo, umutima utangura kumurega, maze abwira Uhoraho ati: "Nacumuye cane kuko nakoze ivyo. None rero, Uhoraho, ndakwinginze, unkureko icaha canje jewe umusavyi wawe. Nakoze ivy’ubupfu."

11 Dawidi avyutse mu gitondo ijambo ry’Uhoraho riza kuri Gadi uwavugishwa na we akaba n’uwerekwa wa Dawidi ati: 12 "Genda ubwire Dawidi uti: ‘Uku ni ko Uhoraho avuze: Ndaguhaye ibintu bitatu. Hitamwo kimwe nzoguhanisha.’ "

13 Nuko Gadi aja kwa Dawidi aramubwira ati: "Mbega yoguteza imyaka itatu y’inzara mu gihugu cawe, canke amezi atatu yo guhunga abansi banyu bariko barabakinagiza, canke imisi itatu y’ikiza mu gihugu canyu? Nuko rero nuvyiyumvireko, uhitemwo hanyuma umbwire, kugira ngo ngire ico nishura uwantumye."

14 Dawidi abwira Gadi ati: "Ndi n’umubabaro mwinshi. Reka tugwe mu maboko y’Uhoraho, kuko imbabazi ziwe ari nyinshi; ariko singwe mu maboko y’abantu."

15 Nuko Uhoraho arungika ikiza mu Bisirayeli guhera muri ico gitondo gushika ico gihe cashinzwe giheze, maze hapfa abantu ibihumbi mirongo indwi kuva i Dani gushika i Berisheba. 16 Umumarayika agoroye ukuboko kwiwe ngo arandure Yerusalemu, Uhoraho ababazwa n’ico cago aca abwira uwo mumarayika yariko aratikiza abantu ati: "Geza aho! Garukana ukuboko kwawe!" Umumarayika w’Uhoraho muri ico gihe yari ku mbuga yo kugosorerako ingano ya Arawuna Umuyebusi.

17 Dawidi abonye umumarayika yariko arica abantu, abwira Uhoraho ati: "Ni jewe nacumuye nkora icaha. Aba bantu bo ni nk’intama. None bakoze iki? Ukuboko kwawe niguhane jewe n’umuryango wanje."

18 Kuri uwo musi Gadi aja kwa Dawidi aramubwira ati: "Duga wubakire Uhoraho igicaniro ku mbuga yo kugosorerako ingano ya Arawuna Umuyebusi." 19 Nuko Dawidi araduga, nk’uko Uhoraho yari yamutegetse biciye kuri Gadi. 20 Maze Arawuna yunamuye amaso abona umwami n’abantu biwe baza aho ari, aca arunama imbere y’umwami, ashika hasi.

21 Maze Arawuna avuga ati: "Ni iki kizanye umwami wanje ku musavyi wiwe?"

Dawidi amwishura ati: "Nzanywe no kugura imbuga yawe, kugira ngo ndahubakire Uhoraho igicaniro, kugira ngo ikiza kiri mu bantu gihagarare."

22 Arawuna abwira Dawidi ati: "Umwami wanje niyakire ico yipfuza cose gushikana. Ng’izi n’impfizi z’ikimazi co guturirwa n’umuriro, kandi ehe n’imihini yo gusekura hamwe n’ingogo ndabitanze ngo bibe inkwi, 23 vyose ndabiguhaye, mwami." Arawuna yongera abwira umwami ati: "Uhoraho Imana yemere kwakira ikimazi cawe."

24 Ariko umwami yishura Arawuna ati: "Oya, ndakwinginze unyemerere ndakurihe. Sinshobora gushikanira Uhoraho Imana yanje ikimazi ata co ndakiguze."

Nuko Dawidi agura iyo mbuga n’izo nka atanga, shekeli mirongo itanu z’ifeza*. 25 Dawidi yubakira Uhoraho igicaniro aca atanga ibimazi vyo guturirwa n’ivy’ishimwe. Maze Uhoraho yishura isengesho ryiwe, ikiza kiva mu Bisirayeli.