1 Dawidi aririmbira Uhoraho muri aya majambo amaze kumukiza abansi biwe bose, no kumukura mu maboko ya Sawuli. 2 Aravuga ati:

"Uhoraho ni igitandara canje, igihome canje kinkingira n’umutabazi wanje;

3 Imana yanje ni igitandara canje nihishamwo,

inkinzo yanje n’ihembe ry’agakiza kanje.

Ni we buhungiro bwanje, ubwihisho bwanje n’umukiza wanje,

ankiza abantu b’inkozi z’ikibi.

4 Nambaje Uhoraho, we abereye gushimwa,

na we ankiza abansi banje.

5 Imipfunda y’urupfu yaransugereje;

imikuba y’ukurandura yarandengeye.

6 Iminyororo y’i kuzimu yaranyizingiriyeko;

imitego y’urupfu yarantangiriye.

7 Mu mubabaro wanje nambaje Uhoraho;

nambaje Imana yanje.

Iri mu ngoro yayo yumvise ijwi ryanje;

ugutakamba kwanje gushika mu matwi yayo.

8 Isi yaratigise ihinda agashitsi,

amatanguriro y’amajuru aranyiganyiga;

yahinze agashitsi kuko Uhoraho yari yaratse.

9 Umwotsi wapfunduka mu mazuru yiwe;

umuriro utongora wava mu kanwa kiwe,

hamwe n’amakara yaka.

10 Yamenye ijuru aramanuka;

ibicu vyirabura vyari musi y’ibirenge vyiwe.

11 Yaje aguruka ku mukerubi;

aboneka agendera ku mababa y’umuyaga.

12 Yipfutse umwijima nk’ihema rimukikuje;

ibicu vyirabura vyo kw’ijuru vyuzuye imvura.

13 Mu gukayangana kwo mu nyonga hiwe,

havamwo imiravyo imeze nk’imbeya z’umuriro.

14 Uhoraho yaraturagaye ari mw’ijuru;

ijwi ry’Iyisumbavyose ryarasamiranye.

15 Yarashe imyampi isanzaza abansi,

imbeya z’umuriro zarabakinagije.

16 Ibiyaya vyo mu kiyaga vyagiye ahabona

n’amatanguriro y’isi aragaragara

ku bw’ugukankama kw’Uhoraho,

no ku bw’impwemu ziva mu mazuru yiwe.

17 Yagoroye ukuboko kwiwe ari iyo hejuru aramfata;

ankura mu mazi menshi.

18 Yantabaye umwansi wanje akomeye,

ankiza abanyanka, bandusha inkomezi.

19 Banteye ku musi w’ivyago vyanje,

ariko Uhoraho ni we yanshigikiye.

20 Yaransohoye anjana ahagutse;

arankiza kuko yanezererewe.

21 Uhoraho yankoreye ibihwanye n’ukugororoka kwanje;

yampaye ingero ikwiranye n’ugutungana kw’amaboko yanje.

22 Kuko nagumye mu nzira z’Uhoraho;

sinigeze ncumura ngo mve ku Mana yanje.

23 Ivyagezwe vyiwe vyose biri imbere yanje;

sinigeze mpindukira ngo mve mu vyo yihanikirije.

24 Namye ntagira umugayo imbere yiwe

kandi nirinze icaha.

25 Uhoraho yanyishuye ibikwiranye n’ukugororoka kwanje,

ibihwanye n’ugutungana kwanje mu nyonga hiwe.

26 Ku mwizigirwa wiyerekana uri umwizigirwa,

ku wutagira umugayo wiyerekana uri uwutagira umugayo,

27 ku wutunganye wiyerekana uri uwutunganye,

ariko ku muntu w’intabarirwa wiyerekana nk’uwutagira akagongwe.

28 Ukiza abaciye bugufi,

ariko inyonga zawe ziri ku bibone ngo ubacishe bugufi.

29 Ewe Uhoraho, uri itara ryanje;

Uhoraho ahindura umwijima wanje ukaba umuco.

30 Ku bwawe, nshobora gutera ingabo nyinshi;

turi kumwe n’Imana yanje, nshobora kwurira uruzitiro.

31 Imana yo, inzira yayo iratunganye:

ijambo ry’Uhoraho ni iry’ukuri;

abera inkinzo abamuhungirako bose.

32 None ni nde Mana atari Uhoraho?

Kandi ni nde Gitandara atari Imana yacu?

33 Imana ni yo buhungiro bwanje,

igorora inzira yanje.

34 Ihindura ibirenge vyanje nk’ivy’impongo;

ikanshoboza guhagarara ku dutwe tw’imisozi.

35 Yigisha iminwe yanje kugwana;

agashoboza amaboko yanje gufora umuheto w’umwakaka.

36 Agakiza kawe kabaye inkinzo yanje,

ubushobozi bwawe ni bwo bwangize uwuhambaye.

37 Wanteguriye inzira ncamwo yagutse,

kugira ngo ibirenge vyanje ntibinyerere.

38 Nakurikiye abansi banje ndabanesha;

sinasubiye inyuma badaherengeteye.

39 Nabagize ubunywenywe, nta n’uwushobora kuvyura umutwe;

baguye musi y’ibirenge vyanje.

40 Wanyambitse inkomezi zo kugwana;

wacishije bugufi abansi banje imbere yanje.

41 Watumye abansi banje bata barahunga,

kandi wampaye kubaherengeteza.

42 Baratakamvye, habura uwubakiza;

batakambiye Uhoraho, ariko ntiyabishura.

43 Maze ndabasya nk’umukungugu wo hasi;

ndabahonyanga, ndabasiribanga nk’ivyondo mu nzira y’abahita.

44 Wankijije ibitero vy’abantu;

unzigamira ingoma ngo nganze amahanga.

Abantu ntigeze kumenya ubu ni bo bankorera,

45 abanyamahanga baranyunamira;

uko bumvise ijwi ryanje, baranyumvira.

46 Bose bacika intege;

bava aho bari binyegeje bahinda agashitsi.

47 Uhoraho ni muzima! Hahimbazwe igitandara canje!

Hashirwe hejuru Imana yo gitandara c’agakiza kanje!

48 Ni we Mana imporera,

igashira amahanga musi yanje,

49 ikankiza abansi banje.

Wanshize hejuru y’abangwanya;

untabara abantu b’inkozi z’ikibi.

50 Ni co gituma nzoguhimbaza, ewe Uhoraho, mu mahanga;

nzotazira izina ryawe.

51 Ni we aha umwami wiwe intsinzi zihambaye;

yerekanye urukundo rudashira ku wo yarobanuje amavuta,

ari we Dawidi n’uruvyaro rwiwe."