1 Ngiba mgaju yayikala ngajila mbatiwa, pitu mundu yavelili na filongu fya chipufi na msisii.

2 Yiva nyanyi ha kwa mundu kukimbanika ngajila luhala, na yayenda kalopu kunu akuvifya munjila.

3 Mundu akwidanganyisha kwa upufi waki, pambeli ndima yaki yikumkalalila Bambu Chapanga.

4 Mlundamali kana vaghanja vatangalili, lakini mgaju ghanja waki akumbava.

5 Mtovileli yavelili mfyangu dalatuliwi, yadeta fya udesi dalekiwi ha kuhighiwa.

6 Vandu yivatangalili vakwiwongola kwa vakomi, kila mundu akudayila kuva na ghanja mnakaka.

7 Mundu mgaju valongu vaki vakumnyekwa, vaghanja vaki ndi yivamtuva, akuvakovikela na akuvakema vakumlema.

8 Yayipatila luhunja akuwutama mfuki waki, yakombikesha luhunja dapati fya usangi.

9 Mtovilela mfyangu datoviwi, yadeta fya udesi dadanganyishiwi.

10 Yikudayiliwa ha kwa mpufi kwikala kwa fwamuku, kandi yikudayiliwa ha kwa ndumindumi kuvatavala vakomi.

11 Mundu muna umanyi akukalala ngengi ha, akuwona nyanyi kupomela wafu wagoliwiliwi.

12 Maya va mutwa vava nga majabi yabuluma, lakini usangi waki wuva nga mitungwi kumbindi ya lidasi.

13 Mwana mpufi kava chindipa kwa tati mundu, na ndewu ya mdala yiva nga ndonya yivelili nyepinyepi yingajila kupela.

14 Mbala akugayiliwa mundu kufuma kwa valeli vaki ndi nyumba na mali, lakini mdala muna umanyi akufuma kwa Bambu Chapanga.

15 Ugata wukumgola mundu awonji libu, mundu mgata dagobuleki kwa njala.

16 Yakamula lilawu lya Chapanga akulowola unofu waki, yabedala ng'ulilu ya Chapanga dasovi.

17 Yamtanga mgaju kucha wula akumkopela Bambu Chapanga, Bambu Chapanga damuhombi kwa chila chinofu chagolili.

18 Mlatuli mwana waku chipindi akali mwana, dawumtangi mweni akotoo kudanganyika.

19 Mundu yakalala ngengi alatuliwi, leki pawumlowola ukudayiliwa kumlowola kandi na kandi.

20 Pikanishi chivakuwombela na koli ng'ulilu, na majuva vesava dawupati luhunja.

21 Kuna findu fitangalili mundima ya mundu, lakini chila chadayila Bambu Chapanga ndi dachigoleki.

22 Yichidayiliwa kwa mundu ndi utami wungajila mbelu, ngiba kuva mgaju pitu kuva mfyangu.

23 Yampikana Bambu Chapanga akwikala dapati fyosi, daghavi na gobuleku ha.

24 Mundu mgata akwingisha liwoku lyaki muchiselu, lakini akuwesha ng'odu kuyegha liwoku lyaki pamlomu.

25 Mlatuli yavelili na machwegha na mpufi dapati luhala, mlakalili yavelili na luhunja na dapati umanyi.

26 Yamuhijila mali tati mundu na kumvingavinga mawaki, mwana ayu wawafu na akudayiliwa ha.

27 Mwana wangu, pawuleka kwiwula, dawivasuwi na luhunja luwuyiwulili kala.

28 Mtovilela yagayiliwili swinda akubedala haki, na mlomu wa mwafu ukumila wafu.

29 Vala yivavelili na machwegha vava ndemindemi kulatuliwa, na vandu vapufi davalatuliwi ndomondu kumuwongu.