1 Asi ndi detelu singi sha mutwa Solumoni siyandikiliwi kandi na vandu va Hesekia, mutwa wa Yuda.

2 Tukumuwona Chapanga ndi mkomi kwa kufisa findu, lakini mutwa akutundamiwa kwa kulembesha filongu.

3 Kucha lulanga luvelili kumbindi kutali munu na mlima, ndi wavelili mundu kumanya fyosi fyayihola mutwa.

4 Wushi uchafu mumadini va mbiya, na yula yavatula dagoli chindu chinofu, 5 wuwula wula na yuwi wuvadagi vandu vawafu yivavelili pawulongolu ya mutwa, na utavala waki dawudindashwi kwa haki.

6 Kotoo kwiwongola kwa mutwa, na kotoo kwigola kuva mundu mkomi. 7 Nyanyi pavakuwombela wisi wikali kuwulongolu, lakini nyanyi ha pavakudaga pawulongolu ya vakomi.

8 Wuchiwonili kwa mesu vaku kotoo kulopukesha kuchiyegha kuchitemela, wuli, dawugoli liki mtovileli wingi payisa kughalambula chila chiwudetili?

9 Leki yuwi na muyaku mwishosha mujovi, na kila mundu akotoo kudeta sili ya monga, 10 vandu vakotoo kumanya kuna chifisu, na pavamanya dawupati soni nendu.

11 Chilongu yichiwombiwa kwa chipindi chaki, chikwifwana na melimetishelu ya chumang'andu yishaghiwili mubakuli ya madini va mbiya.

12 Mundu muna luhunja pamkayika mundu yapikani, ndi chindu chinofu pitu pete awu vindu fya chumang'andu nofu.

13 Mnjagila mwaminifu akumgola mkomi waki asekileli, ndumindumi ayu akwifwana na machi vasisimili chipindi cha mkakamu.

14 Mundu yayijuma kucha dakugayili fupu lakini akutawula ha, ayu akwifwana na liyegha na mafundi yivayegha ng'odu ndonya.

15 Pawudeta kwa kwiwongola kukugola mtavala akujumili, na pawudeta mbolimboli ukuwesha kukujumila.

16 Pawupata njuki wulyi chidokwa, pawulya yitangalili dawuhukwi. 17 Kotoo kumtyangila mjofi tepu tepu, nongwa dakutofyi na kukunyekwa.

18 Mundu yatovilela fya udesi kwa monga, yiva hatali kucha chimbongu au lipanga au msali wusongukili munu.

19 Kumwidumbila mundu yangajila uwaminifu chipindi cha gobuleku, yiva kucha linu liwolili au liwulu lipombalili.

20 Kumsomulela yadindalili ndima kukwifwana na mundu yawopola yingwa chipindi cha lupepu au yavika munyu muchilonda.

21 Chimdwama waku paghava na njala mupi filivi, kayumilwa machi va kulanda mupi. 22 Pawugola naha dawumugoli ghavi na chindipa, na Bambu dakugayili fupu.

23 Liyegha lya kuchanya likuyegha ndonya, yiva nga kumuhegha mundu kukuyegha maya.

24 Ngiba kwikala kwituvili, kuliku kwikala na mdala mgombi.

25 Kupokela chilongu cha chinofu kufuma mlima wa kutali, yikufwamusha ndima wuwula wula machi yivasisimili kwa mundu yayumiwili.

26 Mundu goleki yawuleka wafu, akwifwana na chiseselu cha machi chivelili na wivi awu litepu litimbushiwili.

27 Kulya njuki yitangalili nyanyi ha, wuwula wula nyanyi ha vandu vakujumi munu.

28 Mundu yangajila kwiwunishila maya vaki, kava kucha mbwani yingajila luviwu.