1 Mwana wangu, pawujumila filongu fyangu, na kuvagola malawu vangu. 2 Tegheli matu vaku upikana cha luhunja na ndima yaku yimanyi, 3 widedeki upati luhunja, na pawudeta kwa lishu likomi ndima yaku yipati umanyi. 4 Pawusaka luhunja kucha ukusaka mbiya, kucha wula ukusaka lusanja luyifisili. 5 Pawugola naha, dawumanyi kumtundamila Bambu Chapanga chindu liki, na dawumanyi ndambu ya kumumanya Chapanga. 6 Kwanongwa Bambu Chapanga akuvagayila vandu luhunja, luhala na umanyi fikufuma kwa mweni. 7 Bambu akuvavikila vandu vasangi luhunja lwa nyanyi, na mweni akuvadima yivayikala kwa unakaka. 8 Akuvadima vandu vosi yivavagolela vayawu ugoleki, na kuvadima vala yivamkimbanikila mweni.

9 Pawumbikanisha dawumanyi chindu liki cha kugola na kumanya mana ya usangi na ugoleki,. 10 Nongwa luhunja daluyingili mundima yaku, na umanyi davavi mungalilu nofu. 11 Luhunja na dawukudimi, na umanyi dawukuviki nyanyi. 12 dayikuviki kutali na wafu, na vandu yivawomba fya wafu, 13 vandu vala yivasileka deha sha nyanyi, na kusiyendela deha sha wafu, 14 vandu yivasekilela kugola wafu, na vakudayila kuwona wafu ukugoleka, 15 na fila fivagola fikuvajanga vandu, na deha shawu sha nakaka ha.

16 Luhunja dalukutangi kwisegha na mdala muwoni, mdala muwoni yayesha kukupughapugha kwa filongu finovili, 17 mdala yamlekili bambu mundu wa ujana waki, na kulibedala lilaghanu lyagolili kwa Chapanga waki. 18 Leki ukuyenda kwa mdadala nga ayu, ukusova, deha shaki sikuyenda kwa yivasovili. 19 Mundu yoyonda yamuyendela mdadala ayu dawuyi ha. Mweni danani kandi ha! 20 Topi, dakovikeli chilangushilu cha vandu vasangi, na vala yivakombikesha ngalilu ya unakaka davayikali. 21 Kwanongwa vandu goleki davayikali mumlima, na vangajila mbatiwa davayikali amu. 22 Lakini Chapanga davawushi vandu vawafu mumlima na yivavelili na vandu vawafu davakoposhiwi amu.