1 Difwayi yikumgola mundu abedaliwi na uyimbi wukumgola mundu ghavi wa ndewu, yoyonda yatavaliwa na findu afi kavahela luhunja.

2 Maya va mutwa vava kucha lishu lya majabi yabuluma, yamgola akalali akuwesha kudanganyisha unofu waki.

3 Mundu kwilyepa na ndewu ndi ndundamilu kwa mweni, lakini vapufi ndi yivaleva.

4 Mgata akulima kwa chipindi ha, chipindi cha mbena akushuvilila lakini akupata chindu ha.

5 Hoshu sha mundu sikwifwana na lihiva lya machi, lakini muna luhunja kamanya ndambu ya kuteka amu.

6 Vandu vatangalili vakwifunila kuva vasangi, lakini mundu wa mwaminifu ghani dampati?

7 Mundu msangi payikala kwa ngalilu ya ugoleki, pambeli vana vaki davanemiliwi.

8 Mutwa payikala pachigoda chaki kwa nongwa ya highilu, kwa mesu vaki akufiwona fyosi fya wafu.

9 Ghani yawesha kudeta ng'alisha ndima yangu, nenga ndiyipugha ndivahela sambi?

10 Figelu na fibaba fingajila unakaka, fyonda fikumgola Bambu Chapanga akalali.

11 Hata mwana akumanyika kwa figoli fyaki, kucha kana figoli fya nyanyi na fya nakaka.

12 Majeji vakupikana na mesu vakulola, Bambu Chapanga ndi yafilumbili.

13 Kotoo kusitama ng'onju nongwa dawuvi mgaju, wuvi mesu na dawuvi na filivi fitangalili.

14 Yahemela akuwesha kudeta kucha beyu yigina, pambeli pawuka akwijuma kapungushiliwa beyu.

15 Kuna chumang'andu na migonguveli yitalamili yitangalili munu, lakini chitalamili munu filongu fya nyanyi.

16 Mundu pamhadikila muhenja toli yingwa yaki, ayikamulili mbaka ahombi chila chumuhadikilili muhenja.

17 Filivi fiwupata kwa wafu finova munu, lakini pambeli fikuva kucha muhanga mumlomu.

18 Findu finofu fikugoleka kwa kuwombana, pawudayila kukanda mgogha wiholi tangu.

19 Mundu muhesi kana chifisu ha, wumwilyepi mundu mfyangu.

20 Yamlapila tati mundu awu mawaki, mbelelu ya ngalilu yaki dayivi kucha kujimisha luliku muchisi chikomi.

21 Mbala ya chamcham yiwupatili kalopu, mbelu yaki dawusighali na chindu ha.

22 Kotoo kudeta kucha dagoli lugotu lwa fila fiwugolilili, widumbili Bambu Chapanga mweni dakutangi.

23 Figelu fingajila unakaka, fyonda fikumgola Bambu Chapanga akalali.

24 Mundu akulongushiwa na Bambu Chapanga, mundu dayimanyi wuliwuli deha yaki mweni?

25 Kotoo kuvika jangi ya kumtawulila litambiku Bambu Chapanga kalopu kalopu ngajila kwihola, na pambeli dawukandi kuyiwofya chila chiwumjangili.

26 Mutwa muna luhunja akuwusha wafu wonda, pambeli akuhigha ngajila lusungu.

27 Natilu ya mundu ndi luliku lwa Chapanga, lukulembesha fyonda fivelili mundima yaki.

28 Usangi na unakaka wukumdima mutwa, kwa utami waki wutwa wukudindashiwa.

29 Fijana vakwidumbila liwovi lyawu, ngimu wuyivelili kwa vagogolu vakwidumbila soghi shawu.

30 Kutoviwa na kupata mivanga kukumalila wafu, kulatuliwa kukuvagola vandu vagoli fya usangi.