1 Pawulya pamu na mtavala, kotoo kwivasugha kucha kuva pamu na ghani. 2 Wiwunishili nendu bafukilu yaku, kwanongwa yuwi kukutama munu kulya. 3 Kotoo kubafukila filivi fyaki finofu, nongwa filivi afi fikuwesha kukujanga.

4 Kotoo kwigobola kwa nongwa ya ulundamali, kotoo kwidumbila luhala lwaku umweni. 5 Tepu hela ulundamali ukuwuka, ukuva kucha wuna mbapatilu, ukuwuluka na kuvevela kucha ndapu.

6 Kotoo kulya filivi fya mundu mwimi, kotoo kufibafukila filivi fyaki finovili, 7 mundima yaki akwivalanga fiwulili. Mweni dakuwombeli, "Wulyi landi!" Lakini mundima yaki kava na yuwi ha. 8 Dawuhukwi filivi fyonda fiwulili, na yuwi dawuvi kuyaghamisha filongu fyaku yonda fya kumjuma.

9 Kotoo kudeta filongu kunu mundu mpufi kabaha, nongwa dabedali filongu fyaku fya luhunja.

10 Kotoo kusewusha chilangushilu cha mbaka ya dahili, na kotoo kuvapoka vangalekwa fitava fyawu, 11 nongwa Chapanga yavalevangila kana liwovi, davalevangilili haki yawu na yuwi dawuwoneki kuna mbatiwa ha.

12 Luhala lwaku lusiki pawuwuliwa, na majeji vaku pikani filongu fya umanyi.

13 Kotoo kuleka kumkayika mwana, pawumlatula dasovi ha, 14 pawumlatula ndomondu, dawulowoli ngalilu yaki.

15 Mwana wangu, ndima yaku payiva na luhunja, nenga dayivi na seku. 16 Ndima yangu dayisekileli, leki pawudeta chivelili telatela.

17 Ndima yaku yikotoo kuvawonela weyi vandu vawafu, lakini yuwi yendileli kumtundamila Bambu Chapanga majuva vonda. 18 Nakaka pambeli kuna shuvililu, na shuvililu yaku dayivi wuwula wula.

19 Pikani mwana wangu, wuvi na luhunja, wiholi nendu ndambu ya kwikala mudeha siholukili, 20 kotoo kuva gati ya vandu vanjayila, kotoo kubafukila nyama, 21 nongwa vanjayila na vabafu davavi vagaju, na yasisila lijuva lyosi dafwali fimbendela.

22 Mpikani tati waku yakulelili, na kotoo kumbedala mawaku pagogola.

23 Hemeli unakaka na kotoo kuchulusa, hemeli luhunja, ng'ulilu na umanyi.

24 Tati yavelili na mwana goleki damemi seku, yamlelili mwana yavelili na luhunja dasekileli.

25 Wuvagayili seku tati na mawaku, na mawaku yakulelili akunemileli.

26 Mwana wangu pikani finofu, wikamuli ngalilu yangu. 27 Filongu fya mdala muwoni fiva kucha lyowu litali, mdadala mpeji kava kucha mtambu wa lyowu linyepili. 28 Mweni akutendela kucha mpoki, mweni ndi chanjali cha valulumi vatangalili vakotoo kuva vaaminifu.

29 Ghani yavika umatu? Ghani muna lung'ong'u? Ghani yavelili mgombi? Ghani yawomba ngaya? Ghani muna mivanga yingajila nongwa? Ghani yaveli na mesu madwifu? 30 Ndi vala vanjayila, vala yivayikala pambali kwa nongwa ya kulanda chilangamkoma cha ndambu sitangalili. 31 Kotoo kudobukela difwayi hata leki yikuwoneka dwifu, hata leki yikututuma mulwindi na kuseleka mbolimboli muluheleji. 32 Pambeli fikuluma kucha njoka, na yikutama kucha njoka yavelili na usungu. 33 Mesu vaku davawoni fimulimuli, na luhala lwaku dalwiholi findu fya wafu. 34 Dawuwoni kucha kuwonja pagati ya lihiva, akuva kucha mundu yawonjili muwatu wuukongiwili payipalu. 35 Dawudeti kucha vadula lakini gobuleka ha, vanatulili lakini ndamanyili ha. Danyimuki ndili nyendi ngalandi chilangamkoma chingi?