1 Afi ndi filongu fya mutwa Lemueli, filongu fyawuliwili na mawaki.

2 "Mwana wangu, mwana wangu nguwombeli liki mwana wangu yindikulelili! Ndikuwombeli liki yuwi yindikuluvili kufuma kwa Chapanga? 3 Kotoo kumalisha liwovi lyaku kwa mdadala, kotoo kuvapa mali shaku ava yivavadanganyisha vatwa. 4 Yiva nyayi ng'odu Lemueli, yiva nyanyi ng'odu vatwa kulanda difwayi, na hata vakomi kubayulila uyimbi, 5 ili pavalanda vakotoo kwivasuwia nayililu ya ngayiku, na kuvakaja haki yivavelili na gobuleku. 6 Mupi difwayi yula yavelili samba asovi, vagayilili difwayi vala yivamemili lung'ong'u. 7 Valandi vayivasuwi ugaju wawu, na vakotoo kuva na ngumbungumbu ya gobuleku shawu."

8 "Deti kwa nongwa ya vala vonda yivalemwa kwitasha, na kukimbanikila haki sha vasosuvafu. 9 Deti kwa ngongwa yawu na kulamula kwa unakaka, wusidimi haki sha vagaju na yivangajila findu."

10 Mdala msangi ukumuwona koo! Ayu akudayiliwa pitu findu fyonda!

11 Bambu mundu mundima yaki akumuwona kava nakaka, kwa mweni dapati fwayida jola.

12 Nakaka akumgolela fya wafu ha bambu mundu, ila akumgolela nyanyi mungalilu yaki yonda.

13 Akusaka wagi na kitani, na kugola chichuku kwa mawoku vaki.

14 Akwifwana na matu makomi ya kunadishila findu, akuyegha filivi fyaku kufuma kutali.

15 Akuyimuka pamalavila puti, akuvatandila filivi vandu va nyumba yaki, na kuvaghila fichuku vavanda vaki.

16 Akwihola kuhemela chitava, pambeli akuhemela, na kulilima sabibu kwa fwayida ya chichuku chaki.

17 Akugola chichuku kwa liwovi, na kudindasha mawaku vaki.

18 Kamanya fichuku fyaki fina fwaida, akugola chichuku mbaka pamihi.

19 Akupota ngoyi kwa mawoku vaki mweni, na kwa fyala fyaki akusona yingwa.

20 Akutawula liwoku lyaki kuvapa vagaju, akuholosha liwoku lyaki kuvatanga vangajila chindu.

21 Akuvayipwelesha ng'odu vandu vaki hata payiva chipindi cha lupepu, nongwa kila mundu kana yingwa situsitu.

22 Akugola gola mitandiku yaki, yingwa shaki sha salabati ya kitani yivelili nyanyi.

23 Bambu mundu ndi mundu yamanyikili muchitemela, paghava pamu na vavaha va mlima.

24 Mdala ayu akugola yingwa na kusinadisha, akuvanadishila vachulusi va ngoyi sha muchiwunu.

25 Akumanyika kwa liwovi na ndundamilu, akuseka na akwihola ha chipindi yichiyisa.

26 Akuywanga kwa luhunja, akuwombana na vayaki kwa usangi.

27 Akulembesha fyonda yifigolikili munyumba yaki, nakaka akwikala hela wuwu ha.

28 Vana vaki vakuwoloka na kumjuma, bambu mundu akusomola misanbu ya kumjuma.

29 Akudeta, "Vadadala vatangalili vagola filoja lakini yuwi kuva pitu vonda."

30 Kufuta kukujanga na uvayisi ukufwaa ha, ila mdadala yamtundamila Chapanga dajumiwi.

31 Chichuku chaki chikudayiliwa kuhombiwa, fichuku fyaki fikudayiliwa fitundamiwi na vandu vosi.