1 Wuli, Luhunja lukukema ng'odu?

Umanyi ukulandula lishu lyaki ng'odu?

2 Luhunja luwoloka pachikwelu pabehi na pamaleka,

apa ndi pawoloka.

3 Luhunja luva pabehi ya mlyangu wa kwingilila mumbwani,

pavayingilila vandu akukema kwa lishu likomipaadeta,

4 "Yumwi vandu vosi, nguvakayika!

Lishu lyangu likuvakema vandu vosi.

5 Yumwi mungajia umanyi mwiwuli umanyi,

yumwi vapufi mwiwuli luhala.

6 Mupikani nongwa yichideta ndi chindu yichitawukili,

nguwomba filongu yifivelili nakaka.

7 Mlomu wangu dawudeti fya nakaka weka,

wafu ukudayiliwa ha pamulomu wangu.

8 Kila chindu chideta chiva nakaka,

kwahela chindu yichideta cha ufyangu mumlomu wangu.

9 Kwa mundu yamanya findu fyosi fiva pawelu hela,

kwa yaveli na luhala fyosi filinganila.

10 Shawuli ng'ulilu yangu kotoo kushawula mbiya,

na shawuli umanyi kotoo kushawula chumang'andu nofu?"

11 "Nenga luhunja ndalama pitu lubi,

na chila chiwudayila dachiweshi ha kulinganila na nenga.

12 Nenga luhunja ndiva na umanyi,

ndina luhala na luhunja.

13 Kumtundamila Bambu Chapanga ndi kuunyekwa wafu.

nguwunyekwa lukilu, deha sha wafu na filongu fya wafu,

ngwinyekwa detelu ya wafu.

14 Nenga luhunja nguwesha kukayika findu kwa luhunja.

Nenga ndiva na umanyi na uweshi.

15 Kwa utangi wangu nenga luhunja nguvatanga vatwa vatavali,

na filongosi vakutunga malawu manofu.

16 Kwa utangi wangu nenga luhunja filongosi vakutavala,

wuwula wula na vakomi va valamula.

17 Nguvatama vala yivandama,

yivansaka kwa nguvilishu vakung'ona.

18 Ulundamali na ndundamilu fiva kwa nenga,

kupata findu na uweshi fiva kwa nenga.

19 Fivelekwa fyangu fiva finofu pitu chumang'andu nofu,

na chila chindawula chanyanyi pitu madini manofu va mbiya.

20 Nguyendayenda mudeha nofu,

ngukovikela deha ya unakaka.

21 Nguvagayila ulundamali vala yivandama,

ngusimemesha sanja shawu vala yivandama."

22 Bambu Chapanga ang'umbili pakandeyi chichuku chaki,

pakwandi findu fyosi fyavelili fyakali hela kuwumbiwa.

23 Pakwandi ndalumbiwili,

hata mlima ukali hela kulumbiwa nenga ndavelili.

24 Nenga ndawonikili chipindi mihiva ya bahali yakalihela kulumbiwa,

fiseselu fya machi fyavelili fikali kulumbiwa.

25 Fidunda fyavelili fikali hela kulumbiwa,

na fikwelu kulumbiwa mahali paki, nenga ndavelili.

26 Chapanga avelili akali hela kuwumba mlima na fitava fyaki,

wala uganga wa mlima.

27 Pavikili lulanga nenga ndavelili kala,

chipindi pavikili mbaka sha lulanga na bahali.

28 Chipindi pavikili mafundi kumbindi kwa Chapanga ndavelili,

pafidindashili fimbwitu fya bahali ndavelili,

29 chipindi pavikili mbaka sha bahali ndavelili kala,

machi vaki vakotoo kujabuka chingomeku chaki,

nga wavikili chikandilu cha mlima.

30 Ndavelili pamu na mweni kucha fundi mmanyi,

ndavelili na seku yaki majuva vosi,

panumbilila pawulongolu yaki jola,

31 pasekilela mlima pawulumbiwili na vandu vaki yivayikala,

na kunoviliwa kuva pamu na vandu.

32 "Ponopa mwana wangu, umbikanishi,

vanemiliwa vala yivakovikela deha shangu.

33 Mpikanishi ng'ulilu mpati luhunja,

mukotoo kulema.

34 Kanemiliwa mundu yambikanisha,

yayikala majuva vosi pamulyangu wangu,

yavetela pabehi ya mlyangu wangu.

35 Yambata nenga kapata unofu,

na kajumiliwa na Bambu Chapanga.

36 Lakini yangajila kumbata nenga akwigobola mweni,

vosi yivanyekwa nenga vakudayila kusova."