1 Asi detelu sha Solomoni.

Mwana yaveli na luhunja ndi seku kwa tati mundu, lakini mwana mpufi ndi ng'ong'uteku kwa mamundu.

2 Mali sipatikanili kwa deha ya wafu sha nyanyi ha, lakini ugoleki ukumulowola mundu munjifwa.

3 Bambu Chapanga akuvaleka na njala ha vagoleki, lakini akusilimba dobukelu sha vandu vawafu.

4 Ugata ukuyegha ugaju, lakini yagola chichuku akupata ulundamali.

5 Mundu muna luhunja akukungasha fivelekwa chipindi cha mbena, lakini yikuva chindipa mundu yawonja chipinndi cha kubena.

6 Goleki akunemiliwa na Chapanga, filongu fya mundu mwafu fimema ndilingu.

7 Vandu vasangi vakuvakumbuka kwa kunemiliwa, lakini vavifyi davavavasuwi nakamu.

8 Yavelili na luhunja mundima akupikana malawu, lakini mpufi yawowoya filongu daghawi.

9 Mundu yayikala kwa usangi akuyikala kwa kusika, lakini yayikala kwa uvifyi damanyiki.

10 Yakupisha kwilata wafu akwiyeghela gobuleku, lakini yula yadindala mukukayika akuyegha kusika.

11 Mlomu wa mundu goleki ndi chimbwitu cha unofu, lakini mlomu wa mundu mwafu wumema ndilingu.

12 Kunyekwa kukuyegha ndewu, lakini utami ukugubika wafu wonda.

13 Luhunja lukuva mumlomu ya mundu mmanyi, lakini vandu vapufi davalatuliwi.

14 Yivavelili na luhunja vakuvika umanyi, lakini mpufi padeta akuyegha kudanganyika kalopu.

15 Mali sha mlundamali ndi luviwu lwaki, lakini ugaju ndi danganyishu ya mgaju.

16 Fupu ya mundu msangi ndi unofu, lakini mvifyi fupu yaki njifwa.

17 Yajumila kukayikiwa akuyenda kuunofu, lakini yalema kukayikiwa kayaghamila.

18 Yamunyekwa monga kwa chifisu mundu ayu mfyangu, na mundu yamupayishila monga mpufi.

19 Mundu muna filongu fitangalili filongu fyaki fikumuyegha kusambi, lakini mundu yavelili na luhunja akunyamala jii.

20 Filongu fya goleki nakaka fiva kucha mbiya, lakini luhala lwa mundu mwafu chindu ha.

21 Filongu fya goleki fikuvatanga vandu vatangalili, lakini vapufi vakusova kwa kupota luhala.

22 Nemusi sha Chapanga sikuyegha ulundamali, mundu akuwesha ha kuva mlundamali kwa kwikimbanikila.

23 Mundu mpufi kugola wafu yiva kucha kudinga, lakini vandu vamanyi vakusekilela luhunja.

24 Chatila mundu mwafu ndi dachimkoli, lakini chadobukela mundu goleki ndi dagayiliwi.

25 Lingukumbi palipita vandu vawafu vakudanganyika, lakini goleki vakudindashiwa jola.

26 Kucha wuyivelili siki wuyisosonda mumlomu awu lyosi wulitukuta mumesu, nahawu ndi wavelili mundu mgata kwa mundu yamugayilili chichuku agoli.

27 Kumtundamila Chapanga kukuyongesha unofu wa mundu, lakini myaka ya vavifyi dayivi midokwa.

28 Shuvililu ya mundu goleki yikupelela museku, lakini chaavetela mundu mwafu akupata chindu ha.

29 Bambu Chapanga akuvadima vandu yivavelili goleki, lakini yivagola uvifyi davagobuliwi.

30 Vandu yivavelili goleki davawushiwi ha pavavelili, lakini vandu vawafu davayikali ng'odu mumlima.

31 Mlomu wa goleki ukudeta milandu ya luhunja, lakini lulimi lwa mundu mwafu daludumuliwi nakamu.

32 Yivavelili goleki milomu yawu yikumanya chila chanyanyi kudeta, lakini vandu vawafu vakudeta milandu ya uvifyi weka.