1 Kutundamilliwa kwa mpufi yikudayiliwa ha, yiva kucha balafu chipindi cha mkakamu au ndonya chipindi cha kubena.

2 Mundu pakulapila ngajila nongwa lilapu lyaki likukuwona ha, yikuva kucha sheveli wayenda uvyela kwa kawu mbalamateti wuvawuluka.

3 Mlatuli fwalasi kwa ndomondu na wumuwopi luwoyi chihongu mumlomu, na wumulatuli ndomondu kumuwongu mundu mpufi.

4 Kotoo kumuyangula mpufi nga wuvelili upufi waki, pawugola nahawu dawuvi mpufi kucha mweni.

5 Muyanguli mpufi ngimu wuuvelili upufi waki, ili ayimanyi mweni kavahela luhunja nakamu.

6 Kumlaghila mpufi unjagila, yiva kucha kwidumula liwulu awu kwisakila gobuleku umweni.

7 Detelu shadeta mundu mpufi, siva kucha mawulu va ndevindevi.

8 Kumtundamila mpufi yiva kucha mundu yavika mbulungwa muludendi.

9 Mpufi yayesha kudeta detelu, kava kucha mundu yalovelili, yayesha kutupula lisomi mukuwoku yaki.

10 Mundu yamkema mpufi awu yapita munjila kumgolela chichuku chaki, kava kucha yaguma msali na kumgobola kila mundu.

11 Mpufi yawuyilila upufi waki, kava kucha galu yaghalya fyahukwili.

12 Kuna shuvililu kwa mundu mpufi, pitu yula yayiwona kucha mweni kana luhunja kumbi kavahela.

13 Mgata akudeta akuwesha ha kufuma panji, panji kuna majabi?

14 Mundu mgata akutaya liwoku lyaki muchiselu ya filivi, lakini akuwesha ng'odu kuyegha liwoku lyaki pamlomu.

15 Mgata akutaya liwoku lyaki muchiselu ya filivi, lakini akuwesha ha kunyasula mbaka mumulomu.

16 Mundu mgata akwiwona kana luhunja, pitu vandu saba yivawesha kumuyangula kwa luhunja.

17 Yayitaya mundewu yingajila kuva yaki, kava kucha mundu yamukamula ma jeji galu yapita mudeya.

18 Kucha yajumbili lisini wadingila lugilu luvelili na motu, au misali ya njifwa, 19 Ndi wuyivelili kwa mundu yamujanga mjofi waki, pambeli akudeta, ngakuchweghilileyi hela.

20 Leki kwahela ngilu, motu ukujimika, leki kwahela lijongishela kwahela ndawu.

21 Kukosha ngilu kukugola motu uyendileli kuyaka, ndi wavelili mundu mgombi wadayila ugombi wuvi.

22 Filongu fya mundu yachongela fiva kucha filivi finovili, fikuseleka mbaka munda.

23 Filongu finovili yififuma kwa mundu yavelili na ndima ya wafu, fikwifwana na fiyungu yifikulungashiwili telebaaa.

24 Mundu yashengeta monga akuwesha kwififa kwa kudeta filongu finowili, lakini mundima yaki kana lihundu. 25 Hata leki akuywanga finofu kotoo kumuwona munakaka, kwanongwa mundima yaki mumema findu fitangalili fya kukalalisha munu. 26 Yikuweshikana mundima yaku kuva fuliii, lakini hoshu shaki sha wafu dasimanyiki kwa vandu vonda.

27 Yamukumbila monga lyowu dadubukili mweni, na yabilibisha ligonguveli limuyendeli monga, dalimuwuyili mweni.

28 Mundu mfyangu akuvanyekwa vala yavagobulili, na yayiwongola akuyegha danganyishilu.