1 Ishibosheti mwene Sawuli yumvise ko Abuneri yapfiriye i Heburoni, aca aracika intege, kandi Abisirayeli bose bahagarika imitima. 2 Uwo mwene Sawuli yari afise abagabo babiri bari abakuru mu ngabo. Umwe yitwa Bayana uwundi na we yari Rekabu; bari bene Rimoni w’i Beroti wo mu muryango wa Benyamini. I Beroti ni ahantu hari hahinduwe igice ca Benyamini, 3 kuko abantu b’i Beroti bahungiye i Gitayimu bakabayo nk’inyambukira gushika n’uwu musi.

4 (Yonatani mwene Sawuli yari afise umuhungu yari yaramugaye amaguru yose. Yari amaze imyaka itanu igihe inkuru za Sawuli na Yonatani zivuye i Yezireyeli zashika. Umurezi wiwe aramufata aramuhungana, ariko uwo mukobwa kuko yariko arihuta cane ngo ahunge, aramukorokana, maze aca aba ikimuga. Uwo muhungu yitwa Mefibosheti.)

5 Umusi umwe Rekabu na Bayana, bene Rimoni Umuberoti, bagenda kwa Ishibosheti, bashikayo ari mu ndugumba yo ku murango na we yariko araruhuka mu gihe c’umurango. 6 Basanga umusanzi w’inzu yari yamye agosora ingano, arasinziriye. Baca barasoboka baramurengana binjira mu nzu haruguru. Maze Rekabu na Bayana bacumita umwami mu nda baca barahunga.

7 Bari binjiye mu nzu bamusanga yiryamiye ku buriri bwiwe mu cumba ciwe co kuryamamwo. Bamaze kumucumita bakamwica, baciye bamuca umutwe, hanyuma bahunga bawutwaye, bagenda ijoro ryose bajanye inzira ica mu kiyaya citwa Araba. 8 Bashitse i Heburoni bereka Dawidi umutwe wa Ishibosheti, babwira umwami bati: "Ng’uwu umutwe wa Ishibosheti mwene Sawuli, umwansi wawe, yagerageje kukwica. Uyu musi Uhoraho araguhoye mwami nyeningoma ku bwa Sawuli n’uruvyaro rwiwe."

9 Dawidi yishura Rekabu n’uwo bavukana Bayana, bene Rimoni Umuberoti ati: "Ndahiye uguhoraho kw’Uhoraho, yantabaye mu ngorane zose, 10 igihe haza umuntu akambwira ngo: ‘Sawuli yapfuye,’ mu kwiyumvira ko anzaniye inkuru nziza, naciye ndamufata ndamwicira i Zikulagi. Iyo ni yo mpembo namuhaye kubera iyo nkuru yari anzaniye! 11 None ntibirushiriza nimba abantu b’inkozi z’ikibi bafashe umuntu atariko urubanza, bakamwicira mu nzu yiwe no mu buriri bwiwe? Mbega sinkwiye kubahanira amaraso yiwe amaboko yanyu yavishije no kubakura kw’isi!"

12 Nuko Dawidi aha itegeko abantu biwe, maze barabica. Babaca ibikonjo vyompi n’ibirenge vyompi, baca bamanika imivyimba yabo ku kidengeri c’i Heburoni. Ariko, umutwe wa Ishibosheti wowo bawuhamba mu mva ya Abuneri yari i Heburoni.