1 Mdadala yavelili na luhunja akujenga nyumba yaki, lakini mpufi akwibowola kwa mawoku vaki mweni.

2 Yagola milandu minofu akumtundamila Chapanga, lakini mwafu akumubedala Chapanga.

3 Mpufi akwilatula mweni kwa filongu fya wafu, lakini yavelili na luhunja filongu fyaki fikumdima.

4 Ngajila senga wa kulimila ligoma lya mundu lyahela chindu, lakini fibeni fitangalili fitupata kwa liwovi lya vasenga va mlimi.

5 Mtovilela wa nakaka akudeta udesi ha, lakini yangajila kujumiliwa akudeta ufyangu.

6 Yevelili na ubedalu akusaka luhunja lakini akwipata ha, lakini yavelili na luhala akupata umanyi kwa upusu.

7 Wikali kutali na mundu mpufi, nongwa apa pavelili pavahela filongu fya luhunja.

8 Luhunja lwa mundu yavelili na umanyi ikumulongosha amanyi cha kugola, lakini upufi wa mpufi ukuvajanga veni.

9 Vapufi vakusekilela kugola sambi, ila goleki akujumiwa kwa Chapanga.

10 Kila ndima yiimanya gobuleku yaki, kwahela mundu wingi yawesha kuva pamu museku yaki.

11 Nyumba ya mundu mwafu yikubowuliwa, lakini payikala mundu goleki pakudindashiwi.

12 Deha yayiihola mundu kucha ya nyanyi, mbelu yikumlongosha munjifwa.

13 Seku yikuwesha kufifa lihingili, lakini seku payipela gobuleku yikuwuya.

14 Mundu mwafu dapati ngimu wagolili, na mundu msangi dayangi fupu ya figoli fyaki.

15 Mpufi akujumila kila chindu chawombiliwa, lakini mundu mumanyi akulembesha tanila. 16 Yavelili na luhunja kava na chiganu na akulyepa na wafu, lakini mpufi akutila ha na akuwulumbuka. 17 Yakalala kalopu akugola fya upufi, lakini mundu msugu vakumnyekwa.

18 Vapufi vakuhala upufi, lakini yivavelili na luhala akugayiliwa fupu ya umanyi.

19 Vavifyi davatundamili vandu vasangi, vandu vavifyi davatundami pamulyangu ya vandu goleki.

20 Mgaju akunyekwa hata na mjofi waki, lakini mlundamali kana vaghanja vatangalili.

21 Yamubedala mjofi waki akugola sambi, ila kanemiliwa mundu yula yamuwonela lusungu mgaju.

22 Yadayila kugola uvifyi nakaka akuvifya! Yivayilata kugola usangi davatamiwi na kutundamiliwa.

23 Kila chichuku pawudindala kugola dawupati fwayida, lakini filongu hela fikuyegha ugaju.

24 Mali ndi fupu ya yivaveli na luhunja, lakini upufi wukugola wuvi mpufi munu.

25 Mtovilela wa nakaka akwilowola ngalilu, lakini yadeta ufyangu ndi mundu mwafu.

26 Mundu yamtundamila Chapanga kana shuvililu yidindalili, na vana vaki davatuvilili kwa Chapanga.

27 Kumtundamila Chapanga ndi chiseselu cha unofu, fikumgola mundu kulyepa mitambu ya njifwa.

28 Leki mutwa akutavala vandu vatangalili, vandu davamtundamili, lakini mtavala patavala vandu vadokwa daghavi na uwesu mdokwa.

29 Mundu yangajila maya va kalopu kana luhunja lukomi, lakini yakalala kalopu akulangusha upufi waki.

30 Kusika mundima yikumupa mundu njimba nofu, lakini weyi wukumgola mingendewu yiwoli.

31 Yamsulumu mgaju akumduka Chapanga waki yamuwumbili, lakini yamuwonela lusungu mgaju akumtundamila Chapanga.

32 Mundu mwafu akufyoyiwa kwa figoli fyaki fya wafu, lakini goleki akunana kwa usangi waki.

33 Luhunja luva mundima ya mundu yavelili na umanyi, lakini luhunja lumanyika hata mundima sha vapufi.

34 Kugola usangi kukugola mlima wuvi mkomi,

lakini kugola sambi kukumgola mundu ghavi na soni.

35 Mutwa akuva na seku na ndumindumi yagola figoli kwa luhunja, lakini maya vaki vakuva kwa ndumindumi yagola milandu ya wafu.